মুখ্য মন্ত্ৰী সোণোৱাল আৰু ৰাজ্যিক বিজেপিৰ সভাপতি ৰঞ্জিত দাস সহিতে দলটোৰ ৰাজ্যিক নেতৃত্বই আজি উত্তৰ পূব পৰিষদৰ সন্মিলনস্থলীতে কেন্দ্ৰীয় গৃহ মন্ত্ৰী অমিত শ্বাহক সাক্ষাৎ কৰি এন আৰ চিৰ বিসংগতিক লৈ এক স্মাৰকপত্ৰ প্ৰদান কৰে।
মুখ্য মন্ত্ৰীয়ে দলটোক সংগ দিয়াৰ ঘটনাই এন আৰ চি সম্পৰ্কত তেওঁৰ যে আপত্তি আছে তাৰ ইংগিত বহন কৰিছে।
এন আৰ চি প্ৰকাশ হোৱা এসপ্তাহৰো বেছি হ’ল যদিও ৰাজ্যখনৰ মুৰব্বী হিচাপে সৰ্বানন্দ সোণোৱালে এই সম্পৰ্কত লক্ষণীয় নীৰৱতা অৱলম্বন কৰি আহিছিল।
কেন্দ্ৰীয় গৃহ মন্ত্ৰীজনে সভাপতি ৰঞ্জিত দাস আৰু মুখ্য মন্ত্ৰী সৰ্বানন্দ সোণোৱালৰ নেতৃত্বত যোৱা বিজেপিৰ সঁজাতী দলটোৰ সৈতে আধা ঘণ্টা সময় এন আৰ চি সন্দৰ্ভত আলোচনা কৰে।
সংবাদ মাধ্যমৰ আগত সভাপতি ৰঞ্জিত দাসে কয়, স্মাৰকপত্ৰত এন আৰ চিত লাখ লাখ বিদেশীৰ নাম অন্তৰ্ভুক্ত হৈছে আৰু তাৰ বিপৰীতে লাখ লাখ স্বদেশীৰ নাম বাদ পৰা বুলি উল্লেখ কৰা হয়।
দাসৰ মন্তব্যৰ দ্বাৰা প্ৰমাণ হয় যে মুখ্য মন্ত্ৰী সৰ্বানন্দ সোণোৱালো বিজেপিৰ দলীয় স্থিতিৰ সৈতে একমত আৰু তেৱোঁ এন আৰ চিত লাখ লাখ বিদেশীৰ নাম সোমোৱা বুলি ভাবে।
যোৱা ৩১ আগষ্টত চূড়ান্ত এন আৰ চি প্ৰকাশ পোৱাৰ প্ৰাক মুহূৰ্তত মুখ্য মন্ত্ৰীজনে ইয়াক জাতীয় দলিল আখ্যা দিছিল।
“কোনো বিদেশী ভাৰতত থাকিব নোৱাৰিব তথা ১৯৭১ চনৰ আগৰ ভাৰতীয়ৰ নাম বাদ পৰিব নোৱাৰিব”, সঁজাতী দলটোক আশ্বাস দিয়া বুলি দাবী কৰি কেন্দ্ৰীয় গৃহ মন্ত্ৰীজনৰ উদ্ধৃতি ৰঞ্জিত দাসৰ।
দাসে লগতে কয়, “কেন্দ্ৰীয় গৃহ মন্ত্ৰীজনে ইতিমধ্যে ইয়াৰ পৰিকল্পনা কৰা বুলি কৈছে। আগন্তুক দিনত পৰিকল্পনাসমূহ বাস্তৱত দেখিবলৈ পাব। নাম বাদ পৰা ভাৰতীয় লোকে চিন্তা কৰাৰ কোনো কাৰণ নাই বুলি তেওঁ কৈছে।”
ইপিনে কাইলৈ কলাক্ষেত্ৰত হ’ব লগীয়া নেডাৰ বৈঠকতো শ্বাহে এন আৰ চি সন্দৰ্ভত বিতংকৈ বক্তব্য ৰাখিব বুলি দাসে জানিবলৈ দিয়ে।
দলটোত মুখ্য মন্ত্ৰী সৰ্বানন্দ সোণোৱাল, সভাপতি ৰঞ্জিত দাসকে ধৰি মন্ত্ৰী হিমন্ত বিশ্ব শৰ্মা, মন্ত্ৰী পৰিমল শুক্লবৈদ্য, ৰাজ্যিক সাংগঠনিক সম্পাদক ফণীন্দ্ৰ নাথ শৰ্মা আছিল।
