টিকটক এপ বন্ধ হোৱাৰ পিছত টিকটকৰ ঠাই পূৰাবলৈ অহা চিংগাৰীক লৈ এতিয়া আশাবাদী এপটোৰ গুৰি ধৰোতা সকল।
বাংগালুৰুৰ ছফটৱেৰ ডেভেলপমেন্ট কোম্পানী গ্ল’বুছফটে সাজি উলিওৱা চিংগাৰী এপটোৱে এতিয়া ব্যাপক জনপ্ৰিয়তা অৰ্জন কৰিবলৈ সক্ষম হৈছে।
এই কথাতে আনন্দিত হৈ পৰিছে এপটোৰ সহঃ প্ৰতিষ্ঠাপক সুমিত ঘোষ।
চিংগাৰী এপৰ জনপ্ৰিয়তাৰ কথা উল্লেখ কৰি ঘোষে কয় যে বিগত মাহত চিংগাৰী এপ ডাউনলোড কৰিছিল প্ৰায় ৫ লাখ লোকে।
এতিয়া ডাউনলোডকাৰীৰ সংখ্যা বাঢ়ি ১.১ কোটি হোৱা বুলি তেওঁ প্ৰকাশ কৰে।
ডাউনলোডকাৰীৰ বৰ্দ্ধিত সংখ্যাৰ প্ৰতি লক্ষ্য ৰাখি চিংগাৰীত ছমাহৰ ভিতৰত কমেও ১০০ দক্ষ ব্যক্তিক নিযুক্তি দিয়া হ’ব বুলিও তেওঁ কয়।
ভাৰত-চীন সীমান্তত হোৱা উত্তেজনাৰ পিছতেই ভাৰতে জনপ্ৰিয় টিকটকসহ মুঠ ৫৯টা চাইনীজ এপ নিষিদ্ধ ঘোষণা কৰিছিল। ভাৰত চৰকাৰৰ এই সিদ্ধান্ত ডিজিটেল ষ্ট্ৰাইক বুলি অভিহিত কৰা হৈছে।
চাইনীজ এপ নিষিদ্ধ হোৱাৰ পিছৰে পৰা ভাৰতত নিৰ্মিত এপৰ ডাউনলোড যথেষ্ট পৰিমানে বৃদ্ধি পাবলৈ ধৰিছে।
টিকটৰ পৰিৱৰ্তে চিংগাৰী আৰু ধকধক, কেমস্কেনাৰৰ বিপৰীতে স্কেন কৰো এপ আৰু চেয়াৰ ইটৰ সলনি চেয়াৰ চাটৰ দৰে এপ ডাউনলোড হৈ আছে।
উল্লেখ্য যে ভাৰতত জনপ্ৰিয় টিকটক বন্ধ হোৱাৰ পিছতে চাইনীজ কোম্পানিটোৰ প্ৰায় ৪৫ হাজাৰ কোটি টকাৰ লোকচানৰ সন্মুখীন হোৱা বুলি জানিব পৰা গৈছে। ভাৰতৰ চিংগাৰী এপ টিকটকৰ সমপৰ্যায়ৰ এপ।
