প্ৰাক্তন প্ৰধানমন্ত্ৰী অটল বিহাৰী বাজপেয়ী মন্ত্ৰী সভাৰ প্ৰাক্তন কেন্দ্ৰীয় মন্ত্ৰী দিলীপ ৰায়ক কয়লা কেলংকাৰিৰ সৈতে জড়িত থকাৰ অপৰাধত তিনি বছৰৰ কাৰাদণ্ড বিহা হৈছে।
চিবিআইৰ বিশেষ আদালতে আজি সোমবাৰে প্ৰাক্তন মন্ত্ৰী তথা বিজেপিৰ নেতাগৰাকীক দহ বছৰৰ অন্তত দোষী সাব্যস্ত কৰি এই কাৰাদণ্ড বিহাৰ লগতে ১০ লাখ টকাৰ জৰিমনাও বিহিছে।
উল্লেখ্য যে, তদানীন্তন প্ৰধানমন্ত্ৰী অটল বিহাৰী বাজপেয়ীৰ আমোলৰ এন ডি এ চৰকাৰৰ কয়লা দপ্তৰৰ ৰাজ্য মন্ত্ৰী দিলীপ ৰায়ৰ বিৰুদ্ধে ১৯৯৯ চনত ঝাৰখণ্ডৰ গিৰিডি ব্লকৰ কয়লা আৱন্টত অনিয়ম সংঘটিত কৰাৰ অভিযোগ উত্থাপন হৈছিল।
ইয়াৰ পিছতে চিবিআই-এ এই অনিয়মৰ তদন্ত কৰাৰ লগতে চিবিআইৰ আদালত বিচাৰ প্ৰক্ৰিয়াৰো আৰম্ভ কৰে।
সোমবাৰে বিচাৰপতি ভৰত পৰাশৰৰ চিবিআইৰ বিশেষ আদালতে ভাৰতীয় দণ্ডবিধি আইনৰ ৪০৯, ৪২০, ১২০-বি ধাৰাত দোষী সাব্যস্ত কৰি প্ৰাক্তন কেন্দ্ৰীয় মন্ত্ৰী দিলীপ ৰায়ক ১০ লাখ টকাৰ জৰিমনাৰ সৈতে তিনি বছৰৰ কাৰাদণ্ড বিহিছে।
ইফালে আদালতত চিবিআই-এ প্ৰাক্তন কেন্দ্ৰীয় মন্ত্ৰী ৰায়ৰ বিৰুদ্ধে যাৱজ্জীৱন কাৰাদণ্ডৰ দাবী কৰিছিল।
উল্লেখ্যে যে ওড়িশাৰ বিজু জনতা দলৰ নেতা দিলীপ ৰায়ে ২০০২ চনত বিজেপি দলত যোগদান কৰি ৰাজ্যসভাৰ সাংসদ হিচাপেও নিৰ্বাচিত হৈছিল।
