বঙাইগাঁও জিলাৰ উত্তৰ শালমাৰাৰ ঘিলাগুৰি গাঁৱত পোহৰলৈ আহিছে এক চাঞ্চল্যকৰ ঘটনা। খবৰ অনুসৰি প্ৰণৱ দাস আৰু বুদু দাস নামৰ দম্পতীক প্ৰসৱৰ বাবে বঙাইগাঁও চহৰৰ এখন ব্যক্তিগত চিকিৎসালয়ত ভৰ্তি কৰোৱা হৈছিল। মহিলাগৰাকীয়ে চিকিৎসালয়খনত সুস্থ যমজ সন্তান জন্ম হৈছিল। চিকিৎসালয়ৰ বিষয়াসকলে নিশ্চিত কৰিছে যে মাতৃ আৰু নৱজাতক দুয়োটাকে সুস্থিৰ অৱস্থাত ঘৰলৈ যাবলৈ দিয়া হৈছে।
কিন্তু নিজৰ গাঁৱলৈ উভতি অহাৰ লগে লগে দম্পতীহালে সমাজক জনায় যে নৱজাতকৰ মৃত্যু হৈছে আৰু পৰিয়ালটোৱে ধৰ্মীয় পৰম্পৰা অনুসৰি শেষ অনুষ্ঠান সম্পন্ন কৰিছে। এই দাবী কৰিছিল প্ৰণৱ দাসৰ মাতৃয়ে।
পৰৱৰ্তী সময়ত কেঁচুৱাকেইটাৰ প্ৰকৃত অৱস্থাক লৈ গাঁওবাসীৰ মাজত সন্দেহ হ’বলৈ ধৰিলে। দম্পতীহালে কেঁচুৱাকেইটা বিক্ৰী কৰাৰ সন্দেহ কৰি ৰাইজে জিলা শিশু সুৰক্ষা কাৰ্যালয়ত আনুষ্ঠানিক এজাহাৰ দাখিল কৰে।
অভিযোগৰ ভিত্তিত শিশু সুৰক্ষা কাৰ্যালয় আৰু আৰক্ষীৰ যৌথ দলে দম্পতীহালৰ ঘৰত অভিযান চলায়। অৱশ্যে অভিযানৰ সময়ত উপস্থিত নাছিল প্ৰণৱ আৰু বুধু দাস। জিলা শিশু সুৰক্ষা কাৰ্যালয়ে আৰক্ষীক এফআইআৰ দাখিল কৰাৰ লগতে নৱজাত যমজ সন্তান বিক্ৰীৰ অভিযোগৰ আঁৰৰ সত্যতা জানিবলৈ তদন্ত অব্যাহত ৰাখিছে।
