অনুসূচিত জাতি আয়োগৰ গুৰুত্বপূৰ্ণ পদ খালী হৈ আছে। কিন্তু তাত চৰকাৰে কাকো নিযুক্তি দিয়া নাই। শুকুৰবাৰে এনে অভিযোগ উত্থাপন কৰে বিৰোধী নেতা ৰাহুল গান্ধীয়ে। ত্থ প্ৰমান দাঙি ধৰি তেওঁৰ অভিযোগ এই চৰকাৰ দলিত বিৰোধী।
শুকুৰবাৰে ৰাহুল গান্ধীয়ে নিজৰ এক্স হেণ্ডেলত মোডী চৰকাৰক তীব্ৰ সমালোচনা কৰি লিখিছে- ‘’বিজেপি চৰকাৰৰ দলিত বিৰোধী মানসিকতাৰ আন এক প্ৰমাণ পোহৰলৈ আহিছে। অনুসূচিত জাতি আয়োগে দলিতসকলৰ অধিকাৰ সুৰক্ষিত কৰাৰ বাবে কাম কৰে। সেই কাৰ্যালয়ক ইচ্ছাকৃতভাৱে আওকাণ কৰা হৈছে। এই বিভাগৰ দুটা গুৰুত্বপূৰ্ণ পদ বিগত এবছৰ ধৰি খালী হৈ আছে। কিন্তু চৰকাৰৰ কোনো কাণসাৰ নাই।‘’
ছ’চিয়েল মিডিয়াত ৰাহুলে লগতে লিখিছে যে এই আয়োগ এটা সাংবিধানিক সংস্থা। ফলত অনুসূচিত জাতি আয়োগক দুৰ্বল কৰি তোলাটো দলিতসকলৰ সাংবিধানিক আৰু সামাজিক অধিকাৰৰ ওপৰত প্ৰত্যক্ষ আক্ৰমণ। আয়োগ নাথাকিলে দলিতৰ কথা কোনে শুনিব? তেওঁলোকৰ অভিযোগৰ তদন্ত কোনে কৰিব? প্ৰধানমন্ত্ৰীলৈ মোৰ অনুৰোধ অনুসূচিত জাতি আয়োগৰ বিষয়াৰ খালী পদ শীঘ্ৰে পূৰণ কৰক যাতে দলিতৰ অধিকাৰ সুনিশ্চিত হয়। আৰু চৰকাৰে নিজৰ দায়িত্ব সঠিকভাৱে পালন কৰিব পাৰে।
ইয়াৰ পূৰ্বে ৰাহুল গান্ধীয়ে অভিযোগ কৰিছিল যে দলিত সম্প্ৰদায়ৰ কোনো লোকক গুৰুত্বপূৰ্ণ চৰকাৰী পদত নিযুক্তি দিয়া হোৱা নাই। যোৱা বছৰ ৰাহুল গান্ধীয়ে এই বিষয়ত মোডী চৰকাৰৰ বিৰুদ্ধে মাত মাতিছিল আৰু কৈছিল- “মোডী চৰকাৰৰ কাৰ্যকালত গুৰুত্বপূৰ্ণ চৰকাৰী প্ৰতিষ্ঠানসমূহত দলিত, জনজাতীয় আৰু অ’বিচি সম্প্ৰদায়ৰ প্ৰতিনিধিত্ব অতি কম। ইফালে, কেন্দ্ৰীয় চৰকাৰৰ গুৰুত্বপূৰ্ণ পদত নিৰ্বাচিতভাৱে আৰ এছ এছৰ প্ৰতিনিধি নিযুক্তি দিয়া হৈছে। নৰেন্দ্ৰ মোদীয়ে ‘ৰাষ্ট্ৰীয় স্বয়ংসেৱক সংঘ’ৰ জৰিয়তে ব্যক্তিগত সংস্থাৰ উচ্চপদস্থ বিষয়াক নিযুক্তি দিছে য’ত আই এ এছ বিষয়া নিযুক্তি দিব লাগে। যাৰ বাবেই ইউ পি এছ চিৰ প্ৰতিযোগিতামূলক পৰীক্ষা অৰ্থহীন হৈ পৰিছে। এই চৰকাৰী নীতিয়ে দলিতসকলৰ অধিকাৰ আৰু সংকুচিত কৰিছে।”
