কৰ’নাভাইৰাছ: টাটা ট্ৰাষ্টে আগবঢ়াব ৫০০ কোটি টকা
টাটা ট্ৰাষ্টে কৰ’নাভাইৰাছৰ বিৰুদ্ধে যুঁজাৰ বাবে ৫০০ কোটি টকা আগবঢ়াব।
COVID19ক কঠিনতম প্ৰত্যাহ্বান বুলি উল্লেখ কৰি টাটা ট্ৰাষ্টৰ সঞ্চালক ৰতন টাটাই কয় যে টাটা ট্ৰাষ্ট আৰু টাটা গ্ৰুপ কোম্পানিয়ে অতীতত দেশৰ প্ৰয়োজনৰ সময়ত সঁহাৰি জনাই আহিছে।
টাটাই ধনখিনি চিকিৎসা কৰ্মীসকলৰ বাবে ব্যক্তিগত সুৰক্ষামূলক সঁজুলি, শ্বাস-প্ৰশ্বাসদায়ক ব্যৱস্থা, টেষ্টিং কিট, আক্ৰান্ত ৰোগীৰ বাবে মডুলাৰ ট্ৰিটমেণ্ট ব্যৱস্থা আৰু স্বাস্থ্য কৰ্মী আৰু সাধাৰণ ৰাইজৰ মাজত সজাগতা আৰু প্ৰশিক্ষণৰ বাবে আগবঢ়াব।
The COVID 19 crisis is one of the toughest challenges we will face as a race. The Tata Trusts and the Tata group companies have in the past risen to the needs of the nation. At this moment, the need of the hour is greater than any other time. pic.twitter.com/y6jzHxUafM
— Ratan N. Tata (@RNTata2000) March 28, 2020
বাজাজ গ্ৰুপেও শেহতীয়াকৈ কৰ’নাভাইৰাছক প্ৰতিহত কৰাৰ বাবে ১০০ কোটি টকা আগবঢ়োৱাৰ কথা ঘোষণা কৰিছিল।
ভাৰতীয় চিকিৎসা গৱেষণা পৰিষদৰ মতে দেশত কৰ’নাভাইৰাছ আক্ৰান্তৰ সংখ্যা দ্ৰুতগতিত বৃদ্ধি পাইছে যদিও ই এতিয়াও সামূহিক সংক্ৰমণৰ পৰ্য্যায় পোৱাগৈ নাই।
যোৱা ২৪ ঘণ্টাত অভিলেখসংখ্যক ১৪৯ গৰাকী কৰ’নাভাইৰাছ আক্ৰান্ত ভাৰতত নতুনকৈ চিনাক্ত কৰা হৈছে।
দেশত কৰ’নাভাইৰাছ আক্ৰান্তৰ সংখ্যা ৮৭৩লৈ বৃদ্ধি পাইছে। চিনাক্ত ৰোগীসকলৰ ভিতৰত আছে ৪৭ গৰাকী বিদেশী নাগৰিক।
কৰ’নাভাইৰাছত আক্ৰান্ত হৈ ১৯ গৰাকী লোক মৃত্যুমুখত পৰিছে। ৭৯ গৰাকী ৰোগীক সুস্থ হোৱা বা চিকিৎসা প্ৰদানৰ অন্তত যাবলৈ দিয়া হৈছে।
মণিপুৰ আৰু মিজোৰামত এগৰাকীকৈ ৰোগী চিনাক্ত হোৱাৰ পিছত অসমকে ধৰি উত্তৰ-পূবত কোনো নতুন ৰোগী চিনাক্ত হোৱা নাই।
কৰ’নাভাইৰাছত আটাইতকৈ বেয়াকৈ ক্ষতিগ্ৰস্ত হৈছে মহাৰাষ্ট্ৰ আৰু কেৰালা। মহাৰাষ্ট্ৰত কৰ’নাভাইৰাছ আক্ৰান্ত ১৮০ গৰাকীলৈ বৃদ্ধি পাইছে। কেৰালাত এই সংখ্যা হৈছে ১৭৩ (।)
বিশ্বজুৰি আধা নিযুততকৈয়ো অধিক লোক এই মাৰাত্মক ভাইৰাছবিধত আক্ৰান্ত হৈছে।
২৩ হাজাৰতকৈয়ো অধিক লোকৰ এই ৰোগত মৃত্যু ঘটিছে।