ৰন্ধন গেছৰ মূল্য পুনৰ বৃদ্ধি! প্ৰতিটো চিলিণ্ডাৰত বাঢ়িল ৬ টকা

১ মাৰ্চ শনিবাৰৰ পৰা পুনৰ বৃদ্ধি পালে ৰন্ধন গেছৰ মূল্য। এইবাৰ প্ৰতিটো বাণিজ্যিক চিলিণ্ডাৰত ৬ টকা বৃদ্ধি পাইছে।

ফলত আজিৰ পৰা ১৯ কেজি ওজনৰ এটা বাণিজ্যিক চিলিণ্ডাৰৰ বাবে ১,৯১৩ টকা খৰচ কৰিব লাগিব। উল্লেখ্য যে, ৰেষ্টুৰেণ্ট, হোটেলকে ধৰি বিভিন্ন ক্ষেত্ৰত বাণিজ্যিক গেছ চিলিণ্ডাৰ ব্যৱহাৰ কৰা হয়।

আন্তঃৰাষ্ট্ৰীয় বজাৰত তেলৰ মূল্যৰ উঠা-নমা হোৱাৰ লগে লগে ঘৰুৱা বজাৰতো পেট্ৰলিয়াম সামগ্ৰীৰ মূল্য বৃদ্ধি আৰু হ্ৰাস পায়। তাৰ ওপৰত ভিত্তি কৰি প্ৰতি মাহৰ ১ তাৰিখে গেছৰ মূল্য নিৰ্ধাৰণ কৰা হয়।

যোৱা বছৰো বাণিজ্যিক গেছৰ মূল্য একাধিকবাৰ বৃদ্ধি পাইছিল। নতুন বছৰতো এই ধাৰা অব্যাহত থকাৰ লগে লগে ব্যৱসায়ীসকল কিছু হেঁচাত পৰিছে।

কিন্তু ঘৰতে ৰন্ধা-বঢ়াৰ বাবে ব্যৱহাৰ কৰা ১৪.২ কেজিৰ এল পি জি গেছৰ চিলিণ্ডাৰৰ মূল্য অপৰিৱৰ্তিত হৈ আছে। ১৪.২ কেজি ওজনৰ এটা গেছ চিলিণ্ডাৰৰ মূল্য ৮২৯ টকা।