২০০১ চনত অসমলৈ আহিছিল স্বামী বিবেকানন্দ। ২০০১ চনৰ ১৭ এপ্ৰিলত স্বামী বিবেকানন্দই গুৱাহাটীত উপস্থিত হৈছিল। এই ভ্ৰমণত স্বামী বিবেকানন্দ অসমত তিনি দিন আছিল! গুৱাহাটীৰ প্ৰাগজ্যোতিষ প্ৰকল্পত অনুষ্ঠিত ভাৰতীয় জনতা যুৱ মৰ্চা, অসমএ বিবেকানন্দ জন্ম জয়ন্তীৰ সৈতে সংগতি ৰাখি আয়োজন কৰা ৰাষ্ট্ৰীয় যুৱ দিৱসত এই মন্তব্য কৰিছে মুখ্যমন্ত্ৰী হিমন্ত বিশ্ব শৰ্মাই।
পিছে মুখ্যমন্ত্ৰী হিমন্ত বিশ্ব শৰ্মাৰ এই বক্তব্যক লৈ সৃষ্টি হৈছে বিতৰ্কৰ। প্ৰশ্ন উঠিছে, এয়া ইতিহাসৰ বিকৃতকৰণ নে অপবাখ্যা ? নে ইতিহাসৰ প্ৰতি ভেঙুচালি?
সমগ্ৰ বিশ্বজুৰি খ্যাতি থকা স্বামী বিবেকানন্দৰ জন্ম হৈছিল ১৮৬৩ চনৰ ১২ জানুৱাৰীত তেতিয়াৰ কলিকতাত। মাত্ৰ ৩৯ বছৰ জীয়াই থকা ভাৰতীয় এই মহান মহিষীগৰাকীৰ মৃত্যু হৈছিল ১৯০২ চনৰ ৪ জুলাইত।
১৯০২ চনত মৃত্যু হোৱা স্বামী বিবেকানন্দই ২০০১ ত অসমলৈ আহিছিল কেনেকৈ? মুখ্যমন্ত্ৰী হিমন্ত বিশ্ব শৰ্মাৰ মন্তব্যৰ পিছতে উত্থাপন হৈছে এই প্ৰশ্নৰ। সম্প্ৰতি মুখ্যমন্ত্ৰীগৰাকীৰ এই মন্তব্যৰ ভিডিঅ’ সামাজিক মাধ্যমত ভাইৰেল হৈ পৰিছে।
ভিডিঅ’টোত তেওঁ লিখিত ভাষণটো চাই ২০০১ চনৰ ১৭ এপ্ৰিলত বিবেকানন্দৰ অসম ভ্ৰমণৰ বিষয়ে অতি সাৱলীলভাৱে কৈ গৈছে। অতি আত্মবিশ্বাসেৰে তেওঁ কৈছে যে স্বামী বিবেকানন্দই অসমত তিনিটা দিন থাকি গৈছে আৰু কামাখ্যাও দৰ্শন কৰি গৈছিল।
এতিয়া প্ৰশ্ন হৈছে মুখ্যমন্ত্ৰী ড° শৰ্মাই ভুলক্ৰমে ১৯০১ চনটোকে ২০০১ বুলি উল্লেখ কৰিছে নেকি? নে শেহতীয়াকৈ জোৰ দি অহা ইতিহাস পুনৰ লিখনৰ আধাৰত হিন্দুত্ববাদীৰ ইতিহাসৰ নকল-নবিচিহে কৰিছে?
