ভাৰত-বাংলাদেশ সীমান্তত বি এছ এফৰ হাতত আটক বৃহৎ পৰিমাণৰ ড্ৰাগছ সহ মাফিয়া

ভাৰত আৰু বাংলাদেশ সীমান্তৰ পৃথক পৃথক স্থানত অভিযান চলাই ভাৰতীয় সীমা সুৰক্ষা বাহিনীয়ে বৃহৎ পৰিমানৰ ড্ৰাগছৰ লগতে তিনিগৰাকী ড্ৰাগছ মাফিয়াক আটক কৰিবলৈ সক্ষম হয়।

কোচবিহাৰ জিলাৰ সিতাই অঞ্চলত সীমা সুৰক্ষা বাহিনীৰ চাউনীৰ ওচৰৰ পৰাই এগৰাকী পুৰুষ আৰু মহিলাক নিষিদ্ধ ড্ৰাগছ সৰবৰাহ কৰি থকা অৱস্থাতে হাতে-লোটে থৰা পেলাই সীমা সুৰক্ষা বাহিনীয়ে।

আটকাধীন পুৰুষ আৰু মহিলাগৰাকীক স্বামী-স্ত্ৰী বুলি জানিব পৰা গৈছে। বি এছ এফৰ প্ৰাথমিক জেৰাত দুয়োগৰাকী সিতাই থানাৰ অন্তৰ্গত সাতভাণ্ডাৰী গাঁৱৰ ভাৰত বৰ্মণ আৰু প্ৰভা বৰ্মণ বুলি পৰিচল লাভ কৰা গৈছে।

আনহাতে, কোচবিহাৰ জিলাৰে সাহেবগঞ্জ থানাৰ অন্তৰ্গত ভাৰত-বাংলাদেশ সীমান্ত অঞ্চলত আজি ৰাতিপুৱা নিষিদ্ধ দ্ৰব্যৰে সৈতে বি এছ এফে ছাইদুল হক (৩৫) নামৰ এগৰাকী ড্ৰাগছ সৰবৰাহকাৰীক কৰায়ত্ত কৰিবলৈ সক্ষম হয়। ছাইদুল হক সাহেবগঞ্জ থানাৰ অন্তৰ্গত খিতাবেৰখুটি গাঁৱৰ ওমৰ আলীৰ পুত্ৰ।

বিগত কিছুদিনত ভাৰত আৰু বাংলাদেশ সীমান্তত সীমান্ত সুৰক্ষা বাহিনীয়ে ভালেসংখ্যক গৰু সৰবৰাহকাৰী আৰু ড্ৰাগছ সৰবৰাহকাৰীক আটক কৰিবলৈ সক্ষম হৈছে।

বৰ্তমান বি এছ এফে আটকাধীন তিনিওগৰাকী লোকক আৰক্ষীৰ হাতত গটাই দিছে।