অৱশেষত দীৰ্ঘ দিন নিজৰ দাবী কৰি অহা ভুটানৰ ভূখণ্ড এৰিবলৈ বাধ্য হ’ল চীন।
উল্লেখ্য যে, চীনে আন্তজাৰ্তিক মঞ্চত ভুটানৰ চাকটাং বন্যপ্ৰাণী অভয়াৰণ্যক নিজৰ ভূখণ্ড বুলি দীৰ্ঘ দিনৰ পৰা দাবী কৰি আহিছিল।
বিগত মাহত আন্তাজাৰ্তিক সংস্থা গ্ল’বেল এনভাইৰনমেন্ট ফেচিলিট(জিইএফ)ৰ সাধাৰণ পৰিষদৰ ভাৰ্চুৱেল সভাত ভাৰতসহ বহুকেইখন দেশে উক্ত অভয়াৰণ্যখন ভুটানৰ বুলি দৃঢ় মত পোষণ কৰাত চীনে এই দাবী পত্যাহাৰ কৰিবলৈ বাধ্য হৈছে।
তাৰে ইংগিত দি দিল্লীত চীন দূতাৱাসে এক বিবৃতিত কয়, “চাকটাং অভয়াৰণ্য ভুটানৰ ত্ৰাশিগাং জিলাৰ অংশ। এই বিষয়ে আৰু কোনো বিতৰ্কৰ অৱকাশ নাই।”
ভাৰতক সকীয়নি দি চীনে বিবৃতিটোত আৰু কয়, “ভুটানৰ সৈতে সীমান্ত সমস্যাৰ বিষয়ত কোনো তৃতীয় পক্ষৰ ভূমিকা মানি লোৱা নহ’ব।”
তৃতীয় পক্ষ বুলি ভাৰতকে ইংগিত চীনে যে সকীয়নি দিছে সেয়া স্পষ্ট।
উল্লেখ্য যে, আমেৰিকাস্থিত জিইএফ এ বিশ্বৰ বিভিন্ন প্ৰান্তত পৰিৱেশ আৰু বন্যপ্ৰাণী সংৰক্ষণৰ বাবে আৰ্থিক সাহায্য প্ৰদান কৰি আহিছে।
চীন-ভুটান সীমান্তৰ পূৱ ছেক্টৰত অৱস্থিত ৭৪০ বৰ্গ কিলোমিটাৰ চাকটাং অভয়াৰণ্যও সংস্থাটোৰ আৰ্থিক সাহায্য লাভ কৰাৰ তালিকাত আছে।
কিন্তু যোৱা ২৯ জুনৰ জিইএফৰ সাধাৰণ সভাৰ বৈঠকত চীনৰ প্ৰতিনিধিয়ে উক্ত অভয়াৰণ্যখনৰ বাবে সংস্থাটোৱে ভুটানক আৰ্থিক অনুদান প্ৰদান কৰাটো বিৰোধিতা কৰে।
চীনৰ প্ৰতিনিধিজনৰ বিৰোধিতা কৰি কৈছিল যে চাকটাং অভয়াৰণ্য ভুটানৰ নহয়, সেয়া এক বিবাদিত অঞ্চল।
কিন্তু সভাত অংশগ্ৰহণ কৰাৰ ভাৰত, শ্ৰীলংকা, বাংলাদেশ আৰু নেপালৰ প্ৰতিনিধিয়ে চীনৰ এই দাবী বিৰোধিতা কৰে।
ইয়াৰ পিছতে দিল্লীস্থিত চীনা দূতাৱাসে এক বিবৃতিত চাকটাং অভয়াৰণ্য ভুটানৰ বুলি প্ৰকাশ কৰিছে।
