উচ্চতম ন্যায়ালয়ৰ মুখ্য ন্যায়াধীশ ৰঞ্জন গগৈয়ে আজি পুনৰ কামাখ্যা দৰ্শন কৰিব। ইয়াৰ পূৰ্বে প্ৰায় এমাহ আগতে দৰ্শনৰ বাবে শক্তিপীঠত উপস্থিত হোৱা মুখ্য ন্যায়াধীশ ৰঞ্জন গগৈৰ নিৰাপত্তাক লৈ ৰাজ্যৰ আৰক্ষী-প্ৰশাসনে প্ৰদৰ্শন কৰা গাফিলতি, দায়িত্বহীনতাই তীব্ৰ বিতৰ্কৰ সূচনা কৰিছিল।
তাৎপৰ্যপূৰ্ণভাৱে মুখ্য ন্যায়াধীশগৰাকীয়ে এইবাৰ ৰাজ্য চৰকাৰৰ নিৰাপত্তা প্ৰত্যাখ্যান কৰিছে। আজি দিনৰ ১ বজাত গুৱাহাটীত উপস্থিত হ’বলগীয়া মুখ্য ন্যায়াধীশগৰাকীক অৰ্ধসামৰিক বাহিনীৰ জোৱানে নিৰাপত্তা প্ৰদান কৰিব।
বৰঝাৰৰ পৰা পোনে পোনে কামাখ্যাধামক উপস্থিত হ’বলগীয়া ৰঞ্জন গগৈৰ নিৰাপত্তাৰ সম্পূৰ্ণ দায়িত্ব ল’ব কেন্দ্ৰীয় অৰ্ধসামৰিক বাহিনীয়ে।
আনহাতে, মুখ্য ন্যায়াধীশগৰাকীয়ে কামাখ্যাধামত প্ৰায় ৩ ঘণ্টা সময় পূজা-অৰ্চনা কৰি পুনৰ দিল্লীলৈ উভতি যাব। মুখ্য ন্যায়াধীশগৰাকীৰ এই ভ্ৰমণসূচীত নিৰাপত্তাৰ দায়িত্ব কেন্দ্ৰীয় গৃহ মন্ত্ৰ্যালয়ে তেওঁৰ ইচ্ছানুসৰি অসম আৰক্ষীৰ পৰিৱৰ্তে অৰ্ধসামৰিক বাহিনীক অৰ্পণ কৰিছে।
ইয়াৰ পূৰ্বে মুখ্য ন্যায়াধীশ পদত অধিষ্ঠিত হোৱাৰ পাছতে কামাখ্যাত উপস্থিত হোৱা মুখ্য ন্যায়াধীশ ৰঞ্জন গগৈ বিজেপিৰ ৰাষ্ট্ৰীয় সভাপতি অমিত শ্বাহৰ ভ্ৰমণৰ বাবে কামাখ্যাত ভিৰত আবদ্ধ হৈ পৰিছিল।
উল্লেখযোগ্য যে সেইবাৰ তেওঁৰ ভ্ৰমণৰ সময়ত তেওঁৰ সৈতে অসম আৰক্ষীৰ কোনো উচ্চপদস্থ আৰক্ষী বিষয়া তথা দণ্ডাধীশ উপস্থিত নাছিল। ইয়াৰ ফলত ভিৰত আবদ্ধ হৈ পৰা মুখ্য ন্যায়াধীশ ৰঞ্জন গগৈ অস্বস্তিত পৰাৰ লগতে তিক্ততাপূৰ্ণ অভিজ্ঞতাৰ সন্মুখীন হৈছিল।
