ক’ৰ’না ভাইৰাছৰ সংক্ৰমণৰ প্ৰতি লক্ষ্য ৰাখি নেপাল চৰকাৰে দেশখনলৈ আহিব খোজা সকলো দেশৰ পৰ্যটকৰ বাবে ভিছা প্ৰদান সাময়িকভাৱে বন্ধ কৰাৰ সিদ্ধান্ত লোৱাৰ লগতে এভাৰেষ্টকে ধৰি বসন্তকালৰ সকলো পৰ্বতাৰোহণ বন্ধ কৰিছে।
বিশ্ব স্বাস্থ্য সংস্থাই দেশসমূহক ক’ৰ’না ভাইৰাছৰ প্ৰসাৰৰ প্ৰতি লক্ষ্য ৰাখি সাৱধানতা অৱলম্বন কৰিবলৈ জনোৱা আহ্বানৰ পিছতে নেপালে চৰকাৰে এই সিদ্ধান্ত গ্ৰহণ কৰে।
Kathmandu Post প্ৰকাশ পোৱা এক চৰকাৰী বিবৃতি অনুসৰি ‘ভিছাৰ স্থগিতকৰণ ১৪ মাৰ্চৰ পৰা ৩০ এপ্ৰলিলৈকে বাহাল থাকিব, কুটনৈতিক আৰু চৰকাৰী ভিছাসমূহক ইয়াৰ পৰা ৰেহাই দিয়া হৈছে।
ইয়াৰ উপৰি দেশখনে স্থল পথেৰে ভাৰতলৈ হোৱা আহ-যাহ সীমাবদ্ধ কৰাৰ লগতে সীমান্তত কঠোৰ নিৰিক্ষণৰ ব্যৱস্থা কৰিব বুলি জনায়। অৱশ্যে এতিয়ালৈকে বিদ্যালয় আৰু মহাবিদ্যালয় বন্ধ ৰখাৰ কোনো সিদ্ধান্ত লোৱা নাই।
‘যদি কোনো বিদেশী লোকে জৰুৰী কাৰণত নেপাল আহিব খোজে তেওঁ নিজৰ দেশত থকা নেপালৰ কনচুলেটত ভিছাৰ বাবে আবেদন কৰোতে ক’ৰ’না ভাইৰাছৰ পৰা মুক্ত বুলি এখন চিকিৎসা প্ৰমানপত্ৰ জমা দিব লাগিব।‘ বিবৃতিটোত প্ৰকাশ।
