বিজেপিলৈ মিঠুন চক্ৰৱৰ্তী! আৰ এছ এছৰ মুখ্য কাৰ্যালয়ত কিয় গৈছিল মিঠুন?
বলীউদৰ এসময়ৰ অতি জনপ্ৰিয় তাৰকা অভিনেতা মিঠুন চক্ৰৱৰ্তীয়ে এইবাৰ বিজেপিত যোগদান কৰিব নেকি?
মহাৰাষ্ট্ৰৰ নাগপুৰত অৱস্থিত আৰ এছ এছৰ মুখ্য কাৰ্যালয়ত অভিনেতাগৰাকীক দেখা পোৱাৰ পাছতেই আৰম্ভ হৈছে এই জল্পনা-কল্পনা।
বৃহস্পতিবাৰে দুপৰীয়া ৰাষ্ট্ৰীয় স্বয়ং সেৱক সংঘৰ মুখ্য কাৰ্যালয়ত হঠাতে গৈ উপস্থিত হয় বলীউদৰ জনপ্ৰিয় অভিনেতাগৰাকী।
মিঠুন চক্ৰৱৰ্তীয়ে কাৰ্যালয়ত উপস্থিত হোৱাৰ পাছত তাত থকা সংঘৰ প্ৰতিষ্ঠাতা কেশৱ বলিৰাম হেডগেউৱাৰৰ প্ৰতিমূৰ্তিত শ্ৰদ্ধাঞ্জলি নিবেদন কৰে।
সেই সময়ত আৰ এছ এছৰ মুখ্য কাৰ্যালয়ত উপস্থিত থকা কেইবাজনো কৰ্মকৰ্তাৰ সৈতে তেওঁ কথা পাতে।
কৰ্মকৰ্তাসকলে মিঠুনক আদৰণি জনোৱাৰ লগতে তেওঁৰ হাতত সংঘৰ এখন ফটো ফ্ৰেমো তুলি দিয়ে। ইয়াৰ পাছতে মিঠুনে তাৰ পৰা বিদায় লয়।
আৰ এছ এছৰ মুখ্য কাৰ্যালয়ত মিঠুনৰ এই হঠাতে ঘটা পদাৰ্পনৰ পাছতেই ৰাজনৈতিক মহলত বহু জল্পনা-কল্পনা আৰম্ভ হৈছে। মিঠুন বা সংঘৰ ফালৰ পৰা এই সন্দৰ্ভত কোনো কথা স্পষ্ট নকৰাৰ বাবে জল্পনা-কল্পনা অধিক বৃদ্ধি পাইছে।
তৃণমূলৰ প্ৰাক্তন ৰাজ্যসভাৰ সাংসদগৰাকীৰ হঠাতে আৰ এছ এছৰ মুখ্য কাৰ্যালয়ত গৈ উপস্থিত হোৱাৰ ঘটনাই স্বাভাৱিকতে চৰ্চা লাভ কৰিছে।
Maharashtra: Veteran Actor Mithun Chakraborty visited Rashtriya Swayamsevak Sangh (RSS) headquarters in Nagpur, earlier today. pic.twitter.com/Qv2NjH2NZe
— ANI (@ANI) October 3, 2019
বিগত বহুদিন ধৰি মিঠুন চক্ৰৱৰ্তীৰ ৰাজহুৱা উপস্থিতি দেখা যোৱা নাছিল। তেওঁৰ স্বাস্থ্য ভাল নাছিল বুলি খবৰ শুনা গৈছিল।
বৃহস্পতিবাৰেও মিঠুনৰ মুখত মাস্ক লগোৱা থকা দেখা গৈছিল। কিন্তু এনে অৱস্থাত কিহৰ তাড়নাত তেওঁ গৈ আৰ এছ এছৰ মুখ্য কাৰ্যালয়ত উপস্থিত হ’ল সি ৰহস্যৰ সৃষ্টি কৰিছে।
উল্লেখযোগ্য যে সাৰদা কেলেংকাৰিত অভিযুক্ত হোৱা মিঠুন চক্ৰৱৰ্তীয়েই একমাত্ৰ ব্যক্তি যিয়ে ইডিৰ কাৰ্যালয়ত গৈ সাৰদাৰ ধন ওভতাই দিছিল।
ইয়াৰ পাছতে তেওঁ আপাতত: নিজকে আঁতৰাই ৰাখে। ৰাজনীতিৰ পৰা দূৰত থকাৰ সিদ্ধান্ত গ্ৰহণ কৰি ৰাজ্যসভাৰ সাংসদ পদো ত্যাগ কৰে।
অৱশ্যে, শাৰীৰিক অসুস্থতাৰ কাৰণেই তেওঁ উক্ত সিদ্ধান্ত লোৱাৰ কথা জানিব দিছিল। কিন্তু বৃহস্পতিবাৰে মিঠুনে আৰ এছ এছৰ মুখ্য কাৰ্যালয়ত হঠাতে গৈ উপস্থিত হোৱাৰ ঘটনাই বিশেষ চৰ্চা লাভ কৰিছে।