মহাৰাষ্ট্ৰৰ নাটকীয় ৰাজনৈতিক অস্থিৰতাই এতিয়া খলকনি তুলিছে দেশত। এই অস্থিৰতাৰ জন্ম দিয়া মহাৰাষ্ট্ৰৰ বিসম্বাদী বিধায়ক সকলে বৰ্তমান অসমত বাহৰ পাতিছে। ৰাজনৈতিক স্বাৰ্থত এই বিধায়কসকলৰ আতিথ্যত এতিয়া নামি পৰিছে মুখ্যমন্ত্ৰী হিমন্ত বিশ্ব শৰ্মা সহিতে প্ৰদেশ বিজেপি। মুখ্যমন্ত্ৰীৰ এই ভূমিকাক লৈ সমালোচনাত সৰৱ হৈ পৰিছে অসম প্ৰদেশ কংগ্ৰেছৰ সভাপতি ভূপেন বৰা।
হিমন্ত বিশ্ব শৰ্মাক তীব্ৰ গৰিহণা দি ভূপেন বৰাই কয় যে বৰ্তমান অসমৰ ৩১ খন জিলাৰ ৫৩ লাখ ৯৪ হেজাৰ মানুহে বানৰ গ্ৰাসত পৰি দুবেলা দুমুঠি খাবলৈ হাহাকাৰ কৰিব লাগিছে, বানৰ ধলে ঘৰ-বাৰী, পশুধন উটুৱাই নি সৰ্বস্বান্ত কৰিছে, ভূমিস্খলনে শ শ মানুহৰ ঘৰ-বাৰী উছন কৰি নিছে। কিন্তু অসম চৰকাৰ সেই লৈ চিন্তা নাই।
ৰাজ্যৰ জনসাধাৰণৰ এনে এক বিপদৰ সময়ত মহাৰাষ্ট্ৰত ষড়যন্ত্রমূলকভাবে বিজেপি চৰকাৰ গঠন কৰিবলৈ ৪০ গৰাকী বিধায়কক উৰুৱাই আনি গুৱাহাটীৰ বিলাসী হোটেলত ৰাজ-আতিথ্য দি মুখ্যমন্ত্ৰী হিমন্ত বিশ্ব শৰ্মা ঘৃণনীয় ৰাজনীতিত লিপ্ত হৈছে বুলি নিন্দা কৰে ভূপেন বৰাই।
এক বিবৃতি যোগে অসম প্ৰদেশ কংগ্ৰেছৰ সভাপতি গৰাকীয়ে কয়, “যোৱা এপ্ৰিল মাহৰ পৰা এই শেহতীয়া প্রলয়ংকৰী বানলৈকে ৰাজ্যৰ ৮৮ গৰাকী লোকে প্রাণ হেৰুৱাবলগীয়া হৈছে। গুৱাহাটী মহানগৰীতে আজিও বান আৰু ভূমিস্খলনত হেজাৰ পৰিয়ালে দিশহাৰা হৈ দিন-ৰাতি পাৰ কৰিব লগীয়া অৱস্থা হৈছে।”
বান সাহায্য, পুনৰ সংস্থাপনৰ নামত চূড়ান্ত বৈষম্য আৰু প্ৰচাৰমুখিতাক আগ ঠাই দিয়া হৈছে বুলি অভিযোগ কৰি বৰাই কেৱল টেলিভিচনৰ সাংবাদিক মাতি নি বান সাহায্য বিতৰণত গাফিলতি কৰাৰ বাবে উপায়ুক্তক ধমক দিয়া দেখুৱালেই এগৰাকীৰ মুখ্যমন্ত্ৰীৰ দায়িত্ব শেষ হৈ নাযায় বুলি হিমন্ত বিশ্ব শৰ্মাক উপহাস কৰে।
“ৰাজ্যখনৰ এই জটিল আৰু সংকটকালীন সময়ত ৰাজ্যৰ বান পৰিস্থিতিৰ মোকাবিলা কৰিবলৈ এগৰাকী কেন্দ্ৰীয় নেতাক ৰাজ্যলৈ আনি পৰিস্থিতি অনুধাবন কৰিবলৈ বাধ্য কৰাব নোৱৰা, এটা টকাও কেন্দ্ৰৰ পৰা বান সাহায্যৰ নামত অসমলৈ আনিব নোৱৰা হিমন্ত বিশ্ব শৰ্মাই এনে এটা সময়ত অন্য ৰাজ্যৰ চৰকাৰ ভঙা পতাৰ অংকত অসমক ব্যৱহাৰ কৰা কাৰ্যক ধিক্কাৰ দিবলৈ ভাষা নাই।”- তেওঁ লগতে কয়।
এটা অগণতান্ত্ৰিক আৰু অশুভ পৰম্পৰাৰ সৃষ্টি কৰি মহাৰাষ্ট্ৰত ছলে-বলে-কৌশলে বিজেপি চৰকাৰ গঠনৰ ষড়যন্ত্রমূলক প্ৰক্ৰিয়াত প্ৰায় দুকুৰি বিধায়কক পণবন্দী কৰি আনি গুৱাহাটীৰ বিলাসী হোটেলত ৰাজ-আতিথ্য দিবলৈ কিঞ্চিতো লজ্জাবোধ নকৰা অসমৰ মুখ্যমন্ত্ৰীগৰাকীয়ে এক নিম্নৰুচিৰ নজিৰ সৃষ্টি কৰিলে বুলিও ভূপেন বৰাই হিমন্ত বিশ্ব শৰ্মাক কটাক্ষ কৰে।
স্বয়ং গুৱাহাটী মহানগৰীতে শ শ লোকে আজিও বান আৰু ভূমিস্খলনত বিধ্বস্ত হৈ চৰম অনিশ্চয়তাৰ মাজত দিন অতিবাহিত কৰি থকাৰ সময়ত ৰাজ্যখনৰ মুখ্যমন্ত্ৰীজনৰ এনে ঘৃণনীয় ৰাজনীতিয়ে ৰাজ্যবাসীকে লজ্জানত কৰিলে বুলিও কংগ্ৰেছ সভাপতি গৰাকীয়ে লগতে উল্লেখ কৰে।
