চৰকাৰী ধন ৰাহি আৰু অপব্যৱহাৰ ৰোধ কৰিবলৈ কেন্দ্ৰৰ নতুন নিয়ম: ‘এজন বিষয়া, এখন চৰকাৰী গাড়ী’
কেন্দ্ৰীয় চৰকাৰে চৰকাৰী বাহনৰ ব্যৱহাৰক লৈ কঠোৰ নিয়ম প্ৰৱৰ্তন কৰিছে। চৰকাৰী ধনৰ অপব্যৱহাৰ ৰোধ কৰিবলৈ চৰকাৰে এজন বিষয়া, এখন চৰকাৰী গাড়ী নীতি কাৰ্যকৰী কৰিছে। এই নতুন নিয়ম অনুসৰি, এতিয়াৰে পৰা শীৰ্ষ বিষয়াসকলে একাধিক চৰকাৰী বাহন ব্যৱহাৰ কৰিব নোৱাৰিব। আনকি কোনো বিষয়াই যদি আন কোনো মন্ত্ৰালয়, বিভাগ, ৰাজহুৱা খণ্ডৰ প্ৰতিষ্ঠান বা স্বায়ত্বশাসিত সংস্থাৰ অতিৰিক্ত দায়িত্ব লাভ কৰে, তেতিয়াও তেওঁক অতিৰিক্ত গাড়ী প্ৰদান কৰা নহ’ব। চৰকাৰী সম্পদৰ সঠিক ব্যৱহাৰ নিশ্চিত কৰাই হৈছে এই পদক্ষেপৰ মূল লক্ষ্য।
বিত্ত মন্ত্ৰালয়ৰ অধীনস্থ ব্যয় বিভাগে শেহতীয়াকৈ এক নিৰ্দেশনাযোগে সকলো কেন্দ্ৰীয় মন্ত্ৰালয় আৰু বিভাগক ষ্টাফ কাৰ ব্যৱহাৰৰ এই নতুন নীতি কঠোৰভাৱে পালন কৰিবলৈ নিৰ্দেশ দিছে। ২০২২ চনৰ ছেপ্টেম্বৰ মাহত চৰকাৰী বাহনৰ ব্যৱহাৰ সন্দৰ্ভত জাৰি কৰা নিৰ্দেশনাসমূহক অধিক শক্তিশালী কৰিবলৈ এই নতুন নিয়ম জাৰি কৰা হৈছে।
নতুন নিয়ম অনুসৰি, যিগৰাকী বিষয়াই ইতিমধ্যে এখন চৰকাৰী গাড়ী লাভ কৰিছে, তেওঁক অতিৰিক্ত দায়িত্বৰ দোহাই দি আন এখন বাহন আৱণ্টন কৰিব নোৱাৰিব। তাৰ পৰিৱৰ্তে, বিষয়াজনে তেওঁক আগতে প্ৰদান কৰা গাড়ীখনেই সকলো চৰকাৰী কামৰ বাবে ব্যৱহাৰ কৰিব লাগিব।
ইয়াৰ উপৰিও, কেন্দ্ৰীয় চৰকাৰৰ বিষয়াসকলক ৰাজহুৱা খণ্ডৰ প্ৰতিষ্ঠান, স্বায়ত্বশাসিত সংস্থা বা অৰ্ধ-চৰকাৰী সংস্থাৰ বাহন ব্যক্তিগত কামত ব্যৱহাৰ কৰাত বাধা আৰোপ কৰা হৈছে। অৱশ্যে চৰকাৰী কামত বা অনুমোদিত ভ্ৰমণৰ সময়ত এনে বাহন ব্যৱহাৰ কৰিব পাৰিব। মন্ত্ৰালয়সমূহক নিৰ্দেশ দিয়া হৈছে যে অতিৰিক্ত বা অব্যৱহৃত বাহনসমূহ বেচৰকাৰী কামত ব্যৱহাৰ কৰাৰ পৰিৱৰ্তে সুৰক্ষিত স্থানত ৰাখিব লাগিব।
ব্যয় বিভাগে জনোৱা মতে, প্ৰশাসনিক দক্ষতা বৃদ্ধি কৰা, চৰকাৰী সম্পদৰ অপব্যৱহাৰ ৰোধ কৰা আৰু চৰকাৰী পৰিবহণৰ ক্ষেত্ৰত হোৱা অদৰকাৰী খৰচ হ্ৰাস কৰাই হৈছে এই নতুন নিয়মৰ উদ্দেশ্য। এজন বিষয়া, এখন চৰকাৰী গাড়ী নীতিয়ে মন্ত্ৰালয় আৰু বিভাগসমূহত গাড়ীৰ পৰিচালনা সুশৃংখল কৰাৰ লগতে আৰ্থিক অনুশাসন বজাই ৰখাত সহায় কৰিব বুলি আশা কৰা হৈছে। চৰকাৰে পুনৰবাৰ স্পষ্ট কৰি দিছে যে সকলো বিভাগে এই নিয়মসমূহ কঠোৰভাৱে মানি চলিব লাগিব।