কিছুদিন পূৰ্বে গুজৰাটত সংঘটিত হৈছিল এক ভয়াৱহ দুৰ্ঘটনা। গুজৰাটৰ মৰ্বিত এখন দলং খহি পৰাৰ ফলত মৃত্যু ঘটিছিল প্ৰায় ১৪০ গৰাকী লোকৰ। মৰ্বিৰ পাছত এইবাৰ বিহাৰৰ বেগুচৰাইত খহি পৰিছে এখন দলং।
পাঁচ বছৰৰ পূৰ্বে নিৰ্মাণ কৰা এখন দলং উদ্বোধনৰ পূৰ্বেই দেওবাৰে দুভাগ হৈ নদীত বাগৰি পৰে। অৱশ্যে দলংখন আনুষ্ঠানিকভাৱে জনসাধাৰণৰ বাবে মুকলি নোহোৱাৰ বাবে কোনো লোকৰ হতাহত হোৱা নাই।
বেগুচৰাই জিলাৰ বুঢ়ী গণ্ডক নদীৰ ওপৰেৰে ১৩ কোটি টকা ব্যয় সাপেক্ষে নিৰ্মাণ কৰা হৈছিল এই দলংখন। ২০১৬ চনৰ পৰা ২০৬ মিটাৰ দৈৰ্ঘ্যৰ দলংখনৰ নিৰ্মাণকাৰ্য আৰম্ভ কৰা হৈছিল।
দলংখন কিছুদিনৰ পাছতে উদ্বোধন কৰাৰ পৰিকল্পনা কৰা হৈছিল যদিও তাৰ পূৰ্বেই ভাঙি নদীত বাগৰি পৰে। এগৰাকী স্থানীয় প্ৰশাসনিক বিষয়াই এই সন্দৰ্ভত ইতিমধ্যে তদন্ত আৰম্ভ কৰা হৈছে বুলি জানিবলৈ দিয়ে।
ইফালে স্থানীয় লোকসকলে যোৱা তিনিদিনত ২০৬ মিটাৰ দৈৰ্ঘ্যৰ দলংখনত ফাট মেলিছিল বুলি জানিবলৈ দিছে। আনহাতে ঘটনাৰ সময়ত দলংখনত কোনো লোক নাছিল বুলি প্ৰশাসনে জানিবলৈ দিয়ে।
