কাজিৰঙা ৰাষ্ট্ৰীয় উদ্যানৰ কহঁৰা ৰেঞ্জৰ বৰুণটিকা বনশিৱিৰ এলেকাত এটা মৃত ঢেকীয়াপতীয়া বাঘৰ মৃতদেহ উদ্ধাৰ হয়। বুধবাৰে বন কৰ্মীয়ে প্ৰত্যক্ষ কৰা মৃত বাঘটোৰ মৃত্যু প্ৰায় দুই সপ্তাহ পূৰ্বেই হোৱা বুলি অনুমান কৰিছে।
ইফালে মৃতদেহৰ খবৰ লাভ কৰাত উদ্যানখনৰ সঞ্চালক পেৰীয়াৰ স্বামী শিৱকুমাৰৰ নেতৃত্বত ডি এফ অ’ ৰোহিনী বল্লভ শইকীয়া, ৰাষ্ট্ৰীয় ব্যঘ্ৰ প্ৰাধিকাৰীৰ প্ৰতিনিধি, বেচৰকাৰী সংগঠনৰ প্ৰতিনিধি, সংবাদ মাধ্যমৰ প্ৰতিনিধি, পশু চিকিৎসক আৰু গৱেষণা বিষয়া সহ এটা দলে ঘটনাস্থলত উপস্থিত হৈ মৃতদেহটো উদ্ধাৰ কৰে।
সঞ্চালক জনৰ উপস্থিতিত পশু চিকিৎসক ডাঃ পানজিত বসুমতাৰী আৰু ডাঃ পৰিক্ষিত কলিতাই মৃত ঢেকীয়াপতীয়া বাঘটোৰ মৰণোত্তৰ পৰীক্ষা কৰে। মৰণোত্তৰ পৰীক্ষাত বাঘটোৰ শৰীৰত আন বাঘে কৰা আক্ৰমনৰ চিন স্পষ্ট ৰূপত পোৱা বুলি উল্লেখ কৰে।
প্ৰায় আঠ বছৰৰ বয়সৰ এই মতা বাঘটো অন্য বাঘৰ সৈতে হোৱা পাৰস্পৰিক যুঁজতেই মৰা বুলি মৰোণত্তৰ পৰীক্ষাত প্ৰমাণিত হয়। তদুপৰি সকলোৰে উপস্থিতিত ৰাষ্ট্ৰীয় ব্যঘ্ৰ সংৰক্ষণ প্ৰাধিকাৰীৰ নিৰ্দেশ অনুসৰী বাঘটোৰ দাহন কাৰ্যও সম্পূৰ্ণ কৰা হয়।
ইফালে বাঘটোৰ শৰীৰৰ অৱশিষ্ট চালত পোৱা তথ্যৰ পৰা বাঘটো চিনাক্ত কৰণৰ কামো আৰম্ভ কৰিছে ৰাষ্ট্ৰীয় উদ্যানখনৰ গৱেষণা বিষয়া ৰবীন্দ্ৰ ৰবীন্দ্ৰ শৰ্মাই।
