মঙলবাৰে কেন্দ্ৰীয় তদন্তকাৰী সংস্থাই চিবিআইৰ দুৰ্নীতি বিৰোধী শাখাই অসমৰ গুৱাহাটী, যোৰহাট, শিৱসাগৰকে ধৰি উত্তৰাখণ্ডৰ ডেহৰাডুনত এক দুৰ্নীতি বিৰোধী গোচৰত অভিযান চলায় ২০ কোটিৰ অধিক সম্পত্তি জব্দ কৰিছে।
এক বিশেষ সূত্ৰই জনোৱা মতে, চিবিআইৰ দুৰ্নীতি বিৰোধী শাখাৰ এটা দলে অসমৰ গুৱাহাটী, যোৰহাট আৰু শিৱসাগৰত অ’এনজিচিৰ স্বাস্থ্য সেৱাৰ, উপ সঞ্চালক ডাঃ বিজয় কুমাৰ শ্ব’ৰ গুৱাহাটীৰ, যোৰহাট আৰু শিৱসাগৰৰ বাসগৃহৰ লগতে অ’এনজিচিৰ ঠিকাভিত্তিক স্বাস্থ্য বিষয়া ডাঃ ইশিতভা তামুলী আৰু যদুমণি হাজৰিকা নামৰ লোকজনৰ যোৰহাট চিনামৰাস্থিত মেচাৰ্ছ পিজিঅ’থেৰাপি ক্লিনিকতো অভিযান চলাই প্ৰায় ২০ কোটি টকাৰ সম্পত্তি জব্দ কৰে।
এই একেটা গোচৰৰ সন্দৰ্ভত একে সময়তে উত্তৰাখণ্ডৰ ডেৰাডুনত অভিযান চলাইছিল চিবিআইৰ দুৰ্নীতি বিৰোধী শাখাৰ আন এটা দলে।
উল্লেখ্য যে যোৱা মে’ মাহতে অ’এনজিচি দিল্লীৰ হেড ক’ৰ্পৰেট ভিজিলেন্সৰ গ্ৰুপ জেনেৰেল মেনেজাৰ নিৰূপন মুখাৰ্জীৰ অভিযোগৰ ভিত্তিত চিবিআইৰ দুৰ্নীতি বিৰোধী শাখাই গোচৰ নং আৰচি-৬(এ)২০২৩ৰ এক গোচৰ ৰুজু কৰে।
সূত্ৰ অনুসৰি, উক্ত গোচৰ ভিত্তিতে চিবিআইৰ দুৰ্নীতি বিৰোধী শাখাই মংগলবাৰে এই তালাচী অভিযান চলায়।চিবিআইৰ দুৰ্নীতি বিৰোধী শাখাৰ চালাচী অভিযানত কেৱল প্ৰায় ২০ কোটি টকাৰ সম্পত্তি জব্দ কৰাই নহয় দুৰ্নীতিৰ মূল অভিযুক্ত ডাঃ শ্ব’ৰ গুৱাহাটীত ভূমিসহ ৭টা ঘৰ তথা ফ্লেটৰো সন্ধান লাভ কৰে। চিবিআইৰ দুৰ্নীতি বিৰোধী শাখাৰ অভিযান কালত এইটো স্পষ্ট হৈ পৰিছে যে এজাহাৰত উল্লেখ কৰাতকৈ ডাঃ বিজয় কুমাৰ শ্ব’ৰ সম্পত্তিৰ পৰিমাণ কে’বাগুণৰো অধিক।
সূত্ৰৰ মতে, অ’এনজিচিৰ যোৰহাটৰ বৃত্তিগত স্বাস্থ্যৰ ঠিকাভিত্তিক চিকিৎসা বিষয়া ডাঃ ইশিতভা তামুলী আৰু যোৰহাটৰ চিনামাৰাৰ মেচাৰ্ছ কিৰণ ফিজিঅ’থেৰাপি ক্লিনিকৰ স্বত্বাধিকাৰী যদুমণি হাজৰিকাৰ সৈতে মিলি ডাঃ শ্ব’ই অ’এনজিচিৰ অৱসৰপ্ৰাপ্তসকলৰ অজ্ঞাতে ফিজিঅ’থেৰাপি চিকিৎসাৰ বাবে প্ৰৱঞ্চনা আৰু জালিয়াতিৰ আশ্ৰয় লৈ ৰিকুইজিচন শ্লীপ উলিয়াই অ’এনজিচিৰ পৰা বিশাল পৰিমাণৰ ধন সৰকাই আহিছিল।
ইমানেই নহয় ডাঃ শ্ব’ৰ নেতৃত্বত এই চক্ৰটোৱে অ’এনজিচিৰ অৱসৰপ্ৰাপ্ত মৃত কৰ্মচাৰীসকলৰ নামটো জালিয়াতিৰ আশ্ৰয় লৈ ভুৱা বিল উলিয়াই অ’এনজিচিৰ পৰা ধন সৰকাই আহিছিল।
জানিব পৰা মতে ডাঃ শ্ব’ আৰু ডাঃ তামুলীয়ে মেচাৰ্ছ কিৰণ ফিজিঅ’থেৰাপি ক্লিনিকত একোজন অৱসৰপ্ৰাপ্ত মৃত কৰ্মচাৰীৰ বিপৰীতে দিনে দুবাৰকৈ ১৪ দিনৰ বাবে ফিজিঅ’থেৰাপি চিকিৎসা গ্ৰহণৰ বাবদ ভুৱা বিল প্ৰস্তুত কৰি ১৯,১৫,০৮০ টকা ধন সৰকাইছিল।
