বিজেপি দলে ভোট গণনা প্ৰক্ৰিয়াত জড়িত থকা সকলো স্তৰৰ ব্যক্তি বিষয়া-কৰ্মচাৰীৰ ওপৰত এক মানসিক চাপ সৃষ্টি কৰাৰ চেষ্টা চলাইছে
শনিবাৰে এক সংবাদমেলত অসম প্ৰদেশ কমিটিৰ জ্যেষ্ঠ মুখপাত্ৰ তথা সাধাৰণ সম্পাদক অপূৰ্ব কুমাৰ ভট্টাচাৰ্য্যই ইলেক্ট্ৰনিক আৰু ছপা মাধ্যমত প্ৰচাৰ হোৱা বিধানসভা নিৰ্বাচনৰ ফলাফলৰ Exit Poll অধিকাংশই কাল্পনিক আৰু উদ্দেশ্য প্ৰণোদিত বুলি উল্লেখ কৰে।
আনহাতে বিজেপিয়ে দলৰ ভোট গণনা প্ৰক্ৰিয়াত জড়িত থকা সকলো স্তৰৰ ব্যক্তি বিষয়া- কৰ্মচাৰীৰ ওপৰত এক মানসিক চাপ সৃষ্টি কৰাৰ চেষ্টা চলাইছে বুলিও তেওঁ উল্লেখ কৰে।
বিজেপিক উদ্দেশ্যি কংগ্ৰেছৰ নেতা ভট্টাচাৰ্য্যই প্ৰশ্ন কৰে ” কি প্ৰতিক্ৰিয়াৰ আধাৰত সমষ্টি সমূহত বিজেপিয়ে ঘোষণানুযায়ী ভোট লাভ কৰিব?আজিলৈকে এনে ধৰণৰ কোনো ব্যৱস্থা নাছিল।এনে কাৰ্য্যই প্ৰচলিত গণতান্ত্ৰিক ব্যৱস্থাটোক উপহাস কৰা নাই নে?
তেওঁ লগতে কয় “আমি কংগ্ৰেছ দলৰ লগতে মহাজোঁটৰ প্ৰাৰ্থী হৈ গণনা কাৰ্যত যি কোনো ধৰণৰ অনিয়মৰ বিৰুদ্ধে বিধিগতভাবে প্ৰতিবাদ সাৱস্ত্য কৰিবলৈ আহ্বান জনালোঁ।এই সন্দৰ্ভত কংগ্ৰেছ দলে গঠন কৰা সমিতিয়ে সকলো ধৰণৰ পৰিস্থিতিৰ মোকাবিলা কৰিবলৈ প্ৰস্তুতি সম্পূৰ্ণ কৰিছে।”
ভাৰতৰ নিৰ্বাচন আয়োগৰ নিৰপেক্ষতাৰ ওপৰত তেওঁলোকৰ সম্পূৰ্ণ বিশ্বাস আছে বুলি উল্লেখ কৰি তেওঁ আৰু কয় “তেওঁলোক কোনো ধৰণে প্ৰভাৱান্বিত হৈ নিজৰ গৰিমা নষ্ট হবলৈ নিদিয়ে।”
