মুখ্য মন্ত্ৰী সৰ্বানন্দ সোণোৱালে শনিবাৰে কৰ’না ভাইৰাছৰ সংক্ৰমণ নিয়ন্ত্ৰণৰ বাবে স্বাস্থ্য বিভাগে লোৱা প্ৰস্তুতিৰ বুজ লৈছে আৰু ৰাইজক আতংকিত নহ’বলৈ আহ্বান জনাইছে।
কৰ’না ভাইৰাছৰ সংক্ৰমণ নিয়ন্ত্ৰণৰ ক্ষেত্ৰত পৰিষ্কাৰ-পৰিচ্ছন্নতা বজাই ৰখা আৰু সজাগতামূলক কাৰ্য্যসূচী লোৱাৰ ওপৰত তেওঁ গুৰুত্ব আৰোপ কৰে।
কোনো বিদেশী ব্যক্তিক দেখিলেই আতংকিত নহ’বলৈ ৰাইজক আহ্বান জনাই সোণোৱালে এই সন্দৰ্ভত প্ৰয়োজনীয় পদক্ষেপ গ্ৰহণৰ বাবে আৰক্ষী বিভাগক নিৰ্দেশ দিয়ে।
পৰ্য্যালোচনা বৈঠকত স্বাস্থ্য (ৰাজ্যিক) মন্ত্ৰী পীযুষ হাজৰিকাৰ লগতে ৰাজ্য প্ৰশাসনৰ উচ্চ পদস্থ বিষয়াসকল উপস্থিত আছিল।
দিছপুৰৰ পৰা পঞ্চায়ত পৰ্য্যায়লৈকে সকলো চৰকাৰী কৰ্মচাৰীকে ভাইৰাছবিধৰ প্ৰতিৰোধমূলক ব্যৱস্থা সম্পৰ্কে সজাগ কৰি তুলিবলৈ বৈঠকত মুখ্য মন্ত্ৰীয়ে নিৰ্দেশ দিয়ে।
ৰাজ্যৰ ৪৪ হাজাৰ আশা আৰু অংগনৱাড়ী কৰ্মীৰ গোট গঠন কৰি গাঁৱে-গাঁৱে সজাগতা অভিযান চলাবলৈ মুখ্য মন্ত্ৰীয়ে নিৰ্দেশ দিয়ে।
আনহাতে যাত্ৰীসকলৰ মাজত সজাগতা সৃষ্টিৰ পদক্ষেপ গ্ৰহণৰ বাবে তেওঁ অসম ৰাজ্যিক পৰিবহণ নিগমক নিৰ্দেশ দিয়ে।
সকলো চৰকাৰী বিভাগক সহযোগিতাৰে আগবাঢ়িবলৈ আহ্বান জনাই মুখ্য মন্ত্ৰীয়ে ৰেল বিভাগকো স্বাস্থ্য বিভাগৰ সৈতে সহযোগিতা আগবঢ়াবলৈ আহ্বান জনায়।
লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমান বন্দৰত সকলো আন্তৰ্জাতিক যাত্ৰীৰে স্বাস্থ্য পৰীক্ষা কৰোৱা হৈছে বুলি স্বাস্থ্য বিভাগৰ বিষয়ববীয়াসকলে বৈঠকত অৱগত কৰে।
গুৱাহাটী চিকিৎসা মহাবিদ্যালয় চিকিৎসালয়ত কৰ’না ভাইৰাছ আক্ৰান্ত ৰোগীৰ বাবে ইতিমধ্যে আইচ’লেচন ৱাৰ্ড স্থাপন কৰা হৈছে।
স্বাস্থ্য বিভাগে জনোৱা মতে, সকলো জিলা চিকিৎসালয়তো তাৰ বাবে স্থান চিনাক্ত কৰা হৈছে আৰু স্বাস্থ্যকৰ্মীসকলক ইতিমধ্যে প্ৰয়োজনীয় প্ৰশিক্ষণ দিয়া হৈছে।
