বিধানসভা নিৰ্বাচনত ৰাষ্ট্ৰীয় দল নহয় আঞ্চলিক ৰাজনৈতিক শক্তিৰ সৈতেহে মিত্ৰতা কৰিব বি পি এফে : প্ৰমিলাৰাণী ব্ৰহ্ম
অসম বিধানসভা নিৰ্বাচনৰ সময় চমু চাপি অহাৰ লগে লগে আগন্তুক নিৰ্বাচনলৈ বুলি সাজু হৈছে বি পি এফ দল।
বিধানসভা নিৰ্বাচনত বি টি চিৰ বাৰটা সমষ্টিত প্ৰাৰ্থী প্ৰক্ষেপ কৰিব বি পি এফে কিন্তু বি টি চিৰ বাহিৰত প্ৰাৰ্থী প্ৰক্ষেপ নকৰে আৰু নিৰ্বাচনত কাৰ সৈতে মিত্ৰতা হব সেয়া তিন-চাৰিদিনৰ ভিতৰত নিশ্চিত হ’ব বুলি বি পি এফ প্ৰধান হাগ্ৰামা মহিলাৰীয়ে কয়।
‘‘বি টি চিত গণতন্ত্ৰৰ চৰকাৰ চলা নাই, মিলিটাৰী শাসন হৈছে। বি পি এফ কৰিলে জেইলত যাব লাগিব তেনে অত্যাচাৰ চলাই আছে বি পি এফ কৰ্মীৰ ওপৰত,’’ হাগ্ৰামাৰ মন্তব্য।
আনহাতে, বি পি এফ কৰ্মীৰ ওপৰত সংঘটিত অত্যাচাৰ সন্দৰ্ভত অসম বিধানসভাত বিষটো উত্থাপন কৰা হৈছে যদিও কোনোধৰণৰ প্ৰভাৱ এতিয়ালৈ পৰা নাই বুলিও হাগ্ৰামাই লগতে কয়।
আজি ৩০ নং পুৱ কোকৰাঝাৰ বিধান সভা সমষ্টিৰ অন্তৰ্গত বালাজান তিনিআলীত অনুষ্ঠিত সভাত অংশগ্ৰহণ কৰি এনেদৰে গুৰুত্বপূৰ্ণ মন্তব্য কৰে হাগ্ৰামা মহিলাৰীয়ে।
শতাধিক ইউ পি পি এলৰ কৰ্মীয়ে বি পি এফত যোগদান কৰা অনুষ্ঠানত বি পি এফৰ বিধায়িকা তথা মন্ত্ৰী প্ৰমিলা ৰাণী ব্ৰহ্মাই উপস্থিত থাকি অহা বিধানসভা নিৰ্বাচনত বি পি এফে কোনো ৰাষ্ট্ৰীয় দলৰ সৈতে মিত্ৰতা নকৰি আঞ্চলিক ৰাজনৈতিক দলৰ সৈতে মিত্ৰতা কৰিব বুলি সংবাদ মাধ্যমৰ আগত প্ৰকাশ কৰে।