উল্লেখ্য যে স্বামী বিবেকানন্দ অসমলৈ অহাৰ কোনো তথ্য প্ৰমাণ এতিয়ালৈকে নাই। ইফালে ১৯০১ চনত তেওঁ অসমলৈ অহাটো কোনোপধ্যেই সম্ভৱ নাছিল। ১৮৯৯ চনৰ জুন মাহত ভগ্ন স্বাস্থ্যৰে স্বামী বিবেকানন্দই পাশ্চাত্যলৈ যাত্ৰা কৰে। ইংলেণ্ডৰ পৰা তেওঁ আমেৰিকালৈ যায়।
আমেৰিকাৰ চানফ্ৰাঞ্চিচকো আৰু নিউইয়ৰ্কত বেদান্ত ছ’চাইটি প্ৰতিষ্ঠা কৰাৰ লগতে প্ৰতিষ্ঠা কৰে ক্যালিফোৰ্ণিয়াত শান্তি আশ্ৰম। ইয়াৰ পাছতে ১৯০০ চনৰ ফ্ৰান্সৰ পেৰিচ ধৰ্ম সভাত যোগদান কৰে। পেৰিচৰ পৰা স্বামী বিবেকানন্দই ভ্ৰমণ কৰে ব্ৰিটানি, ভিয়েনা, ইস্তান্বুল, এথেঞ্চ আৰু মিচৰ।
আৰু ১৯০০ চনৰ ৯ ডিচেম্বৰত স্বামী বিবেকানন্দই হাওৰাস্থিত বেলুৰ মঠত উপস্থিত হয়। কিছুদিন মায়াবতীৰ অদ্বৈত আশ্ৰমত কটোৱাৰ পিছত জীৱনৰ শেষ সময়লৈকে তেওঁ বেলুৰ মঠতে দিন অতিবাহিত কৰে। ভগ্ন স্বাস্থ্যৰ বাবে ১৯০১ চন ডিচেম্বৰত তেওঁ মঠতে আছিল আৰু জাপানৰ ধৰ্মৰ মহাসভাত যোগদানৰ নিমন্ত্ৰণ পালেও সেয়া গ্ৰহণ কৰিব পৰা নাছিল। ১৯০১ চনতো স্বামী বিবেকানন্দই অসমলৈ অহাৰ কোনো তথ্য নাই।
তেনে পৰিস্থিতিত মুখ্যমন্ত্ৰীয়ে কিয় এই গোকাট মিথ্যাচাৰৰ আশ্ৰয় ল’লে? আৰএছএছৰ গুডবুকত নাম ভৰাবলৈকে ড° হিমন্ত বিশ্ব শৰ্মাই এইদৰে ক’লে নেকি বুলিও প্ৰশ্ন হৈছে। মুখ্যমন্ত্ৰীয়ে পুনৰ অসমৰ প্ৰতিষ্ঠিত বুদ্ধিজীৱী আৰু বাওঁপন্থী ইতিহাসবিদৰ প্ৰসংগ আনি কয় যে তেওঁলোকে আমাৰ জাতীয় জীৱনক ক্ষতি কৰি থৈ গ’ল।
বাওঁপন্থীসকলে আমাৰ মাজলৈ বিচ্ছিন্নবাদী চিন্তা আৰম্ভণি কৰি থৈ গ’ল আৰু সেই চিন্তাৰ ফল আমি পদে পদে অনুভৱ কৰিছো বুলিও নিজ ভাষণত উল্লেখ কৰিছিল মুখ্যমন্ত্ৰী শৰ্মাই। তেওঁৰ মতে, শৰাইঘাটৰ যুদ্ধৰ বিষয়ে সৱিশেষ আমাক কোনেও কোৱা নাছিলে, কাৰণ শৰাইঘাটৰ যুদ্ধৰ বিষয়ে বাওঁপন্থীসকলে জনাব বিচৰা নাছিল।
এই বক্তব্যৰ পৰাই এইটো ধাৰণাত কৰা অসুবিধা নহয় যে মুখ্যমন্ত্ৰীয়ে এইবাৰ বাঘ হাজৰিকা অথবা নৰ হাজৰিকা সৈতে স্বামী বিবেকানন্দক অনিচ্ছাকৃতভাৱে টানি অনা নাই। সেয়ে হিন্দুত্ববাদী ইতিহাসৰ নকল-নবিচি কৰিবলৈকে মুখ্যমন্ত্ৰী ডঃ শৰ্মাই এইবাৰ ইতিহাস বিকৃতকৰণতে সীমাৱদ্ধ নাথাক চূড়ান্ত ভেঙুচালি কৰা বুলিয়ে ধাৰণা কৰা হৈছে।
