ভাৰতীয় কমিউনিষ্ট পাৰ্টিৰ (মাৰ্ক্সবাদী) পলিট ব্যুৰোৰ সদস্য বৃন্দা কাৰাটে আৰু চিপিআই(এম)ৰ দিল্লী ৰাজ্যিক সমিতিৰ সচিব কে.এম তিৱাৰীয়ে দিল্লীৰ জাহাংগীৰপুৰীৰ হিংসাত্মক ঘটনা সন্দৰ্ভত দিল্লীৰ আৰক্ষী আয়ুক্তলৈ এখন পত্ৰখন লিখিছে।
যোৱা ১৬ এপ্ৰিলত জাহাংগীৰপুৰীত সংঘটিত সাম্প্ৰদায়িক প্ৰকৃতিৰ হিংসাত্মক ঘটনাত আৰক্ষীৰ ভূমিকা সন্দৰ্ভত নেতাদ্বয়ে এই পত্ৰখন লিখিছে।
পত্ৰখনত অভিযোগ কৰি কোৱা হৈছে যে ‘’কেইবাটাও টিভি চেনেলত সম্প্ৰচাৰিত ভিডিঅ’ প্ৰমাণৰ লগতে আমাৰ তথ্য বিচাৰি যোৱা দলে চাক্ষুস সাক্ষীৰ ভিত্তিত প্ৰস্তুত কৰা প্ৰতিবেদনত প্ৰমাণিত হৈছে যে বজৰং দলৰ যুৱ শাখাৰ সদস্যসকলে উলিওৱা শোভাযাত্ৰাত কেইবাজনো লোকে মুক্তভাৱে তৰোৱাল, লাঠী আৰু লগতে আচৰিতভাৱে আগ্নেয়াস্ত্ৰ লৈ সজ্জিত আছিল। শোভাযাত্ৰাৰ সময়ত এই অস্ত্ৰবোৰ মুকলিকৈ প্ৰদৰ্শন কৰা হৈছিল।‘’
পত্ৰখনত প্ৰশ্ন কৰা হৈছে, ‘’আৰক্ষীয়ে কৈছে যে শোভাযাত্ৰাটোত আৰক্ষীৰ অনুমতি আছিল। তেন্তে আৰক্ষীয়ে তেওঁলোকক অস্ত্ৰ কঢ়িয়াবলৈ অনুমতি দিছিল নেকি?’’
পত্ৰখনত নেতাদ্বয়ে উত্থাপন কৰা অভিযোগসমূহৰ লগতে দাঙি ধৰা সংশ্লিষ্ট বিষয়সমূহ তলত হুবহু আগবঢ়োৱা হ’ল।
দৰাচলতে অস্ত্ৰ কঢ়িয়াই অনা শোভাযাত্ৰাকাৰীসকলে স্পষ্টভাৱে অস্ত্ৰ আইন উলংঘা কৰিছিল। এনে উলংঘনৰ বাবে কাৰাদণ্ডৰ কঠোৰ ব্যৱস্থা আছে। সংবাদ মাধ্যমলৈ আপোনাৰ বিবৃতিৰ পৰা শোভাযাত্ৰাত থকা লোকসকলক আপুনি চিনাক্ত কৰিছে নে নাই বা যিসকলে অস্ত্ৰ-শস্ত্ৰ লৈ আছিল তেওঁলোকক অস্ত্ৰ আইনকে ধৰি আইনৰ প্ৰাসঙ্গিক ধাৰাৰ অধীনত গ্ৰেপ্তাৰ কৰা হৈছে নে নাই এইটো স্পষ্ট নহয়। আপোনাৰ বিবৃতিৰ পৰা এইটোও অস্পষ্ট যে আৰক্ষীৰ ভূমিকাৰ ওপৰত কোনো তদন্ত হৈছে নে নাই। ৰোজা (উপবাস) ভংগৰ প্ৰাৰ্থনা আৰম্ভ হোৱাৰ ঠিক সেই সময়তে মছজিদৰ সন্মুখত উচটনিমূলক আৰু আক্ৰমণাত্মক শ্ল’গান দি সশস্ত্ৰ শোভাযাত্ৰা ৰখাৰ অনুমতি দিয়াৰ বাবে কোন দায়বদ্ধ? আৰক্ষীৰ এনেধৰণৰ ইচ্ছাকৃতভাৱে পৰিস্থিতিক অৱজ্ঞা কৰাৰ ফলতে এই হিংসাত্মক ঘটনা সংঘটিত হৈছে।
আটাইতকৈ দুৰ্ভাগ্যজনক কথা যে একংশ আৰক্ষী কৰ্মীও কৰ্তব্যৰ সময়ত আঘাতপ্ৰাপ্ত হৈছিল। অৱশ্যে এইটো ক’ব পাৰি যে যদি জ্যেষ্ঠ বিষয়াসকলে শোভাযাত্ৰাৰ বাবে অনুমতি দিয়াৰ আগতে যথাযথ ব্যৱস্থাবোৰ নিশ্চিত কৰিলেহেঁতেন, পৰ্যাপ্ত আৰক্ষীৰ ব্যৱস্থা কৰিলেহেঁতেন, শোভাযাত্ৰাকাৰীসকলক অস্ত্ৰ কঢ়িয়াই নিয়াৰ বিৰুদ্ধে ব্যৱস্থা লোৱা হ’লহেঁতেন, বা শোভাযাত্ৰাটো মছজিদৰ সন্মুখত ৰ’বলৈ দিয়া নহ’লহেঁতেন – তেতিয়া ঘটনাবোৰ সংঘটিত নহ’লহেঁতেন।
