কোভিড মহামাৰীয়ে গোটেই বিশ্বৰে জীৱন শৈলীত ব্যাপক প্ৰভাৱ পেলাইছে। আনকি এতিয়াও কৰ’নাৰ অৱসান কেতিয়া গটিব সেয়া কোৱাটো কঠিন হৈ পৰিছে। এই মুহূৰ্তত কৰ’নাৰ সংহাৰে সমগ্ৰ বিশ্বকে আতংকিত কৰি ৰাখিছে।
কৰ’নাক নিয়ন্ত্ৰণ কৰিবলৈ ইয়াৰ উপায় উদ্ভাৱণৰ বাবে ব্যস্ত হৈ পৰিছে বিশ্বৰ সমস্ত বিজ্ঞানী মহল।
ইয়াৰ মাজতে ভৱিষ্যতে আৰু যদি কোনো এনে মহামাৰী আহে, তাক ৰুধিবলৈ এখন কোভিড প্ৰুফ চহৰ গঢ়ি তুলিব চীনে।
অবিশ্বাস্য যেন লাগিলেও এয়া সত্য। কৰ’নাৰ উৎপত্তি স্থল চীনতেই নিৰ্মাণ হ’বলৈ আগবাঢ়িছে এই কোভিড প্ৰুফ চহৰ।
ভৱিষ্যতে মহামাৰী দেখা দিলে ইয়াক ৰোধ কৰিবলৈ তথা লকডাউনৰ বিধি সঠিকভাৱে মানি চলিবলৈ এই সিদ্ধান্ত গ্ৰহণ কৰা বুলি কোৱা হৈছে।
বাতৰি অনুসৰি, মহামাৰীৰ সংহাৰজনক পৰিস্থিতিত সাধাৰণ নাগৰিকৰ জীৱন সুৰক্ষিত কৰাৰ বাবে নতুন ডিজাইনৰ এখন সম্পূৰ্ণ ‘কোভিড-প্ৰুফ’ স্মাৰ্ট চিটি নিৰ্মাণ কৰি তোলা হ’ব। ইয়াক গঢ়ি তোলা হ’ব দেশখনৰ জিয়ানগান নিউ অঞ্চলত।
বাতৰিত কোৱা হৈছে যে লণ্ডন চহৰৰ দৰে গঢ়ি তোলা হ’ব বেইজিঙৰ এই স্মাৰ্ট চিটিখন। ইয়াত সকলো উচ্চ প্ৰযুক্তিৰ সুবিধা থাকিব।
বৃহৎ বেলকনিসমূহক বিভক্ত কৰি বনোৱা থ্ৰি-ডি প্ৰিন্টাৰ আৰু গ্ৰীণ হাউছসমূহে ভৱিষ্যতে লকডাউনৰ সময়ত আৱাসীসকলক অধিক আৰামদায়ক পৰিৱেশ আগবঢ়াব।
ইয়াৰ প্ৰধান ৰূপকাৰগৰাকীৰ মতে হুবেই প্ৰদেশৰ এই কমপ্লেক্সটোত কাঠৰ এপাৰ্টমেন্ট ব্লক, ছাদৰ পথাৰ তথা ৰিন্যুৱেবল এনাৰ্জী থাকিব। প্ৰতিটো ব্লকতে আৱাসীসকলৰ প্ৰয়োজন পূৰণ কৰিব পৰাকৈ পৰ্যাপ্ত ঠাই থাকিব।
বাৰ্ছিলোনাৰ গুয়ালাৰ্ট আকিটেক্টে যোৱা মাহত জিয়ানগান চহৰৰ এই কোভিড-প্ৰুফ বিল্ডিঙৰ নক্সা প্ৰস্তুত কৰা প্ৰতিযোগিতাত বিজয়ী হৈছে। ইয়াত ৰাষ্ট্ৰপতি জিনপিঙক পৰৱৰ্তী যুগৰ শ্ৰেষ্ঠ ৰাষ্ট্ৰনেতা হিচাপে তুলি ধৰা হৈছে।
বাতৰি অনুসৰি, চীনৰ প্ৰস্তাৱিত এই নতুন কোভিড-প্ৰুফ চহৰত নাগৰিকসকলৰ বাবে সকলোধৰণৰ সুবিধা থাকিব।
