কংগ্ৰেছে জৰাজীৰ্ণ পথৰ বিৰুদ্ধে কলিয়াবৰত মঙলবাৰে পৃথকে পৃথকে প্ৰতিবাদ সাব্যস্ত কৰিছে।
কলিয়াবৰৰ মিছাৰ পৰা আমনিলৈ ৩৭নং ৰাষ্ট্ৰীয় ঘাইপথৰ জৰাজীৰ্ণ ৰূপে দুৰ্ভোগ ভোগাই আহিছে ৰাইজক।
প্ৰতিদিনে হাজাৰ হাজাৰ গাড়ী উজনিৰ পৰা নামনিলৈ এই ৩৭নং ৰাষ্ট্ৰীয় ঘাইপথৰ মিছা আৰু আমনিৰ মাজেৰে পাৰ হৈ যাবলগীয়া হয়।
কিন্তু এই ৰাষ্ট্ৰীয় ঘাইপথৰ মিছাৰ পৰা আমনি পৰ্যন্ত ৰাস্তাৰ মাজত প্ৰকাণ্ড প্ৰকাণ্ড গাতে ৰাইজক বিপদত পেলাইছে।
অতিকৈ ব্যস্ত এই ৩৭নং ৰাষ্ট্ৰীয় ঘাইপথৰ এই পথছোৱাত নিতৌ সৰু বৰ দুৰ্ঘটনা সংঘটিত হৈ ৰাইজ মৃত্যুৰ মুখত পৰিবলগীয়া হৈছে।
মুখ্য মন্ত্ৰী সৰ্বানন্দ সোণোৱাল এই পথেৰেই অহা যোৱা কৰিছে যদিও বিভাগীয় কৰ্তৃপক্ষই কোনো ধৰণৰ গুৰুত্ব প্ৰদান কৰা নাই এই পথটোৰ ওপৰত।
যাৰ ফলত আজি পশ্চিম কলিয়াবৰ ব্লক কংগ্ৰেছৰ উদ্যোগত কলিয়াবৰৰ মিছাত ৰাষ্ট্রীয় ঘাইপথৰ জৰাজীৰ্ণ ৰূপৰ প্ৰতিবাদ স্বৰূপে ঘোঁৰা গাড়ীত উঠি কলিয়াবৰৰ কংগ্ৰেছ দলে এক প্ৰতিবাদ সাব্যস্ত কৰি এক প্ৰতিবাদী কাৰ্য্যসূচী ৰূপায়ন কৰে।
আনহাতে কলিয়াবৰৰ আন এটা গৰকাপ্তানী পথৰ দুৰৱস্থাই জিয়াটো ভোগাইছে স্থানীয় ৰাইজক।
কলিয়াবৰৰ শালনা ,লেংটেং ,আঞ্জুকপানী সংযোগী পথৰ দুৰৱস্থাৰ বাবেই প্ৰতি দিনেই জীয়াতু ভুগি আহিছে স্থানীয় ৰাইজ।
যদিও বিগত সময়চোৱাত উক্ত পথ চোৱা নতুনকৈ নিৰ্মান হৈছিল যদিও ৰাস্তাৰ বহন ক্ষমতাতকৈ বহু বেছি ওজনৰ শিল ভৰ্ত্তি ডাম্পাৰ অহা যোৱা কৰি পথ চোৱা জৰাজীৰ্ণ অৱস্থাৰ সৃষ্টি কৰাৰ গুৰুতৰ অভিযোগ উত্থাপন কৰিছে কলিয়াবৰৰ কংগ্ৰেছৰ বিষয়ববীয়াই।
সেয়ে উক্ত পথ চোৱাৰ পুনৰ নিৰ্মাণৰ কাম অচিৰেই কৰাৰ দাবীৰে পশ্চিম কলিয়াবৰ ব্লক কংগ্ৰেছৰ উদ্যোগত বিধ্বস্ত গৰকাপ্তানি পথচোৱাত আজি দিনৰ ১১ বজাৰ পৰা ১ বজালৈ শালনা লেংটেং সংযোগী পথত প্ৰতিবাদ সাব্যস্ত কৰে পশ্চিম কলিয়াবৰ ব্লক কংগ্ৰেছৰ বিষয় ববীয়াই।
চৰকাৰ বিৰোধী বিভিন্ন শ্ল’গান তথা মন্ত্ৰী কেশৱ মহন্ত গ’বেগ ধ্বনিৰে প্ৰতিবাদস্থলী উত্তাল কৰি তোলে কংগ্ৰেছৰ প্ৰতিবাদকাৰীয়ে।
লগতে গধুৰ যানবাহন তথা ডাম্পাৰ চলাচল বন্ধ কৰাৰ দাবীৰে অসমৰ মুখ্যমন্ত্ৰী সৰ্বানন্দ সোণোৱাললৈ এখন স্মাৰক পত্ৰ কলিয়াবৰ মহকুমাধিপতিৰ জৰিয়তে প্ৰদান কৰে।
