বিটিআৰত “বড়োলেণ্ড দক্ষতা নিযুক্তি আৰু উদ্যোগ বিকাশ অভিযান” মিছন মুকলি

বিটিআৰ এলেকাৰ নিবনুৱা যুৱক- যুৱতী সকলক আত্ম সংস্থাপন কৰাৰ লক্ষ্যৰে প্ৰমোদ বড়ো নেতৃত্বাধীন ইউপিপিএল,বিজেপি আৰু জি এচ পি মিত্ৰজোটৰ চৰকাৰখনে আজি কোকৰাঝাৰত “বড়োলেণ্ড দক্ষতা নিযুক্তি আৰু উদ্যোগ বিকাশ অভিযান” নামৰ এক মিছন মুকলি কৰে ৷

এই উপলক্ষে কোকৰাঝাৰ চহৰৰ চান্দামাৰীস্থিত বড়োফা সাংস্কৃতিক প্ৰকল্পত আজি আয়োজিত হোৱা এক আড়ম্বৰপূৰ্ণ অনুষ্ঠানত মুখ্য অতিথি হিচাপে অসম চৰকাৰৰ পৰিবহণ, ঔদ্যোগিক আৰু বাণ্যিজ্য দপ্তৰৰ মন্ত্ৰী চন্দ্ৰমোহন পাটোৱাৰী উপস্থিত থাকি বিটিআৰত “বড়োলেণ্ড দক্ষতা নিযুক্তি আৰু উদ্যোগ বিকাশ অভিযান মিছনটো বন্তি প্ৰজ্বলনেৰে আনুষ্ঠানিক মুকলি কৰে ৷

মুকলি অনুষ্ঠানৰ অন্তঃত সাংবাদিকৰ আগত মন্ত্ৰী চন্দ্ৰমোহন পাটোৱাৰীয়ে আজি মুকলি হোৱা দক্ষতা বিকাশৰ মিছনটো বাস্তৱত কাৰ্যকৰী সফল হলে বিটিআৰ অঞ্চলৰ নিবনুৱা যুৱক- যুৱতী সকলক বিভিন্ন দিশত স্বাৱলম্বী আৰু আত্ম সংস্থাপনত প্ৰাধান্য পাব বুলি উল্লেখ কৰে ৷

তেওঁ বিটিআৰত প্ৰমোদ বড়ো নেতৃত্বাধীন পৰিষদীয় চৰকাৰখনে ভাল কাম কৰা বুলিও শলাগ লয় ৷ মন্ত্ৰীগৰাকীয়ে আজি মিছন মুকলি অনুষ্ঠানত কোকৰাঝাৰ বিনেশ্বৰ ব্ৰহ্ম অভিযান্ত্ৰিক মহাবিদ্যালয়কে ধৰি বিভিন্নজনে উপস্থাপন কৰা প্ৰজেক্টৰ প্ৰশংসা কৰে ৷

উল্লেখ্য যে, বিটিআৰ চৰকাৰৰ উদ্যোগত আয়োজিত হোৱা বড়োলেণ্ড দক্ষতা নিযুক্তি আৰু উদ্যোগ বিকাশ অভিযানৰ মুকলি অনুষ্ঠানত বিটিআৰৰ কাৰ্যবাহী সদস্যদ্বয় ড° নিলোৎ স্বৰ্গিয়াৰী আৰু উইলচন হাসদা, গোসাইগাওঁৰ বিধায়ক জিৰন বসুমতাৰী, বিটিচিৰ সচিৱ প্ৰধান শান্তনু পি গোটমাৰ, বড়োলেণ্ড বিশ্ববিদ্যালয়ৰ উপাচাৰ্য লাইশ্ৰাম লাড্ডু সিঙ আৰু বহুতো দক্ষতা বিকাশ প্ৰশিক্ষিত নিবনুৱা যুৱ যুৱতী উপস্থিত থাকে ৷

উল্লেখ্য যে “বড়োলেণ্ড দক্ষতা নিযুক্তি আৰু উদ্যোগ বিকাশ অভিযান” মিছনটোৰ মাধ্যমেদি বিটিআৰত পাচঁটা আদৰ্শ প্ৰশিক্ষণ কেন্দ্ৰ স্থাপন কৰা আৰু ৫০ হেজাৰ নিবনুৱা যুৱক- যুৱতীক সামৰি লোৱা হব বুলি জনা গৈছে৷