উৱেফা চেম্পিয়নচ্ লীগত যোৱা নিশা নিজ নিজ খেলত জয় সাব্যস্ত কৰিছে বেয়াৰ্ন মিউনিখ,মানচেষ্টাৰ ইউনাইটেডে।
যোৱা নিশা গ্ৰুপ F ৰ এখন খেলত মানচেষ্টাৰ ইউনাইটেডে পৰাস্ত কৰে স্পেনিছ ক্লাব ভিলাৰেলক। প্ৰথমাৰ্দ্ধ গলশূন্য ভাৱে সামৰণি পৰাৰ পিছত দ্বিতীয়াৰ্দ্ধৰ ৫৩ মিনিটত আলকাচেৰৰ গলেৰে অগ্ৰগতি লাভ কৰে ভিলাৰেলে।
অৱশ্যে ভিলাৰেলৰ অগ্ৰগতি দীৰ্ঘস্থায়ী নহ’ল। খেলৰ ৬০ মিনিটত টেলেচৰ গলেৰে সমতা স্থাপন কৰে ইউনাইটেডে। ইনজুৰি টাইমত তাৰকা ফুটবলাৰ ৰোনাল্ডোৱে ইউনাইটেডৰ হৈ নিৰ্ণায়ক গল স্ক’ৰ কৰি জয় কঢ়িয়াই আনে।
আনহাতে ইউক্ৰেইনৰ ক্লাব ডাইনামো কিভক ৫-০ গলত বিধ্বস্ত কৰি গ্ৰুপ E ৰ শীৰ্ষ স্থান অক্ষুন্ন ৰাখিছে বেয়াৰ্ন মিউনিখে। মিউনিখৰ হৈ লেৱাণ্ড’স্কিয়ে দুটা গল স্ক’ৰ কৰাৰ বিপৰীতে এটাকৈ গল স্ক’ৰ কৰে গিনেব্ৰি, চানে আৰু চুপৌ মুটিঙে।
উল্লেখ্য যে লেৱাণ্ড’স্কিয়ে আজি চেম্পিয়নচ্ লীগৰ ইতিহাসত তৃতীয় সৰ্বাধিক গলদাতাৰ সাফল্য অৰ্জন কৰে। এইক্ষেত্ৰত লেৱাণ্ড’স্কিৰ আগত কেৱল ৰোনাল্ডো আৰু মেছিয়েহে স্থান লাভ কৰিছে।
আনহাতে পৰাজয়ৰ মুখ দেখিছে ডিফেণ্ডিং চেম্পিয়ন চেলছিয়ে। আজি চেলছিক একমাত্ৰ গলত পৰাস্ত কৰে ইটালীয়ান ক্লাৱ জুভেণ্টাচে। খেলৰ ৪৬ মিনিটত জুভেণ্টাচৰ হৈ একমাত্ৰ গলটো স্ক’ৰ কৰে কিয়েজাই।
ক্ৰমাগত দ্বিতীয় পৰাজয়েৰে চেম্পিয়নচ্ লীগৰ পৰা বাহিৰ হোৱাৰ উপক্ৰম হৈছে এসময়ৰ শক্তিশালী দল বাৰ্চিলোনা। এসময়ত ক্লাব ফুটবলত দপদপাই থকা স্পেনিছ ক্লাবটো বৰ্তমান প্ৰায় দুৰ্বল হৈ পৰিছে। প্ৰথম মেচত বেয়াৰ্নৰ বিপক্ষে ৩-০ গলত পৰাস্ত হোৱা বাৰ্চিলোনাক আজি পুনৰ ৩-০ গলত পৰাস্ত কৰে বেনিফিকাই।
পৰ্তুগীজ ক্লাবটোৰ হৈ ৩ মিনিটতে নুনেজে গলৰ পাতনি মেলাৰ পিছত ৬৯ মিনিটত ৰাফা ছিলভাই দলৰ হৈ দ্বিতীয়টো গল দিয়ে। খেলৰ ৭৯ মিনিটত নুনেজে দলৰ হৈ তৃতীয় তথা ব্যক্তিগত দ্বিতীয় গলটো স্ক’ৰ কৰে।
