বোকাখাতত দশম শ্ৰেণীৰ ছাত্ৰ নিৰুদ্দেশ; থানাত গোচৰ পিতৃ-মাতৃৰ
স্বাধীনতা দিৱসৰ প্ৰাকক্ষণত বোকাখাতৰ পৰা নিৰুদ্দেশ হৈছে এজন দশম শ্ৰেণীৰ ছাত্ৰ। জানিব পৰা মতে, বোকাখাতৰ কুৰুৱাবাহী খতিয়াখলি গাঁৱৰ দুলাল বৰা আৰু ববী বৰাৰ কনিষ্ঠ পুত্ৰ যোৱা বৃহস্পতিবাৰৰ পৰাই নিৰুদ্দেশ হৈ আছে।
নিৰুদ্দেশ হৈ থকা ছাত্ৰজনৰ নাম হৈছে স্বৰাজ প্ৰিয় বৰা। নিৰুদ্দিষ্ট স্বৰাজ প্ৰিয় বৰা কুৰুৱাবাহী পৰঙ্গনীয়া হাইস্কুলৰ দশম শ্ৰেণীৰ ছাত্ৰ।
উল্লেখযোগ্য যে যোৱা ৯ আগষ্টৰ বিয়লি পিতৃ-মাতৃয়ে পথাৰত ব্যস্ত থকাৰ সময়তে ঘৰত কাকো নোকোৱাকৈ ঘৰৰ পৰাই ছাত্ৰজন নোহোৱা হয়।
পুত্ৰ পুনৰ ঘৰলৈ ঘুৰি অহাৰ আশা বুকুত পুহি ৰাখি অৱশেষত নিৰাশ হৈ সোমবাৰে বিয়লি বোকাখাত আৰক্ষীক পুত্ৰ নিৰুদ্দেশ হৈ থকাৰ সন্দৰ্ভত মাতৃ ববী বৰাই এখন এজাহাৰ দাখিল কৰে ৷
ঘটনা সংক্ৰান্তত বোকাখাত থানাত এক গোচৰ ৰজু কৰা হৈছে বুলি আৰক্ষীয়ে জানিবলৈ দিয়ে।