ক’ভিড পৰিস্থিতিৰ বাবে ৰাজ্যত বন্ধ হৈ থকা আন্তঃ জিলা যাতায়াত কেতিয়া খুলিব? মুখ্যমন্ত্ৰী হিমন্ত বিশ্ব শৰ্মাই এই সন্দৰ্ভত দেওবাৰে কয় যে সাতখন জিলাকে ধৰি বাকীকেইখন জিলাতো আন্তঃজিলা জিলা খুলি দিয়াটো এই মুহূৰ্তত সম্ভৱ নহয়৷
তেওঁ কয় যে ৰে’ল চলাচল অব্যাহত থাকিব। ৰে’ল সেৱা বন্ধ কৰাতো সম্ভৱ নহয় কিয়নো ৰে’ল সেৱাৰ সৈতে বহুতো দিশ জড়িত হৈ আছে।
দেওবাৰে মুখ্যমন্ত্রীগৰাকীয়ে সম্পূৰ্ণ কন্টেইনমেন্ট জিলা হিচাপে ঘোষিত সাতখন জিলাৰ পৰিস্থিতিৰ বিষয়ে জিলা উপায়ুক্তসকলৰ সৈতে ভিডিঅ’ কনফাৰেঞ্চ যোগে কথা পাতে ৷
আনহাতে, শনিবাৰে ৰাজ্যৰ মুখ্যমন্ত্ৰী হিমন্ত বিশ্ব শৰ্মাই এক সংবাদমেলযোগে ক’ভিড পৰিস্থিতি অনিয়ন্ত্ৰিত হৈ থকা ৭ খন জিলাক বাদ দি ৰাজ্যৰ বাকী জিলাসমূহত বুধবাৰৰ বিয়লি ৪ বজাৰ পৰা কাৰ্ফিউ প্ৰযোজ্য হ’ব বুলি ঘোষণা কৰিছিল।
এই সন্দৰ্ভত ৰাজ্য চৰকাৰৰ তৰফৰ পৰা নতুন এছ অ’ পি অহা মঙলবাৰৰ ভিতৰত প্ৰকাশ পোৱাৰ সম্ভাৱনা আছে বুলিও তেওঁ ব্যক্ত কৰিছিল।
মুখ্যমন্ত্ৰী ডঃ শৰ্মাই জনোৱা মতে ‘গোৱালপাৰা, গোলাঘাট, যোৰহাট, শোণিতপুৰ, বিশ্বনাথ, লখিমপুৰ আৰু মৰিগাঁৱত এতিয়াও কোভিড পৰিস্থিতি চিন্তনীয় তথা নিয়ন্ত্ৰণলৈ অহা নাই।”
উপৰোক্ত জিলা কেইখনৰ বাহিৰে বাকী সকলোবোৰ জিলা ৩ বজালৈকে দোকান-পোহাৰ চৰকাৰী-বেচৰকাৰী কাৰ্যালয় খোলা ৰখাৰ অনুমতি দিয়া হ’ব বুলি তেওঁ ঘোষণা কৰিছিল।
ইপিনে তেওঁ জানিবলৈ দিছিল অনুসৰি শিৱসাগৰ আৰু ডিব্ৰুগড় জিলাৰ ওপৰত এতিয়াও কঠোৰ দৃষ্টি ৰখা হৈছে।
আনহাতে, গুৱাহাটী মহানগৰত সান্ধ্য আইন সন্ধিয়া ৫ বজাৰ পৰাই চলি থকাৰ সম্ভাৱনা থকা বুলিও তেওঁ জানিবলৈ দিছিল।
