“এই মায়াৰ ধৰাত দুদিন মাথোঁ থাকিবা তুমি… মায়াৰ পৰিধি ভাঙি মুক্তিৰ পথেৰে পাখি মেলি উৰি গ’ল জুবিন।” আজি অসমৰ প্ৰত্যেকৰ হৃদয়ত বাজি উঠিছে এই গীতসমূহ। জনপ্ৰিয় অসমীয়া কণ্ঠশিল্পী জুবিন গাৰ্গৰ ৫২ বছৰৰ বয়সত এই অকস্মিক বিয়োগে উকা কৰি গ’ল অসমৰ সংগীত জগত। এতিয়া হৈ পৰিল ইতিহাস সেই সুকোমল শব্দ।
জুবিন গাৰ্গৰ জীৱন আছিল সংগীতৰ এক অবিস্মৰণীয় যাত্ৰা। জুবিনে জীৱনৰ প্ৰথম গুৰু বুলি নিজৰ মাতৃকেই বিবেচনা কৰিছিল। গুৰু ৰবীন বেনাৰ্জীৰ পৰা তবলা শিক্ষাৰে সংগীতৰ পথত পদাৰ্পণ কৰাৰ পিছত গুৰু ৰমণী ৰায়ৰ ওচৰত অসমীয়া লোকসংগীতৰ জ্ঞান অৰ্জন কৰিছিল। ১৯৯২ চনত গুৱাহাটী বিশ্ববিদ্যালয়ৰ যুৱ মহোৎসৱত পাশ্চাত্য একক পৰিৱেশনত স্বৰ্ণ পদক অৰ্জন কৰাই তেওঁৰ জীৱনৰ টাৰ্নিং পইণ্ট আছিল। ঢোল, দোতাৰা, মেণ্ডলিন আৰু কী-বৰ্ডৰ দৰে বাদ্যযন্ত্ৰত পাৰদৰ্শী জুবিনে সেই বছৰেই প্ৰথম এলবাম ‘অনামিকা’ মুক্তি দি পেছাদাৰী সংগীত জগতত সোম। এই অগতানুগতিক এলবামটোৱে উত্তৰ-পূব ভাৰতত জনপ্ৰিয় হৈ উঠিছিল। অসমীয়া সংগীতৰ দৃশ্যপটত নতুন সংজ্ঞা দিছে।
জুবিনৰ কেৰিয়াৰ আছিল বৈচিত্ৰময়। অসমীয়া, হিন্দী, বঙালী, বড়ো, কোচ-ৰাজবংশী, চাহ বাগানীয়া, হাজং, মিচিং, কাৰ্বি, গাৰো, ৰাভা, ডিমাচা, টাই-আহোম, নেপালী, ভোজপুৰী, বিষ্ণুপ্ৰিয়া মণিপুৰী, ককবৰক, ওড়িয়া, তামিল, তেলুগু, কন্নড়, ইংৰাজী, আদি, গালো, মালয়ালম, মাৰাঠীসহ ২৪খনতকৈ অধিক ভাষাত কণ্ঠদান কৰা তেওঁ ৯,০০০-তকৈ অধিক গীতৰ সৃষ্টিকৰ্তা। নিজৰ নামতে চল্লিছটাকৈ এলবাম মুক্তি দি ২৪খনতকৈ অধিক অসমীয়া চলচ্চিত্ৰৰ সংগীত পৰিচালনা কৰা জুবিনে ‘তুমি মোৰ মাথোঁ মোৰ’, ‘দীনবন্ধু’ৰ দৰে ছবিত অভিনয় আৰু পৰিচালনাতো দক্ষতা দেখুৱাইছিল। হিন্দী চিনেমাসমূহ যেনে ‘গেংগষ্টাৰ’, ‘ফিজা’, ‘কাঁটে’, ‘ব্ৰাইডছ ৱাণ্টেড’ত তেওঁৰ কণ্ঠ আৰু সংগীতৰ ছাপ ঢালাই আছে। বঙালী ছবি ‘শুধু তুমি’ৰ বাবে ২০০৫ চনত শ্ৰেষ্ঠ সংগীত পৰিচালকৰ BFJA বঁটা, ‘য়া আলি’ গীতৰ বাবে ২০০৭ চনত GIFA আৰু ষ্টাৰডাষ্ট এৱাৰ্ডত শ্ৰেষ্ঠ নেপথ্য কণ্ঠশিল্পীৰ বঁটা, আৰু ‘Echoes of Silence’ ছুটি ছবিৰ বাবে ৰজত কমল লাভ কৰি কৃতিত্ব অৰ্জন কৰিছিল। ২০১৪ চনত আধুনিক অসমীয়া সংগীতত নতুন মাত্ৰা প্ৰদানৰ বাবে ৰেনেছাঁ অসম বঁটা পোৱা জুবিনে লোকগীতৰ লুপ্ত ধাৰাকো পুনৰুজ্জীৱিত কৰি নতুন প্ৰজন্মক সংগীতৰ দায়বধতা শিকাইছিল।
