হৰ্ছ ট্ৰেডিঙৰ ভয়ত অসম এৰি কংগ্ৰেছ মহাজোঁটৰ সকলো প্ৰাৰ্থীকে আৰব বা ৰাজস্থানৰ জয়পুৰলৈ নিয়া হৈছে বুলি চৰ্চা চলি আছিল যদিও কেৱল এআইয়ুডিএফৰ প্ৰাৰ্থীসকলকহে নিয়া হৈছে জয়পুৰলৈ।
কিন্তু বৰ্তমানো অসমতে আছে ২০২১ ৰ বিধানসভা নিৰ্বাচনৰ কংগ্ৰেছৰ প্ৰাৰ্থীসকল। কংগ্ৰেছৰ এক উচ্চস্তৰীয় সূত্ৰই জনাইছে এই কথা।
তেওঁৰ মতে কংগ্ৰেছৰ বিধায়ক প্ৰাৰ্থীসকল ভুলতো বিজেপিলৈ নাযায় বা এইবাৰ কংগ্ৰেছ মহাজোঁটে অসমত চৰকাৰ গঠন কৰাটো নিশ্চিত।
উল্লেখযোগ্য যে, বিজেপিৰ এগৰাকী প্ৰতাপী তথা ‘দক্ষ মন্ত্ৰী’ হিমন্ত বিশ্ব শৰ্মা ঘোঁৰা ক্ৰয় কৰাত পাকৈত বুলি পূৰ্বৰে পৰা অভিযোগ উঠি আহিছে।
এটা সময়ত কংগ্ৰেছত থাকোতে ৰুমী নাথ, ৰ’জলিনা তিৰ্কীকে ধৰি বহু বিজেপিৰ বিধায়কক (ঘোঁৰা) ক্ৰয় কৰি হৰ্ছ ট্ৰেডিঙৰ শিতানত নিজৰ নাম অন্তৰ্ভূক্ত কৰিবলৈ সক্ষম হৈছিল।
ঠিক সেইদৰে বিটিচি পৰিষদীয় নিৰ্বাচনতো বিপিএফৰ পৰা য়ুপিপিএললৈ পাৰিষদ অনাৰ ক্ষেত্ৰতো দক্ষ মন্ত্ৰীগৰাকীৰ অৰিহণা নথকা নহয়।
ইয়াক লৈ এতিয়া সচেতন আৰু সক্ৰিয় হৈ উঠিছে কংগ্ৰেছৰ বিধায়কপ্ৰাৰ্থীসকল।
আমি পূৰ্বতে উল্লেখ কৰা সূত্ৰটোৱে দাবী কৰা মতে ‘এতিয়া হিমন্ত বিশ্ব শৰ্মা কংগ্ৰেছলৈ আহে বুলিহে ভয় কৰিছে কংগ্ৰেছ প্ৰাৰ্থীসকলে। হিমন্ত বিশ্ব শৰ্মাৰ মতেহে টিকট দিয়া হ’ল বিজেপিৰ প্ৰাৰ্থীসকলক। গতিকে বিজেপিয়ে চৰকাৰ গঠন কৰাৰ আশা নাই। তেওঁ ব্যক্তিগত স্বাৰ্থত টিকট দিয়ালে।‘
‘তথ্য অনুসৰি হিমন্ত বিশ্ব শৰ্মাৰ ভুলৰ বাবে হাগ্ৰামা মহিলাৰী কংগ্ৰেছ মহাজোঁটলৈ গ’ল। গতিকে মুখ্যমন্ত্ৰী সৰ্বানন্দ সোণোৱালে মন্ত্ৰী হিমন্ত বিশ্ব শৰ্মাক বাঁহ দি প্ৰধানমন্ত্ৰী আৰু ৰাষ্ট্ৰীয় সভাপতিলৈ ৰিপ’ৰ্ট পঠাইছে। বিজেপি পৰাজিত হ’লে গোটেই বদনাম হিমন্ত বিশ্ব শৰ্মাৰ ওপৰতে পৰিব।‘
উল্লেখযোগ্য যে, মন্ত্ৰী হিমন্ত বিশ্ব শৰ্মাই বিগত ৪ দিনত ৭ টাকৈ মন্দিৰ দৰ্শন কৰিছে। মালিনী থান, ব্ৰটদৱা থান, মহা-মৃত্যুঞ্জয় মন্দিৰ, কামাখ্যাকে ধৰি কালি ত্ৰিপুৰালৈয়ো মন্দিৰ দৰ্শনৰ বাবে হিমন্ত বিশ্ব শৰ্মা যোৱা বুলি সূত্ৰটোৱে প্ৰকাশ কৰিছে।
‘মানুহটো এতিয়া অস্থিৰ হৈ পৰিছে। বিজেপিৰ ৪০-৪৫ গৰাকী বিধায়ক প্ৰাৰ্থী জয়ী হ’লে যদি ১৫ গৰাকী বিধায়ক লৈ কংগ্ৰেছলৈ আহিলে ডাঙৰ কথা হ’ব। গতিকে হিমন্ত বিশ্ব শৰ্মা কংগ্ৰেছলৈ অহা ৰাস্তাটো বন্ধ কৰিব লাগে।‘ নাম প্ৰকাশত অনিচ্ছুক সূত্ৰটোৱে কয়।
ইপিনে, বিপিএফৰ বিধায়ক প্ৰাৰ্থীসকলক বিহাৰলৈ পঠিওৱা হৈছে বুলি প্ৰকাশ কৰা বাতৰিও অসত্য বুলি দাবী কৰে সূত্ৰটোৱে।
ইপিনে, সূত্ৰটোৰ দাবীৰ বিপৰীতে কংগ্ৰেছ মহাজোঁটলৈ মন্ত্ৰী হিমন্ত বিশ্ব শৰ্মাক আমন্ত্ৰণহে জনালে কংগ্ৰেছৰ বিহপুৰীয়া সমষ্টিৰ বিধায়ক প্ৰাৰ্থী ভূপেন বৰাই।
উল্লেখযোগ্য যে, এআইয়ুডিএফৰ ১৮ গৰাকী প্ৰাৰ্থী এতিয়াও জয়পুৰৰ এখন হোটেলত আছে আৰু তেওঁলোকে ফলাফল ঘোষণাৰ কিছুদিন পাছতহে অসমলৈ আহিব বুলি জানিব পৰা গৈছে।
