মুখ্য মন্ত্ৰী সৰ্বানন্দ সোণোৱালে সোমবাৰে নিজৰ জীৱনৰ শংকা নেওচিও কোভিড-১৯ৰ বাতৰি যুগুত কৰা ৰাজ্যখনৰ সাংবাদিকসকলক ৫০ লাখ টকাৰ জীৱন বীমা আগবঢ়োৱাৰ কথা ঘোষণা কৰিছে।
সোমবাৰে এই কথা ঘোষণা কৰি মুখ্য মন্ত্ৰী সোণোৱালে টুইটাৰত লিখিছে: ‘’ফ্ৰন্টলাইনত থকা সাংবাদিকসকলে তেওঁলোকৰ জীৱনৰ শংকা লৈও, সকলো প্ৰতিকূলতাৰ বিৰুদ্ধে সাহসেৰে কোভিড-১৯ৰ বাতৰি যুগুত কৰিছে আৰু তেওঁলোক আমাৰ প্ৰকৃত নায়ক। আমাৰ চৰকাৰে তেওঁলোকৰ প্ৰত্যেকৰ বাবে ৫০লাখ টকাৰ জীৱন বীমা আগবঢ়াব।‘’
জাৰ্মেলিষ্ট য়ুনিয়ন অফ আছাম(JUA), ইয়াৰ পিতৃ সংগঠন ইণ্ডিয়ান জাৰ্ণেলিষ্ট য়ুনিয়ন(IJU), গুৱাহাটী প্ৰেছ ক্লাৱ, দিছপুৰ প্ৰেছ ক্লাৱ আৰু জাৰ্ণেলিষ্ট এছোচিয়েশ্যন অফ আছাম(জাফা)ই মুখ্য মন্ত্ৰীৰ এই সিদ্ধান্তক আদৰণি জনাইছে।
মুখ্য মন্ত্ৰীৰ ঘোষণাক আদৰমি জনাই JUA আৰু IJUৰ সভাপতি গীতাৰ্থ পাঠক, JUAৰ সাধাৰণ সম্পাদক ধনজিৎ কুমাৰ দাসে কয়,’’JUA আৰু ইয়াৰ পিতৃ সংগঠন IJUয়ে ইয়াৰ পূৰ্বে চৰকাৰক চিকিৎসক আৰু স্বাস্থ্যকৰ্মীৰ লগতে সাংবাদিকসকলকো কোভিড-১৯ বীমা আগবঢ়োৱাৰ দাবী জনাইছিল।‘’
গুৱাহাটী প্ৰেছ ক্লাৱে কোভিড-১৯ৰ বাতৰি যুগুত কৰা ৰাজ্যখনৰ সাংবাদিকসকলক ৫০ লাখ টকাৰ জীৱন বীমা আগবঢ়োৱাৰ সিদ্ধান্তক আদৰণি জনাইছে।
এক বিবৃতিত গুৱাহাটী প্ৰেছ ক্লাৱৰ সভাপতি মনোজ কুমাৰ নাথ আৰু সাধাৰণ সম্পাদক সঞ্জয় ৰায়ে কৰ্তব্যৰত সাংবাদিকসকলে সন্মুখীন হোৱা স্বাস্থ্যৰ শংকাৰ প্ৰতি লক্ষ্য ৰাখি মুখ্য মন্ত্ৰী সোণোৱালে সময়কালীন সিদ্ধান্ত গ্ৰহণ কৰাৰ বাবে ধন্যবাদ জ্ঞাপন কৰে।
গুৱাহাটী প্ৰেছ ক্লাৱে অলপতে মুখ্য মন্ত্ৰীক সাংবাদিকসকলৰ জীৱন বীমাৰ বিষয়টো বিবেচনা কৰাৰ বাবে অনুৰোধ কৰিছিল।
আনহাতে, জাৰ্ণেলিষ্ট এছোচিয়েশ্যন ফৰ আছাম চমুকৈ জাফা আৰু দিছপুৰ ক্লাৱেও মুখ্য মন্ত্ৰীৰ এই সিদ্ধান্তক আদৰণি জনাইছে। সংগঠন দুটাই কিছুদিন পূৰ্বে এই সন্দৰ্ভত মুখ্য মন্ত্ৰী আৰু স্বাস্থ্য মন্ত্ৰীক স্মাৰক পত্ৰ প্ৰদান কৰিছিল।
