মঙলবাৰে ৰাজ্য চৰকাৰে বঙাইগাঁও জিলাৰ বিদ্যালয়সমূহৰ পৰিদৰ্শকক কৰ্তব্যৰ গাফিলতিৰ বাবে নিলম্বিত কৰিছে। এক আনুষ্ঠানিক অধিসূচনা অনুসৰি বিদ্যালয় শিক্ষা বিভাগে মাধ্যমিক শিক্ষা সঞ্চালকৰ পৰা এক প্ৰতিবেদন লাভ কৰে য’ত অভিযুক্ত বিদ্যালয় পৰিদৰ্শক জ্যোৎস্না ৰাণী বৰ্মনে অকৰ্তৃত্বশীলভাৱে মুখ্য কাৰ্যালয়ত অনুপস্থিত আছিল।
তদুপৰি, এইটোও চৰ্চালৈ আহিছে যে ৰাজ্যিক শৈক্ষিক পৰিষদ, অসমৰ অষ্টম, নৱম, আৰু দশম শ্ৰেণীৰ প্ৰতিভা সন্ধানী পৰীক্ষা, ২০২৩ চনৰ ৩১ ডিচেম্বৰত (দেওবাৰ) অনুষ্ঠিত হৈছিল আৰু সেই অনুসৰি বৰ্মনক জিলা পৰীক্ষা নিয়ন্ত্ৰক তথা নিৰীক্ষকৰ দায়িত্বৰ লগতে গোৱালপাৰা, বঙাইগাঁও, ধুবুৰী, দক্ষিণ শালমাৰা, কোকৰাঝাৰ আৰু চিৰাং জিলাৰ মাণ্ডলিক তত্বাৱধায়ক হিচাপে নিযুক্তি দিয়া হৈছিল।
বিদ্যালয়সমূহৰ পৰিদৰ্শকক প্ৰেৰণ কৰা জাননীখনত লিখা আছে, “পূৰ্বতে উল্লেখ কৰা প্ৰতিবেদনত প্ৰকাশ পাইছে যে ২৭/১২/২০২৩ তাৰিখে অসমৰ মাধ্যমিক শিক্ষা সঞ্চালকৰ পৰা বিশেষ দূতৰ জৰিয়তে জ’ন ভিত্তিক গোপনীয় পৰীক্ষাৰ সামগ্ৰীসমূহ নিযুক্ত সকলো জ’নলৈ প্ৰেৰণ কৰা হৈছিল।
লগতে পঢ়কঃ আলফা-স্বাধীনৰ কমাণ্ডাৰ ইন চীফ পৰেশ বৰুৱাৰ বাসগৃহৰ পৰা প্ৰত্যাহাৰ নিৰাপত্তা বাহিনী
অৱশ্যে বঙাইগাওঁৰ বিদ্যালয়সমূহৰ পৰিদৰ্শক জ্যোৎস্না ৰাণী বৰ্মনক মুখ্য কাৰ্যালয়ত উপৰোক্ত গোপনীয় সামগ্ৰী গ্ৰহণ কৰিবলৈ বিচাৰি পোৱা নগ’ল।
“জ্যোৎস্না ৰাণী বৰ্মনে কোনো ধৰণৰ ছুটীৰ বাবে আবেদন কৰা নাছিল আৰু তেওঁৰ অনুপস্থিতিৰ সন্দৰ্ভত সঞ্চালকক অৱগত কৰা নাছিল। তদুপৰি, বঙাইগাঁৱৰ বিদ্যালয়সমূহৰ পৰিদৰ্শক জ্যোৎস্না ৰাণী বৰ্মনে অকৰ্তৃত্বশীল অনুপস্থিতিৰ সময়ত বঙাইগাঁৱৰ বিদ্যালয় পৰিদৰ্শকৰ কাৰ্যালয়ৰ দায়িত্ব কোনো অনুমোদিত ব্যক্তিক অৰ্পণ কৰা নাছিল।”
এই কথা উল্লেখ কৰি বিদ্যালয় শিক্ষা বিভাগে বিদ্যালয়সমূহৰ পৰিদৰ্শকগৰাকীক কৰ্তব্যৰ গাফিলতিৰ বাবে আৰু সংশ্লিষ্ট কৰ্তৃপক্ষৰ অনুমোদন অবিহনে ৰাজ্যৰ বাহিৰলৈ যোৱাৰ বাবে নিলম্বিত কৰে।
লগতে পঢ়কঃ কেন্সাৰৰ চিকিৎসাত আশাৰ পোহৰ! আই আই টি কানপুৰৰ গৱেষকসকলে খুলিছে সম্ভাৱনাৰ নতুন দুৱাৰ
উল্লেখ্য যে ২০২০ চনত নলবাৰী জিলাত কৰ্মৰত অৱস্থাত একেগৰাকী বিদ্যালয়সমূহৰ পৰিদৰ্শক জ্যোৎস্না ৰাণী বৰ্মনক উৎকোচৰ গ্ৰহণৰ অভিযোগত গ্ৰেপ্তাৰ কৰা হৈছিল।
সেইবাৰ জ্যোৎস্নাক দুৰ্নীতি নিবাৰক শাখাৰ বিষয়াই ১৫ হাজাৰ টকা উৎকোচ লোৱাৰ সময়তে হাতেলোটে ধৰা পেলাইছিল।