মন কৰিব লাগিব কথাটো হ’ল যে এই ক্ষেত্ৰত আগতে কেতিয়াও সাম্প্ৰদায়িক প্ৰকৃতিৰ ঘটনা সংঘটিত হোৱা নাছিল। দুটা সম্প্ৰদায়ে একেলগে সম্প্ৰীতিতৰে বাস কৰি আহিছে। এইটোৱে প্ৰমাণ কৰে যে অনুষ্ঠান শোভাযাত্ৰাৰ নামত বাহিৰৰ লোকে আয়োজন কৰিছিল।
আমাৰ ওচৰত এইটোও তথ্য আছে যে পুৰুষ আৰক্ষীয়ে নিশা চি ব্লকৰ ঘৰত অভিযান চলাই মহিলাসকলৰ গাত হাত দিয়াৰ লগতে প্ৰহাৰ কৰিছিল। এইটোৱে পুৰুষ আৰক্ষী কৰ্মীসকলক এগৰাকী মহিলাক স্পৰ্শ কৰিবলৈ নিষেধ কৰা সকলো মৰ্যাদা তথা নিয়ম ভংগ কৰিছে।
তদুপৰি, ১৭ তাৰিখে যেতিয়া আমাৰ সদস্যসকলে আনসকলৰ সৈতে জাহাংগীৰপুৰী আৰক্ষী থানাত অতিৰিক্ত ডিচিপি কিষেণ কুমাৰক সাক্ষাৎ কৰিছিল, তেওঁলোকে দেখি আচৰিত হৈছিল যে বিজেপিৰ নেতাসকলে থানাৰ চৌহদৰ ভিতৰত এখন সংবাদমেল অনুষ্ঠিত কৰি আছে। এইটো অত্যন্ত বিৰল আৰু বৰ্তমানৰ গোচৰটোত আৰক্ষীৰ ভূমিকা সম্পূৰ্ণৰূপে পক্ষপাতদুষ্ট হোৱাৰ আশংকা শক্তিশালী কৰে।
এই পত্ৰখন হৈছে আপোনাক সেই আৰক্ষী কৰ্মীসকলৰ বিৰুদ্ধে ব্যৱস্থা ল’বলৈ আহ্বান জনোৱা (১) যিসকলে শোভাযাত্ৰাটোক অস্ত্ৰ-শস্ত্ৰ কঢ়িয়াবলৈ অনুমতি দিছিল (২) যিসকল পৰ্যাপ্ত ব্যৱস্থাৰ গ্ৰহণত দায়বদ্ধ আছিল (৩) যিয়ে শোভাযাত্ৰাটো মছজিদৰ সন্মুখত ৰ’বলৈ অনুমতি দিছিল, আৰু (৪) যিসকলে একপক্ষীয় পক্ষপাতদুষ্ট তদন্ত চলাই আছে। আপুনি কৈছে যে দুয়োটা সম্প্ৰদায়ৰ লোকক গ্ৰেপ্তাৰ কৰা হৈছে। আমি সেই সকলো দোষীক গ্ৰেপ্তাৰ আৰু শাস্তিৰ পক্ষত আছো। অৱশ্যে বেছিভাগ গ্ৰেপ্তাৰ সংখ্যালঘু সম্প্ৰদায়ৰ হৈছে যদিও ঘটনাপ্ৰবাহে দেখুৱায় যে ঘটনাটোত মূল উচটনি আৰু পৰিকল্পনা সেই সংগঠনটোৱে কৰিছিল যিয়ে শোভাযাত্ৰাটো আয়োজন কৰিছিল আৰু আৰক্ষীয়ে কোৱা অনুসৰি সেইটো বজৰং দলৰ সহযোগী আছিল।
যি অপৰাধ শাখাক তদন্তটো হস্তান্তৰ কৰা হৈছে সেইটো আৰক্ষী বাহিনীৰ সামগ্ৰিক কৰ্তৃত্বৰ অধীনত আছে যি জাহাংগীৰপুৰীৰ ঘটনাৰ ক্ষেত্ৰত দায়বদ্ধ। সেয়েহে চিপিআই(এম)য়ে নিৰ্দিষ্ট সময়সীমাৰ ভিতৰত ন্যায়িক তদন্ত/নিৰপেক্ষ তদন্তৰ দাবী জনাইছে। ইয়াৰ লগতে আমি আপোনাক দায়ী আৰক্ষীৰ বিৰুদ্ধে ব্যৱস্থা গ্ৰহণ কৰিবলৈ অনুৰোধ জনাইছো।
