অসমত দ্ৰুত হাৰত বৃদ্ধি পাইছে ক’ৰ’নাত আক্ৰান্ত হোৱা লোকৰ সংখ্যা। ৰাজ্যখনত আৰু এজন COVID-19 পজিটিভ ৰোগীৰ ঘটনা পোহৰলৈ আহিছে।
ইয়াকে লৈ ৰাজ্যখনত এতিয়ালৈকে কৰ’না ভাইৰাছত আক্ৰান্ত ৰোগীৰ সংখ্যা ২৬ জনলৈ বৃদ্ধি পালে।
স্বাস্থ্য মন্ত্ৰী হিমন্ত বিশ্ব শৰ্মাই শনিবাৰে নিশা টুইটাৰ যোগে নিশ্চিত কৰে যে কাছাৰ জিলাৰ এগৰাকী লোকৰ দেহত COVID-19 পজিটিভ পোৱা গৈছে।
এই ঘটনাৰ পাছত বৰাক উপত্যকাত COVID-19 পজিটিভ পোৱা ৰোগীৰ সংখ্যা দুজনলৈ বৃদ্ধি পালে।
বৰাক উপত্যকাৰ কৰিমগঞ্জ জিলাত অসমৰ প্ৰথমটো পজিটিভ ৰোগীৰ ঘটনা পোৱা গৈছিল।
স্বাস্থ্য মন্ত্ৰীগৰাকীয়ে শনিবাৰে টুইটাৰত কয়: ‘’কাছাৰ জিলাৰ পৰা আৰু এজন COVID-19 পজিটিভ ৰোগীৰ ঘটনা নিশ্চিত হৈছে। অসমত মুঠ আক্ৰান্তৰ সংখ্যা ২৬ জনলৈ বৃদ্ধি পালে।‘’
Alert ~ one more #Covid_19 positive case from Cachar District has been confirmed, taking the total number in Assam to 26.
This patient is also related to #NizamuddinMarkaz event in Delhi.
Update at 11.15pm / April 4
— Himanta Biswa Sarma (@himantabiswa) April 4, 2020
মন্ত্ৰী শৰ্মাই জানিবলৈ দিয়া মতে শেহতীয়া এই ঘটনাটোও দিল্লীৰ নিজামুদ্দিনৰ তবলিগী জামাত মাৰ্কাজৰ সৈতে জড়িত।
শনিবাৰে ৰাতিপুৱা স্বাস্থ্য মন্ত্ৰী শৰ্মাই লখিমপুৰ জিলাৰ প্ৰথমগৰাকী COVID-19 পজিটিভ ৰোগী ধৰা পৰাৰ কথা নিশ্চিত কৰিছিল।
লখিমপুৰৰ COVID-19 পজিটিভ ৰোগীজনেও দিল্লীৰ নিজামুদ্দিনৰ তবলিগী জামাত মাৰ্কাজৰ সমাৱেশত উপস্থিত আছিল বুলি মন্ত্ৰী শৰ্মাই জনাইছিল।
আক্ৰান্ত লোকজন লখিমপুৰ চহৰৰ কে বি ৰোডৰ বাসিন্দা। তেওঁ দিল্লীৰ তবলিগী জামাত মাৰ্কাজলৈ মাৰ্চৰ প্ৰথমভাগত গৈছিল আৰু যোৱা ২০ মাৰ্চত ঘৰলৈ উভতি আহিছিল।
তেওঁক বৰ্তমান উত্তৰ লখিমপুৰ অসামৰিক হাস্পাতলৰ আইছ’লেশ্যন ৱাৰ্ডত ৰখা হৈছে।
ইয়াৰ পূৰ্বে গুৱাহাটীৰ স্পেনিছ গাৰ্ডেনৰ এগৰাকী বাসিন্দাৰ COVID-19 পজিটিভ ধৰা পৰিছিল আৰু তেওঁক বৰ্তমান এম এম চি হাস্পাতলত চিকিৎসাৰ বাবে ভৰ্তি কৰা হৈছে।
উল্লেখযোগ্য যে, ৩ এপ্ৰিলত ৰাজ্যত মুঠ আঠগৰাকী ব্যক্তি ক’ৰ’নাত আক্ৰান্ত হৈছিল।
৩১ মাৰ্চত ৰাজ্যত প্ৰথমগৰাকী ক’ৰ’না আক্ৰান্ত ব্যক্তি চিনাক্ত হোৱাৰ পাছত মাত্ৰ পাঁচ দিনৰ ভিতৰতে এই সংখ্যাই ২৬ গৰাকী স্পৰ্শ কৰে।
আনহাতে, বৰ্তমানলৈ অসমত ক’ৰ’নাত আক্ৰান্ত হোৱা ২৬ গৰাকী লোকৰ ভিতৰত ২৫গৰাকী লোকৰে দিল্লীৰ নিজামুদ্দিন জামাতত সৈতে সম্পৰ্ক আছিল।
