কেন্দ্ৰ নাগৰিকত্ব বিধেয়ক গ্ৰহণৰ বাবে সাজু হোৱাৰ লগে লগে আছুৱে শনিবাৰে উজনিৰ পৰা নামনিলৈকে সমগ্ৰ অসমজুৰি শাসকীয় নেতাক খেদা ধৰা দেখা গৈছে।
নলবাৰীত এক সভাত ভাগ ল’বলৈ যোৱা অগপৰ মুখপাত্ৰ দিলীপ পাটগিৰীক আছুকৰ্মীয়ে চহৰৰ পৰা পিছ লৈ আহি বিদ্যাপুৰত আবদ্ধ কৰে।
কেইবাশও আছুকৰ্মীয়ে পথতে আবদ্ধ কৰা নেতাজন বিধেয়কবিৰোধীসকলৰ তীব্ৰ প্ৰতিবাদৰ সন্মুখীন হয়।
ছাত্র সন্থাৰ দলে তেখেতৰ বাহনত আগুচি ধৰি নিলাজ মন্ত্ৰী অতুল বৰা হায় হায়, জাতিৰ দালাল অতুল বৰা হায় হায়, দিল্লীৰ ওচৰত আঁঠু লোৱা অতুল বৰা হুঁচিয়াৰ, কেবৰ সমৰ্থনত থিয় দিয়া মন্ত্ৰী অতুল-কেশৱ-ফণী হায় হায় আদি ধ্বনিৰে পৰিৱেশ উত্তাল কৰে।
প্ৰতিবাদকাৰীসকলে পথৰ ওপৰতে বিধেয়ক সম্বন্ধত অগপ মুখপাত্ৰজনৰ স্পষ্টীকৰণ বিচাৰে।
“অতুল বৰাৰ ভাষ্য দলীয় ভাষ্য নহয়। কেব বিৰোধিতাত দলৰ স্থিতি অটল আছে,” দিলীপ পাটগিৰিয়ে আছুকৰ্মীসকলক জনায়।
ইফালে আছুৰ ক্ষোভৰ উমান পাই দলটোৰ সাধাৰণ সম্পাদক ৰমেন্দ্ৰ নাৰায়ণ কলিতা আদবাটৰ পৰাই গুৱাহাটীলৈ উভটি যায়।
ইফালে নলবাৰীত অগপৰ ২০খন আঞ্চলিকে কেব বিৰোধিতাৰ প্ৰস্তাৱ লৈ পাটগিৰীৰ জৰিয়তে কেন্দ্ৰীয় নেতৃত্বলৈ প্ৰেৰণ কৰিছে।
আঞ্চলিক দলটোৰ নলবাৰী সমষ্টিৰ সমিতিখন নতুনকৈ গঠন কৰাৰ উদ্দেশ্যে অনুষ্ঠিত সভাতে এই প্ৰস্তাৱ লোৱা হয়।
অগপৰ ২০খন আঞ্চলিকে একেলগে দলটোৰ শীৰ্ষ নেতৃত্বৰ বিৰুদ্ধে মুকলিকৈ মুৰ্দাবাদ ধ্বনি দিয়ে।
জাতিধ্বংসী নাগৰিকত্ব সংশোধনী বিধেয়কক লৈ কৌশলী স্থিতি লোৱা দলটোৰ শীৰ্ষস্থানৰ আৰু মন্ত্ৰীসভাত মন্ত্ৰিত্ব লৈ থকা তিনিজন নেতা ক্ৰমে অতুল বৰা, কেশৱ মহন্ত আৰু ফণীভূষণ চৌধুৰীৰ বিৰুদ্ধে বিদ্ৰোহ ঘোষণা কৰে।
