বিহাৰ বিধানসভা নিৰ্বাচনৰ প্ৰাকক্ষণত বহুতে তেওঁ সুৰ সলনিৰ ইংগিত পাইছিল। এইবাৰ মুকলিকৈ কেন্দ্ৰীয় মন্ত্ৰী চিৰাগ পাছৱানে এন ডি এ ত্যাগ কৰাৰ জল্পনা-কল্পনাত প্ৰায় ছীলমোহৰ মাৰিলে।
সাৰণত অনুষ্ঠিত এখন সভাৰ পৰা চিৰাগে পুনৰ কয়, “মই বিহাৰ বিধানসভাৰ নিৰ্বাচনত প্ৰতিদ্বন্দ্বিতা কৰিম। মই প্ৰতিদ্বন্দ্বিতা কৰিম বুলি কোৱাৰ অৰ্থ হ’ল ৰাজ্যৰ ২৪৩খন আসনতে প্ৰাৰ্থী প্ৰক্ষেপ কৰিম।”
নিৰ্বাচন চমু চাপি অহাৰ লগে লগে বিহাৰৰ ৰাজনৈতিক পৰিস্থিতি অধিক উত্তপ্ত হৈ পৰিছে। পাটনাৰ ব্যৱসায়ী তথা বিজেপি নেতা গোপাল খেমকাক শনিবাৰে দুৰ্বৃত্তই গুলীয়াই হত্যা কৰে। ঘৰৰ সমীপতে গাড়ীৰ পৰা নামি আহোঁতে তেওঁক গুলীয়াই হত্যা কৰা হয়।
সেই ঘটনাক সন্মুখত ৰাখি চিৰাগে কয়, “ৰাজ্যৰ আইন-শৃংখলাৰ পৰিস্থিতি সঁচাকৈয়ে চিন্তনীয়। ব্যৱসায়ীজনক গুলীয়াই হত্যা কৰা অঞ্চলটো পাটনাৰ এক অভিজাত অঞ্চল। ৰাজনৈতিক নেতাসকল মাত্ৰ কেইশ মিটাৰ দূৰত থাকে। যদি সেই অঞ্চলত এনেকুৱা হয়, তেন্তে সমগ্ৰ ৰাজ্যখনৰ অৱস্থা কি!”
কেন্দ্ৰীয় মন্ত্ৰীগৰাকীয়ে স্পষ্টকৈ কয়, “সমগ্ৰ দেশৰ সুশাসনৰ বাবে প্ৰতিষ্ঠা হোৱা এনে এটা মিত্ৰতাক তেওঁ সমৰ্থন কৰে। অথচ বিহাৰৰ এই অৱস্থা!”
দৰাচলতে নীতিশ কুমাৰক লক্ষ্য কৰি লৈছে লোক জনশক্তি পাৰ্টিৰ নেতাগৰাকীয়ে। একে সময়তে তেওঁ ঘোষণা কৰিছে যে তেওঁৰ দলে বিহাৰৰ নিৰ্বাচনৰ সকলো আসনত প্ৰতিদ্বন্দ্বিতা কৰিব বিচাৰিছে।
এয়া স্পষ্টভাৱে এন ডি এৰ বিভাজনৰ ইংগিত। কাৰণ এন ডি এৰ ভিতৰত হোৱা প্ৰাৰম্ভিক আসন আবণ্টনত লোক জনশক্তি পাৰ্টিয়ে ত্ৰিশখনতকৈ অধিক আসন লাভ নকৰে। অৱশেষত যদি চিৰাগে মিত্ৰতা ত্যাগ কৰি পৃথকে প্ৰতিদ্বন্দ্বিতা কৰে তেন্তে নীতিশ কুমাৰৰ বাবে ই এক ডাঙৰ আঘাত হ’ব। চিৰাগে ২০১৮ চনৰ নিৰ্বাচনত অকলে প্ৰতিদ্বন্দ্বিতা কৰি নীতিশৰ বহু ক্ষতি কৰিছিল।
দিল্লীতো জল্পনা-কল্পনা বিয়পি পৰিছে যে লোক জনশক্তি পাৰ্টিৰ মুৰব্বী (ৰাম বিলাস) তথা কেন্দ্ৰীয় খাদ্য সংসাধন মন্ত্ৰীয়ে পদত্যাগ কৰিব পাৰে। দলীয় সূত্ৰই জনোৱা মতে, তেওঁ হয়তো সম্পূৰ্ণৰূপে ৰাজ্যৰ ৰাজনীতিত মনোনিৱেশ কৰিব।
চিৰাগে প্ৰমাণ কৰিব বিচাৰে যে তেওঁ সমগ্ৰ বিহাৰৰ জনসাধাৰণৰ নেতা। সেয়ে তেওঁ দলিত আসন এৰি ‘সাধাৰণ’ বা অসংৰক্ষিত আসনৰ পৰা প্ৰতিদ্বন্দ্বিতা কৰিব পাৰে। অৱশ্যে সেইটো এন ডি এৰ ভিতৰত থাকি নে বাহিৰলৈ ওলাই আহি সেয়া স্পষ্ট নহয়।
