দেশত কৰ’নাভাইৰাছ আক্ৰান্তৰ সংখ্যা ১০৭১লৈ বৃদ্ধি পাইছে। আক্ৰান্ত ২৯ গৰাকী লোক মৃত্যুমুখত পৰিছে।
স্বাস্থ্য আৰু পৰিয়াল কল্যাণ মন্ত্ৰ্যালয়ৰ তথ্য মতে কৰ’নাভাইৰাছত আক্ৰান্ত দেশৰ ১০০ গৰাকী ৰোগী সুস্থ হৈছে।
যোৱা ২৪ ঘণ্টাত দেশত নতুনকৈ ৯২ গৰাকী কৰ’নাভাইৰাছ আক্ৰান্ত চিনাক্ত হৈছে।
মণিপুৰ আৰু মিজোৰামত এগৰাকীকৈ ৰোগী চিনাক্ত হোৱাৰ পিছত অসমকে ধৰি উত্তৰ-পূবত কোনো নতুন ৰোগী চিনাক্ত হোৱা নাই।
কৰ’নাভাইৰাছত আটাইতকৈ বেয়াকৈ ক্ষতিগ্ৰস্ত হৈছে মহাৰাষ্ট্ৰ আৰু কেৰালা। মহাৰাষ্ট্ৰত কৰ’নাভাইৰাছ আক্ৰান্ত ১৯৩ গৰাকীলৈ বৃদ্ধি পাইছে। কেৰালাত এই সংখ্যা হৈছে ১৯৪ (।)
কৰ্নাটকত ৮০ গৰাকী কৰ’নাভাইৰাছ আক্ৰান্ত চিনাক্ত হৈছে। উত্তৰ প্ৰদেশত ৭৫, তেলেংগানাত ৬৯ গৰাকী ৰোগী চিনাক্ত হোৱাৰ বিপৰীতে গুজৰাটত চিনাক্ত হৈছে ৫৮ গৰাকী।
ৰাজস্থান আৰু পঞ্জাৱত ক্ৰমে ৫৭ আৰু ৩৮ গৰাকী ৰোগী চিনাক্ত হৈছে।
দিল্লীত ৫৩, তামিল নাডুত ৫০ আৰু মধ্য প্ৰদেশত ৩৩ গৰাকী কৰ’নাভাইৰাছত আক্ৰান্ত চিনাক্ত হৈছে।
হাৰিয়ানাত ৩৩, অন্ধ্ৰ প্ৰদেশত ১৯ আৰু জম্মু-কাশ্মীৰত ৩১ আৰু লাডাখত ১৩ গৰাকীকৈ কৰ’নাভাইৰাছ আক্ৰান্ত চিনাক্ত হৈছে।
পশ্চিম বংগত ১৯, বিহাৰত ১১, আন্দামান আৰু নিকোবৰত ন, চণ্ডীগড়ত আঠ, ছত্তিশগড়ত সাত, উত্তৰাখণ্ডত সাত, গোৱাত পাঁচ, ওড়িছাত তিনি আৰু পুডুচেৰিত এগৰাকী ৰোগী চিনাক্ত হৈছে।
ভাৰতীয় চিকিৎসা গৱেষণা পৰিষদে প্ৰকাশ কৰা মতে ভাৰতত কৰ’নাভাইৰাছ আক্ৰান্তৰ সংখ্যা বৃদ্ধি পাই আছে যদিও ই এতিয়াও সামূহিক সংক্ৰমণৰ পৰ্য্যায় পোৱাগৈ নাই।
বিশ্বজুৰি সাত লাখতকৈয়ো অধিক লোক এই মাৰাত্মক ভাইৰাছবিধত আক্ৰান্ত হৈছে।
৩৩ হাজাৰতকৈয়ো অধিক লোকৰ এই ৰোগত মৃত্যু ঘটিছে।
আমেৰিকাত প্ৰায় ১,৪০,০০০ লোক আক্ৰান্ত হৈছে। মৃত্যু হৈছে ২৪০০তকৈয়ো অধিক লোকৰ।
আমেৰিকাত আক্ৰান্তৰ সংখ্যাই চীন, ইটালিকো চেৰাই গৈছে।
ভাৰতত কৰ’নাভাইৰাছক প্ৰতিহত কৰাৰ বাবে প্ৰধান মন্ত্ৰী নৰেন্দ্ৰ মোদীয়ে ২১ দিনৰ লকডাউন ঘোষণা কৰিছে।
