পুনৰ ইণ্ডিয়ান প্ৰিমীয়াৰ লীগ তথা আইপিএললৈ উভটি আহিছে চীনৰ স্মাৰ্টফোন কোম্পানী ভিভ’।
এই বৰ্ষত অনুষ্ঠিত হ’বলগা টুৰ্ণামেণ্টখন চীনৰ কোম্পানীটোৱে টাইটেল স্পনছ’ৰ কৰিব।
যাৰ বাবে পুনৰ আইপিএলক ভিভ’ আইপিএল নামেৰে জনা যাব।
উল্লেখযোগ্য যে আইপিএলৰ নিয়মীয়া মূল স্পনছ’ৰ চীনৰ কোম্পানীটোৰ স’তে যোৱা বছৰ বিচিচিআইয়ে স্পনছ’ৰশ্বিপৰ চুক্তি ৰদ কৰিছিল।
ইয়াৰ কাৰণ আছিল চীন আৰু ভাৰতৰ সীমান্তৰ সংঘাত।
কোম্পানীটোৱে জনাইছে যে অতি সোনকালে ভিভ’ই ফাইফ জি টেকন’লজী প্ৰয়োগ কৰিব।
ভিভ’ৰ ভাৰতৰ এগৰাকী সঞ্চালক নিপুন মৌৰ্যই বুধবাৰে এই কথা নিশ্চিত কৰিছে।
তেওঁ আইপিএলক ভাৰতৰ ক্ৰীড়া আৰু মনোৰঞ্জনৰ প্ৰাণকেন্দ্ৰ বুলি অভিহিত কৰিছে।
বিচিচিআইৰ স’তে স্পনছ’ৰশ্বিপৰ চুক্তি একে থাকিব বুলিও সঞ্চালকজনে জনায়।
ভিভ’ৰ স’তে ইয়াৰ পূৰ্বে ২০১৮ চনৰ পৰা বিচিচিআইয়ে বছৰি ৪৪০ কোটি টকাৰ চুক্তিত আৱদ্ধ আছিল।
২০২০ চনত আইপিএলৰ টাইটেল স্পনছ’ৰ আছিল ড্ৰীম ইলেভেন।
