চৰকাৰৰ সংখ্যাগৰিষ্ঠতা প্ৰমাণৰ দিনাই বিহাৰত আৰজেডি নেতাৰ গৃহত চিবিআইৰ অভিযান
আজি বিহাৰ বিধানসভাত চৰকাৰৰ সংখ্যাগৰিষ্ঠতা প্ৰমাণ কৰিব নীতিশ কুমাৰৰ জেডিইউ আৰু তেজস্বী যাদৱ নেতৃত্বাধীন আৰজেডি- ৰ মিত্ৰজোঁটৰ চৰকাৰে। সংখ্যাগৰিষ্ঠতা প্ৰমাণৰ বাবে সাজু হোৱাৰ সময়তে কেন্দ্ৰীয় তদন্ত সংস্থা চিবিআই- ৰ তালাচী চলিছে ৰাষ্ট্ৰীয় জনতা দলৰ দুজন জ্যেষ্ঠ নেতাৰ ঘৰত।
ইউপিএ চৰকাৰৰ সময়ত ৰে’ল মন্ত্ৰী হিচাপে কাৰ্যনিৰ্বাহ কৰা আৰজেডিৰ মুৰব্বী লালু প্ৰসাদ যাদৱৰ কাৰ্যকালত চাকৰিৰ বাবে ভূমি সংগ্ৰহৰ যি অনিয়মৰ অভিযোগ উত্থাপন হৈছিল, সেই গোচৰ সন্দৰ্ভতে চিবিআই- এ আৰজেডি নেতা দুগৰাকীৰ গৃহত অভিযান চলাইছে।
আজি পুৱা চিবিআইৰ এটা অনুসন্ধানকাৰী দল আৰজেডিৰ ৰাজ্যসভাৰ সাংসদ আহমেদ আশফাক কৰিম আৰু বিহাৰৰ বিধান পৰিষদৰ সদস্য সুনীল সিঙৰ ঘৰত উপস্থিত হয়।
চিবিআইৰ তালাচীৰ পিছতে সুনীল সিঙে এয়া বিজেপিয়ে ইচ্ছাকৃতভাৱে ষড়যন্ত্ৰ কৰা বুলি অভিযোগ কৰে। নতুন চৰকাৰৰ অংশীদাৰ আৰজেডিৰ বিধায়কসকলক ভীতিগ্ৰস্ত কৰি বিজেপিৰ সৈতে যোগ দিবলৈ বাধ্য কৰোৱাৰ উদ্দেশ্যেই বিজেপিয়ে এই তালাচী চলাইছে বুলি সিঙে অভিযোগ কৰে।
ইফালে আৰজেডিৰ এজন মুখপাত্ৰই যোৱা নিশা এক টুইট যোগে বিহাৰত ক্ষমতা হেৰুওৱাৰ ক্ষোভত বিজেপিয়ে চিবিআই আৰু অন্যান্য কেন্দ্ৰীয় সংস্থাসমূহৰ দ্বাৰা অভিযানৰ বাবে প্ৰস্তুতি চলাইছে বুলি অভিযোগ কৰিছিল।
উল্লেখ্য যে চলিত বছৰৰ মে’ মাহত লালু যাদৱ আৰু তেওঁৰ পৰিয়ালৰ কেইবাগৰাকীও সদস্যক ২০০৪ ৰ পৰা ২০০৯ চনৰ ভিতৰত ৰে’লৱে চাকৰিৰ নিযুক্তিত অনিয়মত জড়িত থকাৰ অভিযোগ উত্থাপন কৰি দুৰ্নীতিৰ গোচৰত অভিযুক্ত কৰা হৈছিল।
চিবিআই- এ লালু প্ৰসাদ যাদৱ আৰু তেওঁৰ পৰিয়ালৰ সদস্যসকলে ৰেলৰ চাকৰি দিয়াৰ বাবে উৎকোচ হিচাপে ভূমি আৰু সম্পত্তি লাভ কৰিছিল বুলি অভিযোগ কৰিছিল।
বিগত জুন মাহত চিবিআইয়ে গোচৰটোৰ সন্দৰ্ভত লালু যাদৱৰ সহযোগী ভোলা যাদৱক গ্ৰেপ্তাৰ কৰিছিল। চিবিআইৰ সূত্ৰই জনোৱা মতে ভোলা যাদৱক জেৰাৰ সময়ত পোহৰলৈ অহা তথ্যৰ আধাৰতে শেহতীয়া অভিযান চলোৱা হৈছে।