বিজেপিৰ দাবী— দেশত সাম্প্ৰদায়িক সম্প্ৰীতি বিনষ্ট হোৱাৰ বাবে দায়ী কংগ্ৰেছ আৰু অন্যান্য দল
দেশত সাম্প্ৰদায়িক সদ্ভাৱ বিনষ্ট হোৱাৰ বাবে বিজেপিয়ে দায়ী কৰিছে কংগ্ৰেছ আৰু অন্যান্য দলক। কালি শেহতীয়াকৈ সংঘটিত সাম্প্ৰদায়িক হিংসাত্মক ঘটনা সন্দৰ্ভত ১৩ টা বিৰোধী নেতাৰ বিবৃতিৰ পিছতে বিজেপিয়ে প্ৰতিক্ৰিয়া ব্যক্ত কৰিছে।
ভাৰতীয় জনতা পাৰ্টিৰ (বিজেপি) নেতা গৌৰৱ ভাটিয়াই বিৰোধী দল সমূহৰ বিবৃতি সন্দৰ্ভত তীব্ৰ প্ৰতিক্ৰিয়া ব্যক্ত কৰি কয় যে কংগ্ৰেছ আৰু অন্যান্য দলে সম্প্ৰদায়সমূহৰ মাজত সম্প্ৰীতি ব্যাহত কৰিছে।
বিজেপিৰ মুখপাত্ৰগৰাকীয়ে পশ্চিম বংগত সংঘটিত অগ্নিসংযোগ আৰু সাম্প্ৰদায়িক হিংসাৰ ঘটনাৰ উদাহৰণ দি বিৰোধী নেতাসকলক সমালোচনা কৰে।
তেওঁ কয়— “পশ্চিম বংগৰ মুখ্যমন্ত্ৰী মমতা বেনাৰ্জী বিবৃতিটোৰ এগৰাকী স্বাক্ষৰকাৰী। কিন্তু পশ্চিমবংগত বৃহৎ পৰিমাণে হিংসা সংঘটিত হৈছে। এনে ধৰণৰ প্ৰৱণতাই দেখুৱায় যে কংগ্ৰেছকে ধৰি বিৰোধী দলবোৰ সাম্প্ৰদায়িক সম্প্ৰীতি বিঘ্নিত কৰাৰ বাবে দায়ী। ” কংগ্ৰেছ আৰু বিৰোধী দলসমূহেই সাম্প্ৰদায়িক শক্তিসমূহক মানুহৰ ঘৰ জ্বলাবলৈ উচটনি দিয়া বুলিও ভাটিয়াই কয়।
উল্লেখ্য কংগ্ৰেছকে ধৰি ১৩ টা বিৰোধী দলে এক যুটীয়া বিবৃতি জাৰি কৰাৰ পিছত আৰু দেশৰ বিভিন্ন প্ৰান্তত শেহতীয়াকৈ সংঘটিত হিংসাত্মক ঘটনাৰ পৰিপ্ৰেক্ষিতত জনসাধাৰণক শান্তি আৰু সম্প্ৰীতি বজাই ৰাখিবলৈ আহ্বান জনোৱাৰ পিছতে বিজেপিয়ে এনেদৰে প্ৰতিক্ৰিয়া প্ৰকাশ কৰিছে।
বিৰোধী দলসমূহৰ কাৰ্যকলাপ তেওঁলোকে বিবৃতিটোত কোৱা কথাৰ বিপৰীত বুলিও দাবী কৰে ভাটিয়াই। ১৩ টা বিৰোধী দলৰ নেতাই সাম্প্ৰদায়িক হিংসাৰ সৈতে জৰিত অপৰাধীসকলক বিৰুদ্ধে কঠোৰ শাস্তি বিহাৰ দাবী জনাইছিল। বিবৃতিটোত ছোনিয়া গান্ধী (কংগ্ৰেছ), শাৰদ পাৱাৰ (এনচিপি), মমতা বেনাৰ্জী (টিএমচি), এম কে ষ্টেলিন (ডিএমকে), চিপিআই (এম)ৰ সীতাৰাম য়েচুৰী, ফাৰুক আব্দুল্লা (এনচি), তেজস্বী যাদৱ (আৰজেডি), ডি ৰাজা (চিপিআই), দেৱব্ৰত বিশ্বাস (ফৰৱাৰ্ড ব্লক), মনোজ ভট্টাচাৰ্য (আৰএছপি), পিকে কুনহালিকুট্টি (আইইউএমএল), আৰু চিপিআই (এমএল)ৰ দীপংকৰ ভট্টাচাৰ্যই স্বাক্ষৰ কৰিছিল।
বিৰোধী দলৰ নেতাসকলে অভিযোগ কৰিছিল যে প্ৰধানমন্ত্ৰী নৰেন্দ্ৰ মোদীয়ে সাম্প্ৰদায়িক হিংসাৰ ঘটনাসমূহ সন্দৰ্ভত নীৰৱ হৈ আছে ।