ভাৰত-বাংলাদেশ সীমান্তৰ মুৰ্শিদাবাদ অঞ্চলত বাংলাদেশ ব’ৰ্ডাৰ গাৰ্ডৰ গুলীত আজি বি এছ এফৰ হেড কনিষ্টবল বিজয়ভান সিঙ চহিদ হোৱাৰ লগতে আঘাতপ্ৰাপ্ত হয় আন এগৰাকী বি এছ এফৰ জোৱান।
জানিব পৰা মতে, বাংলাদেশ ব’ৰ্ডাৰ গাৰ্ডৰ আমন্ত্ৰণ ক্ৰমে ফ্লেগ মিটিঙত অংশগ্ৰহণ কৰিবলৈ গৈ থকা অৱস্থাত বি এছ এফৰ এটা দলৰ ওপৰত বাংলাদেশ ব’ৰ্ডাৰ গাৰ্ডে গুলীচালনা কৰে আৰু এই গুলীচালনাত বি এছ এফৰ কনিষ্টবল গৰাকী চহিদ হয়।
এই ঘটনাক কেন্দ্ৰ কৰি ভাৰত-বাংলা সীমান্তত উত্তেজনা বৃদ্ধি পোৱাৰ লগতে সীমান্তত ভাৰতৰ তৰফৰ পৰা নিৰাপত্তা বৃদ্ধি কৰা হৈছে।
বৃহস্পতিবাৰে তিনিগৰাকী ভাৰতীয় মাছমৰীয়াই পদ্মা নদীত মাছ ধৰিবলৈ যোৱাক কেন্দ্ৰ কৰি এনে দুৰ্ভাগ্যজনক ঘটনাৰ সুত্ৰপাত হয়।
বৃহস্পতিবাৰে ৰাতিপুৱাৰ ভাগত পদ্মা নদীত মাছ ধৰিবলৈ যোৱা তিনিগৰাকী ভাৰতীয় মাছমৰীয়াক বাংলাদেশ ব’ৰ্ডাৰ গাৰ্ডে আটক কৰে আৰু ইয়াৰ দুগৰাকীক মুকলি কৰি এজনক বন্দী কৰি ৰাখে।
মুকলি হোৱা মাছমৰীয়া দুজনে সমগ্ৰ ঘটনা বি এছ এফৰ আগত বৰ্ণনা কৰাৰ পাছত বি এছ এফৰ তৰফৰ পৰা বাংলাদেশ ব’ৰ্ডাৰ গাৰ্ডৰ সৈতে যোগাযোগ কৰা হয় আৰু তেওঁলোকৰ তৰফৰ পৰা বি এছ এফক ফ্লেগ মিটিঙৰ বাবে অনুৰোধ জনায়।
বাংলাদেশ ব’ৰ্ডাৰ গাৰ্ডৰ অনুৰোধ ক্ৰমে ফ্লেগ মিটিঙত অংশগ্ৰহণ কৰিব যোৱা বি এছ এফৰ জোৱানৰ ওপৰত মিটিঙ আৰম্ভ হোৱাৰ পূৰ্বে বাংলাদেশ ব’ৰ্ডাৰ গাৰ্ডে গুলীচালনা কৰে আৰু এই গুলীচালনাত বি এছ এফৰ কনিষ্টবল গৰাকী চহিদ হয় আৰু এজন জোৱান গুৰুতৰভাৱে আহত হয়।
বি এছ এফৰ তৰফৰ পৰা সমগ্ৰ ঘটনাক তীব্ৰ নিন্দা কৰি বাংলাদেশৰ পৰা এনেধৰণৰ ঘটনা আশা কৰা হোৱা নাছিল বুলি উল্লেখ কৰি এনে কাৰ্য্যৰ দ্বাৰা বাংলাদেশে সীমান্তত যুদ্ধ বিৰতি উলংঘা কৰিছে বুলি অভিযোগ কৰে।
