বিজেপিৰ সৈতে পুনৰ মিত্ৰতাত আবদ্ধ হোৱাৰ পাছত আঞ্চলিক দল অসম গণ পৰিষদে এতিয়া আছুৰ সুৰতে সুৰ মিলাই ৰাজ্যখনৰ অবৈধ অনুপ্ৰৱেশৰ জটিল সমস্যাটো সমাধানৰ ক্ষেত্ৰত দায়বদ্ধ হোৱাৰ দাবী কৰিছে যদিও লগতে ইয়াৰ বাবে তেওঁলোকে কেন্দ্ৰত থকা চৰকাৰখনৰ সহায়ৰ প্ৰয়োজনীয়তাৰ কথাহে সদৰী কৰিছে।
দলৰ মুৰব্বীগৰাকীয়ে উল্লেখ কৰিছে যে দুটাকৈ কাৰ্যকালৰ বাবে শাসনত থকাৰ পাছতো অগপই অবৈধ অনুপ্ৰৱেশকাৰী বহিষ্কাৰ কৰিবলৈ সক্ষম নহ’ল আৰু কেন্দ্ৰৰহে অসম চুক্তি ৰূপায়নৰ ক্ষমতা আছে।
কংগ্ৰেছক ‘আজীৱন শত্ৰু’বুলি উল্লেখ কৰি সভাপতিগৰাকীয়ে ব্যক্ত কৰে যে বিজেপিৰ সৈতে পুনৰ মিত্ৰতাৰ সিদ্ধান্ত ‘আঞ্চলিক স্বাৰ্থ বিসৰ্জন অবিহনে’ গ্ৰহণ কৰা হৈছিল।
‘’আমি যদি কেন্দ্ৰত একে আদৰ্শৰ দলৰ সৈতে বুজাবুজি নকৰো, তেতিয়াহ’লে অসমৰ অবৈধ বিদেশীমুক্ত কৰাটো আমাৰ বাবে সম্ভৱ নহয়,’’ –দলৰ সভাপতি অতুল বৰাই এক বিবৃতিত এই কথা সদৰী কৰি লগতে উল্লেখ কৰে যে সেই একে কাৰণতে তেওঁলোকে লোকসভালৈ শক্তিশালী প্ৰাৰ্থী প্ৰেৰণ কৰাৰ প্ৰয়োজন আছে।
আছুৰ প্ৰাক্তন উপ সভাপতি মণি মাধৱ মহন্তই কালি আঞ্চলিক দলটোত যোগদান কৰে। দলৰ বৰ্তমান স্থিতিৰ কথা সদৰী কৰি বৰাই কয়,’’ দলৰ কৰ্মীসকলে সকলো মত পাৰ্থক্য পাহৰি এতিয়া অগপ-বিজেপি-বিপিএফ মিত্ৰজোঁটৰ প্ৰাৰ্থীৰ বিজয় নিশ্চিত কৰিবই লাগিব।‘’
‘’আমি প্ৰতিদ্বন্দ্বিতা কৰিব বিচৰা কলিয়াবৰ আৰু বৰপেটা সমষ্টিত আমাৰ দৃঢ়তা প্ৰদৰ্শন কৰিছো,’’ বুলি বৰাই আগন্তুক লোকসভা নিৰ্বাচনত প্ৰতিদ্বন্দ্বিতা কৰিব বিচৰা সমষ্টিৰ বিষয়ে ক’বলৈ গৈ লগতে ধুবুৰী সমষ্টিতো তেওঁলোকৰ প্ৰাৰ্থীক বিজয়ী কৰিবলৈ সঠিক ৰণ কৌশল প্ৰস্তুত কৰাৰ কথা ব্যক্ত কৰিছে।
