বৰপেটা লোকসভা সমষ্টিত আজি কেইবাগৰাকী প্ৰাৰ্থীয়ে মনোনয়ন পত্ৰ দাখিল কৰে ৷ প্ৰথমে অগপ, বি পি এফ আৰু বিজেপি মিত্ৰজোটৰ প্ৰাৰ্থী কুমাৰ দীপক দাসে সহস্ৰাধিক সমৰ্থকক লগতলৈ মনোনয়ন পত্ৰ দাখিলৰ বাবে বৰপেটা পৌৰসভাৰ পৰা ৰাওনা হয় উপায়ুক্ত কাৰ্যালয়ত ৰিটাৰ্নিং বিষয়াৰ হাতত মনোনয়ন দাখিল কৰে।
প্ৰাৰ্থীগৰাকীক সংগ দিয়ে অগপৰ সভাপতি তথা মন্ত্ৰী অতুল বৰা, ৰাজ্যিক বিজেপিৰ সভাপতি ৰঞ্জিত কুমাৰ দাস, মন্ত্ৰী চন্দ্ৰমোহন পাটোৱাৰী, সাংসদ বিশ্বজিৎ দৈমাৰী, বিধায়ক গুণীন্দ্ৰ নাথ দাস, আৰু পবিন্দ্ৰ ডেকাৰ লগতে ভালেসংখ্যাক দলীয় নেতা-কৰ্মী।
আনহাতে, দুপৰীয়া প্ৰায় ১ বজাত এ আই য়ু ডি এফৰ প্ৰাৰ্থী ড° হাফিজ ৰফিকুল ইছলামে উত্তৰ বৰপেটাস্থিত এ আই ইউ ডি এফৰ কাৰ্যালয়ৰ পৰা কেইবাহাজাৰ সমৰ্থকেৰে সমদল কৰি আহি মনোনয়ন দাখিল কৰে। মনোনয়ন দাখিলৰ সময়ত প্ৰাৰ্থীগৰাকীৰ সৈতে এ আই য়ু ডি এফৰ মুৰব্বী বদৰুদ্দিন আজমল, সম্পাদক(প্ৰ) হাফিছ বছিৰ কাছিমী, বিধায়ক আমিনুল ইছলাম উপস্থিত থাকে৷
ৰিপাব্লিকান পাৰ্টি অফ ইণ্ডিয়া(এ)ৰ ৰেজাউল কৰিমেও আজি বহু সংখ্যক সমৰ্থকলৈ মনোনয়ন পত্ৰ দাখিল কৰে৷ বিয়লি প্ৰায় ২ বজাত কংগ্ৰেছ প্ৰাৰ্থী আব্দুল খালেকে মনোনয়ন পত্ৰ দাখিল কৰে। কংগ্ৰেছ প্ৰাৰ্থীগৰাকীৰ সৈতে প্ৰাক্তন মন্ত্ৰী ডা০ ভূমিধৰ বৰ্মন, প্ৰাক্তন মন্ত্ৰী বসন্ত দাসৰ লগতে বৰপেটা জিলাৰ পাঁচগৰাকী কংগ্ৰেছ বিধায়ক উপস্থিত থাকে৷
উল্লেখযোগ্য যে, ভাৰতীয় গণ পৰিষদৰ শান্তনু মুখাৰ্জীয়ে দলীয় সমৰ্থকক লগত লৈ মনোনয়ন পত্ৰ দাখিল কৰিবলৈ আহে যদিও নিৰ্ধাৰিত সময়তকৈ পলমকৈ উপস্থিত হোৱাৰ বাবে প্ৰাৰ্থীগৰাকীৰ মনোনয়ন পত্ৰ গ্ৰহণ নকৰিলে ৰিটাৰ্নিং বিষয়াই৷
