কাৰোবাৰ মন গ’লেই বিধি-বিধান নমনাকৈ গুৱাহাটীত ঘৰ সজা, লোৱাৰ দিন উকলিল।
মুখ্য মন্ত্ৰী সৰ্বানন্দ সোণোৱালে বুধবাৰে গুৱাহাটী ডিভেলপমেণ্ট বিভাগক ৩১ অক্তোবৰৰ ভিতৰত নতুন বিল্দিং বাই-ল যুগুত কৰাৰ নিৰ্দেশ দিছে।
বৰ্তমানৰ বাই-লসমূহৰ আঁসোৱাহ গুচাই ৰিয়েল এষ্টে’ট খণ্ডৰ বিকাশ কৰিবলৈ সোণোৱালে নিৰ্দেশ দিছে, মুখ্য মন্ত্ৰী কাৰ্য্যালয়ৰ বিবৃতিত প্ৰকাশ।
তাৰোপৰি সুলভ গৃ্হ আঁচনিৰ অধীনৰ ঘৰসমূহৰ নিৰ্মাণ খৰতকীয়া কৰিবলৈয়ো সোণোৱালে বিষয়াসকলক নিৰ্দেশ দিছে।
গুৱাহাটীৰ জনতা ভৱনত মুখ্য মন্ত্ৰীৰ সভাকক্ষত বুধবাৰে বহা জি এছ টি সম্পৰ্কীয় বৈঠকত সোণোৱালে এই নিৰ্দেশ দিছে।
জি এছ টি সন্দৰ্ভত এখন বহুভাষিক সজাগতামূলক বুকলেট প্ৰকাশ কৰিবলৈ বিত্ত বিভাগৰ প্ৰধান সচিবক সোণোৱালে নিৰ্দেশ দিছে।
কৰবিধ সন্দৰ্ভত মুখ্য মন্ত্ৰীয়ে বিষয়াজনক বিভিন্ন অংশীদাৰ আৰু সংগঠনসমূহৰ পৰামৰ্শ গ্ৰহণ কৰিবলৈ নিৰ্দেশ দিছে।
জি এছ টি প্ৰৱৰ্তন হোৱাৰ আগৰ সময়চোৱাৰ সকলো বিবদমান বিষয় ছমাহৰ ভিতৰত নিষ্পত্তি কৰিবলৈ তেওঁ বিষয়াসকলক নিৰ্দেশ দিছে।
তাৰোপৰি অট’ম’বাইল খণ্ডৰ বাবে গুৱাহাটীৰ কাষৰীয়া অঞ্চলত এখন ত্ৰান্সপ’ৰ্ট চিটি নিৰ্মাণৰ বাবে কাম আৰম্ভ কৰিবলৈ মুখ্য মন্ত্ৰীয়ে বৈঠকত নিৰ্দেশ দিছে।
ফাইনাৰ (FINER), হোটেল ব্যৱসায়, ৰিয়েল এষ্টে’ট, টেক্স বাৰ এছ’চিয়েচন, অট’ম’বাইল, ইলেক্ত্ৰিক ব্যৱসায়, কাপোৰ ব্যৱসায়, চাৰ্টাৰ্দ একাউণ্টেণ্ট, গুৱাহাটী টী ৱেয়াৰহাউজিং এছ’চিয়েচন, চেনিতেৰি আৰু হাৰ্দৱেয়াৰ এছ’চিয়েচন আৰু অসম চে’ম্বাৰ্ছ অৱ কমাৰ্চৰ প্ৰতিনিধি বৈঠকত উপস্থিত আছিল।
বৈঠকখনত মুখ্য মন্ত্ৰীৰ আইনী উপদেষ্টা শান্তনু ভৰালী, মুখ্য সচিব আলোক কুমাৰ, গুৱাহাটী ডিভেলপমেণ্ট বিভাগৰ মনিন্দৰ সিং, বিত্ত বিভাগৰ প্ৰধান সচিব সমীৰ সিনহাও উপস্থিত আছিল।
