বিহু অসমীয়াৰ প্ৰাণস্পন্দন। আৰু ব’হাগ! সুধাকণ্ঠ ভাৰতৰত্ন ডঃ ভূপেন হাজৰিকাই কোৱাৰ দৰে ব’হাগ মাথো এটা মাহ নহয় ই অসমীয়াৰ আয়ুস ৰেখা।
অসমীয়াৰ আয়ুস ৰেখা ব’হাগ এইবাৰ ব’হাগ হৈ অহা নাই। অসমীয়াৰ বাবে যেন ব’হাগ এইবাৰ হৈ আহিছে বৰবিহ!
অসমীয়াৰ নৱবৰ্ষৰ ব’হাগ বিহু অসমীয়া সবাতোকৈ ডাঙৰ উৎসৱ। অসমীয়াৰ জাতীয় উৎসৱ। অসমীয়াৰ জাতীয় জীৱনক ঐশ্বৰ্যশালী সংস্কৃতিক প্ৰতিনিধিত্ব কৰা বিহু এইবাৰ যেন নিজেই ৰুগ্ন!
হয় সমগ্ৰ বিশ্বজুৰি নৰ সংহাৰ চলোৱা ক’ৰ’না ভাইৰাছে এইবাৰ অসমীয়াৰ প্ৰাণস্পন্দন বিহুকো কৰি তুলিলে ৰুগ্ন!
বিহুৰ বিৰহত সমগ্ৰ অসমবাসীয়ে আটাহ আৰু হুমুনিয়াহ কাঢ়িলেও মানৱতাৰ পক্ষত থিয় দি বিশ্বৰ শ শ কোটি কোটি মানুহৰ সৈতে একাত্ম হৈ ক’ৰ’নাৰ সৈতে যুঁজ দিয়াৰ স্বাৰ্থ এইবাৰ বিহুৰ উৎসৱমুখিতাক হেলাৰঙে একাষকৰীয়া কৰিছে অসমীয়াই।
ক’ৰ’নাৰ বিৰুদ্ধে যুঁজ দিবলৈ কেৱল ভাৰততেই নহয় সমগ্ৰ বিশ্বৰ বহুকেইখন ৰাষ্ট্ৰত ল’কডাউন চলি আছে।
ভাৰততো ২১ দিনীয়া ল’কডাউন আৰু দুটা সপ্তাহ বঢ়াই দিয়া হৈছে। অহা ৩০ এপ্ৰিল অন্ত পৰাৰ কথা ল’কডাউনৰ।
ইফালে বিহু নিকট সন্মুখত। কাইলৈ উৰুকা পৰহিলৈ চেনেহৰ ব’হাগ বিহু।
ক’ৰ’না ভাইৰাছৰ আতংকৰ বাবে এইবাৰ ব’হাগ বিহুৰ কোনো প্ৰস্তুতিয়ে চলাব পৰা নাই অসমীয়াই। পিঠা পনা বনোৱা, বিহুৱা-গামোচা বোৱা একোৱেই কৰিব পৰা নাই অসমীয়াই।
ক’ৰ’না সংক্ৰমণ ৰোধৰ বাবে দেশত ল’কডাউন অব্যাহত থকাৰ মাজতে বিহুক লৈ চৰকাৰ তথা স্থানীয় প্ৰশাসনে কিছু নতুন নিয়ম বান্ধি দিছে।
স্বাস্থ্য মন্ত্ৰী ডঃ হিমন্ত বিশ্ব শৰ্মাই যোৱা সপ্তাহত প্ৰতিখন বিহু কমিটিকে পাঁচজন মানুহেৰে পাতাকা উত্তোলন কৰি বিহুৰ কাৰ্যসূচী সামৰণি মাৰিবলৈ অনুৰোধ কৰিছিল।
ৰাজ্যৰ বিভিন্ন প্ৰান্তৰ বিহু কমিটিবোৰে এইবাৰ বিহু সন্মিলন বাতিলো কৰিছে। গুৱাহাটী মহানগাৰীৰ ২৬ খন বিহু কমিটিয়ে বিহু সন্মিলন বাতিল কৰাৰ কথা ইতিমধ্যে ঘোষণা কৰিছে।
এই বিহুৰ বতৰত অসমীয়াবাসীৰ এটাই সান্ত্বনা আৰু আশা, ক’ৰ’না মহামাৰীক বিনাশ কৰি অহাবাৰলৈ উদযাপন কৰিব বিহুক মনৰ উলাহেৰে।
