New GST Rates: নতুন জিএছটি হাৰ আজিৰে পৰা কাৰ্যকৰী হ’ব। জিএছটি পৰিষদৰ পূৰ্বৱৰ্তী বৈঠকত একাধিক সামগ্ৰীৰ ওপৰত কৰ ৰেহাইৰ সুবিধা প্ৰত্যাহাৰ কৰা হৈছিল। ফলত এই সামগ্ৰীবোৰৰ মূল্য আজিৰে পৰা বৃদ্ধি পাব।
পেকেট যুক্ত আৰু লেবেল যুক্ত খাদ্য সামগ্ৰীৰ ওপৰত পাঁচ শতাংশ জিএছটি আৰোপ কৰা হ’ব। ইয়াৰ ফলত, পেকেট যুক্ত মৌ, দৈ, লাচি, বাটাৰমিল্ক, মাছ, মাংস, মাখন, কৰ্ণফ্লেক্সৰ মূল্য বৃদ্ধি হ’ব।
পূৰ্বে কেৱল ব্ৰেণ্ডেড ময়দা আৰু চাউলত পাঁচ শতাংশ জিএছটি ধাৰ্য কৰা হৈছিল। কিন্তু এতিয়াৰ পৰা ব্ৰেণ্ডেড নহ’লেও পেকেট যুক্ত আৰু লেবেল যুক্ত ময়দা আৰু চাউলৰ ওপৰত জিএছটি আৰোপ কৰা হ’ব। ফলত পেকেট আৰু লেবেল যুক্ত ময়দা আৰু চাউলৰ মূল্য বৃদ্ধি হ’ব।
এলইডি লেম্প, লাইট, ধাতু বৰ্তনীত জিএছটি ১২ শতাংশৰ পৰা ১৮ শতাংশলৈ বৃদ্ধি পাইছে। তদুপৰি ১২ শতাংশৰ পৰিৱৰ্তে পথ, দলং, ৰে’ল, মেট্ৰ’, তাপবিদ্যুৎ কেন্দ্ৰৰ চুক্তিৰ ওপৰতো ১৮ শতাংশ জিএছটি আৰোপ কৰা হ’ব।
চামৰাৰ সামগ্ৰী জোতা, মাটিৰ ইটা, ছলাৰ ৱাটাৰ হিটাৰ আৰু চিষ্টেম, ই-ৱেষ্ট, পেট্ৰ’লিয়াম, মিথেনৰ ওপৰত আৰোপ কৰা জিএছটিও ১৮ শতাংশলৈ বৃদ্ধি পাইছে। পলিচ কৰা হীৰাৰ ওপৰত জিএছটি ১.৫ শতাংশলৈ বৃদ্ধি পাইছে।
চেক জাৰী কৰাৰ বাবে বেংকে লোৱা মাচুলৰ ওপৰতো জিএছটি আৰোপ কৰা হ’ব। প্ৰতিদিনে ১,০০০ টকাতকৈ কম হাৰৰ হোটেলৰ কোঠাৰ ওপৰত ১২ শতাংশ কৰ আৰোপ কৰা হ’ব।
পাম্প, ডিপ টিউবৱেলৰ টাৰ্বাইন পাম্প, চাবমাৰ্চিবল পাম্প, চাইকেল পাম্পৰ ওপৰত জিএছটি ১২ শতাংশৰ পৰা ১৮ শতাংশলৈ বৃদ্ধি কৰা হৈছে।
বীজ, মাহজাতীয় শস্য, পৰিষ্কাৰ কৰা যন্ত্ৰ, ক্ৰেছিং মিলত ব্যৱহৃত যন্ত্ৰপাতিৰ ওপৰত জিএছটিৰ হাৰ ৫ ৰ পৰা ১৮ শতাংশলৈ বৃদ্ধি কৰা হৈছে।
ছপা, অংকন আৰু লিখা চিঁয়াহীৰ দাম বৃদ্ধি হ’ব। আগতে এই সামগ্ৰীৰ ওপৰত জিএছটিৰ হাৰ আছিল ১২ শতাংশ। এইবাৰ হ’ব ১৮ শতাংশলৈ বৃদ্ধি হ’ব।
চুৰী, পেঞ্চিল শ্বেৰ্পনাৰ, ব্লেড, চামুচৰ ওপৰত আৰোপ কৰা জিএছটিৰ হাৰো ১২ শতাংশৰ পৰা ১৮ শতাংশলৈ বৃদ্ধি পাইছে।
