ChatGPTৰ আগমনৰ পিছতে এইবাৰ সাধাৰণ মানুহে চাকৰি হেৰুৱাব বুলি তীব্ৰ জল্পনা-কল্পনাৰ সৃষ্টি হৈছিল। কৃত্ৰিম বুদ্ধিমত্তাই মানুহৰ চাকৰি কাঢ়ি নিব। সেই জল্পনা-কল্পনাৰ মাজতে কোম্পানীটোৰ চিইঅ’ ছেম অল্টমেনক চাকৰিৰ পৰা বৰ্খাস্ত কৰা হৈছে। শুকুৰবাৰে অ’পেনএআইয়ে (OpenAI) চিইঅ’ ছেম অল্টমেনক অপসাৰণ কৰে। কোম্পানীটোৰ মতে, তেওঁৰ দক্ষতাৰ ওপৰত এতিয়া কোম্পানীটোৰ আস্থা নাই।
২০২২ চনত ChatGPT মুক্তি পোৱাৰ পিছত টেক জগতত বিখ্যাত হৈ পৰিছিল ছেম অল্টমেন (৩৮)। ষ্টেনফৰ্ড বিশ্ববিদ্যালয়ৰ ড্ৰপআউট গৰাকীয়ে ১৯ বছৰ বয়সতে লুপ্ট নামৰ এটা মোবাইল এপ্লিকেচন তৈয়াৰ কৰিছিল। ই আছিল এটা লোকেশ্যন ভিত্তিক ছ’চিয়েল নেটৱৰ্কিং চাইট। তাৰ পিছত ২০১৪ চনলৈকে তেওঁ ৰেডিটৰ চিইঅ’ আছিল। ২০২২ চনৰ নৱেম্বৰ মাহত আৰম্ভ হোৱাৰ পৰাই চাটজিপিটিৰ পৰিচিত মুখ আছিল ছেম অল্টমেন।
OpenAI সংস্থাৰ ব’ৰ্ডৰ মতে, কেইবালানিও পৰ্যালোচনাৰ অন্তত এই সিদ্ধান্ত লোৱা হৈছে। ব’ৰ্ডৰ সিদ্ধান্ত, অল্টমেনে কেতিয়াও নিজৰ বক্তব্যত দৃঢ়তাৰে থিয় দিয়া নাছিল। ই তেওঁৰ কাম আৰু দায়িত্বত প্ৰভাৱ পেলাইছিল।
ইফালে, অল্টমেনক কোম্পানীটোৰ পৰা বহিষ্কাৰ কৰাৰ কিছু সময়ৰ পিছতে ওপেনএআইৰ সহ-প্ৰতিষ্ঠাপক তথা সভাপতি গ্ৰেগ ব্ৰকমেনেও কোম্পানীটোৰ পৰা পদত্যাগ কৰে। এক্স হেণ্ডেলত তেওঁ লিখিছে, “৮ বছৰৰ আগতে মোৰ এপাৰ্টমেণ্টৰ পৰা আৰম্ভ কৰি আমি একেলগে যি নিৰ্মাণ কৰিছো তাক লৈ মই অত্যন্ত গৌৰৱান্বিত। আমি একেলগে বহু কঠিন আৰু ভাল সময় পাৰ কৰিছো। এই সফলতা লাভ কৰাটো অসম্ভৱ আছিল, তথাপিও আমি ইমানখিনি লাভ কৰিছো। কিন্তু আজিৰ খবৰৰ পিছত মই পদত্যাগ ঘোষণা কৰিছো।”
লগতে পঢ়কঃআত্মশ্লাঘা! ফাইনেলত অষ্ট্ৰেলিয়া ৪৫০/২, ভাৰত ৬৫ৰানত অল আউট; ভৱিষ্যদ্বাণী মিচেল মাৰ্ছৰ
অল্টমেনক মুখ্য কাৰ্যবাহী বিষয়াৰ পৰা বৰ্খাস্ত কৰাৰ পিছত সদ্যহতে কোম্পানীটোৰ আভ্যন্তৰীণ মুখ্য কাৰ্যবাহী বিষয়া হিচাপে নিযুক্তি দিয়া হৈছে মীৰা মূৰ্তিক।
