নাগৰিকত্ব বিধেয়কে উত্তৰ-পূবত বিভেদ আনিছে : অৰুণাচলৰ প্ৰাক্তন মুখ্য মন্ত্ৰী গেগং আপাং

অলপতে বিজেপি ত্যাগ কৰা অৰুণাচলৰ প্ৰাক্তন মুখ্য মন্ত্ৰী গেগং আপাঙে দলটোক উগ্ৰ সমালোচনা কৰি কয় যে বিজেপিয়ে আনিব খোজা নাগৰিকত্ব সংশোধনী বিধেয়কে উত্তৰ-পূবত বিভেদ সৃষ্টি কৰিছে।

আজি অৰ্থাৎ শনিবাৰে কলকাতাত পশ্চিমবংগৰ মুখ্য মন্ত্ৰী মমতা বেনাৰ্জীয়ে আয়োজন কৰা এক বিশাল বিজেপি বিৰোধী সমাবেশত ভাগ লৈ আপাঙে কয়, ‘যোৱা চাৰিটা বছৰ ভাৰতীয় গণতন্ত্ৰৰ বাবে এক সংকটকাল। ইয়াত ভাৰতীয় নেতৃত্বৰ ৰত্নসকল উপস্থিত আছে। আমি ইয়াত সংবিধানত থকা গণতান্ত্ৰীক মূল্যবোধক ৰক্ষা কৰিবলৈ একগোট হৈছো।

অৰুণাচল প্ৰদেশত গণতন্ত্ৰ নিকৃষ্টতম অৱস্থাৰ মাজেৰে গৈ আছে বুলি উল্লেখ কৰি তেওঁ লগতে কয়, ‘ফেডাৰেল গণতন্ত্ৰ সংকটৰ সন্মুখীন হৈছে, আনকি উচ্চতম ন্যায়ালয়ৰো নিৰ্দেশ পালন কৰা হোৱা নাই। মোৰ ৰাজ্যৰ প্ৰাক্তন মুখ্য মন্ত্ৰী গৰাকীয়ে আত্মহত্যা কৰিবলগীয়া হ’ল।‘

আনহাতে, প্ৰাক্তন মুখ্য মন্ত্ৰী আপাঙে বিজেপি বিৰোধী সমাবেশখন অনুষ্ঠিত কৰাৰ বাবে মমতা বেনাৰ্জীক ধন্যবাদ জ্ঞাপন কৰি আঞ্চলিক দলসমূহক একলগ হ’বলৈ আহ্বান জনায়।

উল্লেখযোগ্য যে উক্ত সমাবেশতে মিজোৰামৰ জোৰাম নেশ্যনেলিষ্ট পাৰ্টি (জেদ এন পি)ৰ নেতা লালডুহাৱমাই নাগৰিকত্ব সংশোধনী বিধেয়কৰ তীব্ৰ সমালোচনা কৰে। বিধেয়কখনে উত্তৰ-পূবৰ জনসাধাৰণক বিচ্ছিন্ন কৰিছে বুলি উল্লেখ কৰি তেওঁ কয়, ‘নাগৰিকত্ব সংশোধনী বিধেয়কখন উঠাই ল’বলৈ মই প্ৰধান মন্ত্ৰীক সকীয়াই দিব খোঁজো। যদি এইয়া কৰা নহয় ভাৰত উত্তৰ-পূবৰ লোকসকলৰ বাবে উপযুক্ত হৈ নাথাকিব। মই উত্তৰ-পূবৰ সকলো আঞ্চলিক দলকে বিজেপিৰ সৈতে সম্পৰ্ক ত্যাগ কৰিবলৈ আহ্বান জনাইছো।‘

‘বিজেপি আৰু বজৰং দলে আমি কি খাম তথা আমাৰ ধৰ্মৰ ওপৰত নিৰ্দেশ দিয়ে’ বুলি মন্তব্য কৰি তেওঁ কয়, ‘ কেৱল এখন নতুন চৰকাৰে হে সংখ্যালঘুসকলক সকাহ দিব পাৰিব।‘