ক’ৰ’না ভাইৰাছ মহামাৰী নিয়ন্ত্ৰণৰ বাবে বিশ্বৰ বিভিন্ন প্ৰান্তৰ লগতে বৃটেইনৰ অক্সফ’ৰ্ড বিশ্ববিদ্যালয়েও ভেকচিনৰ সন্ধানত ক্ষিপ্ৰ গতিত কাম চলি আছে।
ইয়াৰ মাজতে অক্সফোৰ্ড বিশ্ববিদ্যালয়ে দাবী কৰিছে যে তেওঁলোকে বনোৱা ভেকচিন অতি নিৰাপদ আৰু ই মানৱ দেহত ৰোগ প্ৰতিৰোধ ক্ষমতা বৃদ্ধি কৰিছে। ইয়াৰ ফলাফল খুব উৎসাহজনক।
প্ৰথম পৰ্যায়ৰ পিছত ক’ৰ’না ভেকচিনৰ দ্বিতীয় পৰ্যায়ৰ মানৱ পৰীক্ষণ সফলভাৱে সম্পন্ন হোৱা বুলি সোমবাৰ অৰ্থাৎ আজি দ্যা লেণ্ডছেট নামৰ এখন মেগাজিনে দাবী কৰে।
উল্লেখ্য যে ১ হাজাৰ ৭৭ জন লোকক সামৰি লোৱা হৈছিল এই ট্ৰায়েলত। ভেকচিন দিয়া লোকসকলৰ দেহত এণ্টিবডি আৰু শ্বেত ৰক্ত কণিকাৰ বিকাশ হৈছে আৰু যিটোৱে ক’ৰ’নাৰ বিৰুদ্ধে যুঁজাত সহায় কৰিছে।
এতিয়াও বৃহৎ পৰিসৰত ইয়াৰ ট্ৰায়েল হ’ব বাকী আছে। বৃটেইনে ইতিমধ্যেই এই ভেকচিনৰ ১০ কোটি ড’জ সুৰক্ষিত কৰি লৈছে।
স্মৰ্তব্য যে অক্সফ’ৰ্ডৰ গৱেষকসকলে দহ হাজাৰতকৈয়ো অধিক লোকক সামৰি লৈ তৃতীয় তথা অন্তিম পৰ্যায়ৰ পৰীক্ষাৰ বাবে আগবাঢ়িছে।
যদি তৃতীয় তথা অন্তিম পৰ্যায়ৰ পৰীক্ষণ সফলভাৱে সম্পন্ন হয় তেন্তে ছেপ্তেম্বৰ মাহত এই ভেকচিনবিধ সৰ্বসাধাৰণৰ বাবে উপলব্ধ হ’ব।
ভাৰততো এই ভেকচিনৰ উৎপাদন চলি আছে। পুনেস্থিত চিৰম ইনষ্টিটিউট অৱ ইণ্ডিয়াই অক্সফ’ৰ্ড ভেকচিন উৎপাদনৰ দায়িত্ব লাভ কৰিছে।
অক্সফ’ৰ্ডৰ প্ৰফেচৰ ছাৰা গিলবৰ্টে ক’ৰ’না ভাইৰাছৰ ভেকচিন বনোৱাত গুৰুত্বপূৰ্ণ ভূমিকা গ্ৰহণ কৰি আছে। অন্তিমটো ট্ৰায়েলো তেওঁৰ নেতৃত্বতে চলিব বুলি জানিব পৰা যায়।
