বুধবাৰে ছত্তীশগড়ত মাওবাদীয়ে সংঘটিত কৰা ইম্প্ৰভাইজড এক্সপ্ল’ছিভ ডিভাইচ (আই ই ডি) বিস্ফোৰণত দহজন নিৰাপত্তাৰক্ষী আৰু এজন চালকৰ মৃত্যু হোৱা বুলি জানিব পৰা গৈছে।
ছত্তিশগড়ৰ দন্তেৱাড়াৰ অৰণপুৰ অঞ্চলত এই ভয়ংকৰ কুটাঘাত সংঘটিত হৈছে।
সাংবাদিকৰ সৈতে হোৱা এক সাক্ষাৎকাৰত ছত্তীশগড়ৰ মুখ্যমন্ত্ৰী ভূপেশ বাঘেলে কয়, ‘এনে খবৰ লাভ কৰাটো বৰ দুখৰ কথা। শোকসন্তপ্ত পৰিয়ালবৰ্গলৈ সমবেদনা জ্ঞাপন কৰিলোঁ। এই যুঁজখন শেষ পৰ্যায়ত। নক্সালক ৰেহাই দিয়া নহ’ব।”
সূত্ৰ অনুসৰি অৰণপুৰত মাওবাদীৰ উপস্থিতিৰ খবৰৰ ভিত্তিত ডি আৰ জিৰ এটা দল মাওবাদী বিৰোধী অভিযান চলাবলৈ গৈছিল। দলটোৱে এখন বাহনত নিজৰ মুখ্য কাৰ্যালয়লৈ উভতি আহি থকা অৱস্থাত অৰণপুৰ পথত স্থাপন কৰি থোৱা এটা আই ই ডি বিস্ফোৰণত ১১ জন জোৱান নিহত হয়।
উল্লেখ্য যে চলিত মাহৰ আৰম্ভণিতে চি আৰ পি এফে প্ৰদান কৰা তথ্য অনুসৰি মাওবাদীয়ে নিজৰ কৌশল সলনি কৰি একক এম্বুছত কম জোৱানক লক্ষ্য কৰি ল’বলৈ আৰম্ভ কৰিছে। বাহিনীটোৱে কয় যে মাওবাদীয়ে এটা আক্ৰমণত বৃহৎ সংখ্যক জোৱানক আক্ৰমণ কৰাৰ পৰিৱৰ্তে কম সংখ্যক লোকক বিচাৰি পালে তেওঁলোকক লক্ষ্য কৰি ল’বলৈ আৰম্ভ কৰিছে।
এজন বিষয়াই কয় যে মাওবাদীসকলেও নিজৰ অস্ত্ৰ–শস্ত্ৰ উন্নীত কৰিছে, আৰু তেওঁলোকে এতিয়া ইম্প্ৰভাইজড এক্সপ্ল’ছিভ ডিভাইচ (আই ই ডি) ব্যৱহাৰ কৰিছে, যিটো চিন্তাৰ বিষয়।
মাৰ্চ মাহত ছত্তীশগড়ৰ চুকমা জিলাত মাওবাদীৰ সৈতে হোৱা মুখামুখিৰ সময়ত তিনিজন নিৰাপত্তাৰক্ষী নিহত হৈছিল। পথ নিৰ্মাণৰ কামত নিৰাপত্তাৰ আৱৰণ দিবলৈ সেই অঞ্চললৈ গৈছিল চি আৰ পি এফৰ জোৱান সকল। চুকমাৰ কুণ্ডে আৰু জাগৰগুণ্ডাৰ মাজৰ অঞ্চলৰ জংঘলত নিৰাপত্তাৰক্ষীৰ যৌথ দলে তালাচী চলাই থকা অৱস্থাত এই ঘটনা সংঘটিত হৈছিল।
