আমেৰিকা প্ৰশাসনে আক্ৰমণাত্মকভাৱে অবৈধ অনুপ্ৰৱেশকাৰীক দেশখনৰ বিতাড়িত কৰিছে। এতিয়ালৈকে আমেৰিকাৰ পৰা তিনিখন বিমানেৰে উভতি আহিছে তিনি শতাধিক ভাৰতীয়। খবৰ অনুসৰি আমেৰিকাই অতি সোনকালে মধ্য এছিয়া আৰু ভাৰতৰ পৰা যোৱা আৰু ২০০ জন লোকক দেশলৈ ঘূৰাই অনাৰ ব্যৱস্থা গ্ৰহণ কৰিব।
ইফালে মধ্য আমেৰিকাৰ দেশ কোষ্টা ৰিকাই এতিয়া আমেৰিকাত বাস কৰা মধ্য এছিয়া আৰু ভাৰতীয় অবৈধ অনুপ্ৰৱেশকাৰীক গ্ৰহণ কৰিবলৈ ইচ্ছুক বুলি প্ৰকাশ কৰিছে। এনে পৰিস্থিতিত অচিৰেই দুই শতাধিক লোকক লৈ এখন বিমান সেই দেশলৈ ৰাওনা হ’ব।
সোমবাৰে কোষ্টা ৰিকাৰ ৰাষ্ট্ৰপতিৰ কাৰ্যালয়ৰ পৰা এক বিবৃতিত ভাৰত আৰু মধ্য এছিয়াৰ পৰা অহা অবৈধ অনুপ্ৰৱেশকাৰীক গ্ৰহণ কৰিবলৈ ইচ্ছা প্ৰকাশ কৰে। ইফালে ভাৰতৰ বৈদেশিক পৰিক্ৰমা মন্ত্ৰালয়ে কোষ্টা ৰিকান ৰাষ্ট্ৰপতিৰ এই ঘোষণাৰ প্ৰতি তৎক্ষণিকভাৱে কোনো প্ৰতিক্ৰিয়া প্ৰকাশ কৰা নাই।
উল্লেখ্য যে এছিয়াৰ কেইবাখনো দেশে অবৈধ অনুপ্ৰৱেশকাৰীক গ্ৰহণ কৰিবলৈ অস্বীকাৰ কৰিছে। এই পৰিস্থিতিত ট্ৰাম্প প্ৰশাসনে পানামা, কোষ্টা ৰিকা আদি মধ্য আমেৰিকাৰ দেশলৈ এনে অবৈধ অনুপ্ৰৱেশকাৰীক প্ৰেৰণ কৰিছে। এনে পৰিপ্ৰেক্ষিতত কোষ্টা ৰিকাই ভাৰত আৰু মধ্য এছিয়াৰ পৰা অহা অবৈধ অনুপ্ৰৱেশকাৰীক গ্ৰহণ কৰিবলৈ আগ্ৰহ প্ৰকাশ কৰিছে। তাৰ মাজতে বুধবাৰে আমেৰিকাৰ পৰা কোষ্টা ৰিকাত উপস্থিত হ’ব ২০০ জন অবৈধ অনুপ্ৰৱেশকাৰীক লৈ এখন বিমান।
ইপিনে, আমেৰিকাৰ পৰা ভাৰতীয় অবৈধ অনুপ্ৰৱেশকাৰীক কঢ়িয়াই অনা প্ৰথমখন বিমান অমৃতসৰত অৱতৰণ কৰাৰ পিছতে এই বিতৰ্ক আৰম্ভ হয়। ভাৰতীয় নাগৰিকক শিকলি বান্ধি ৪০ ঘন্টা উৰাজাহাজত অনা ধৰণক লৈ বিৰোধীয়ে সৰৱ হৈ পৰে। কিন্তু বৈদেশিক পৰিক্ৰমা মন্ত্ৰী এছ জয়শংকৰে সংসদত দাবী কৰে যে আমেৰিকান কৰ্তৃপক্ষই ভাৰতক জনাইছে যে মহিলা আৰু শিশুসকলক শিকলিৰে বান্ধি ৰখা হোৱা নাই। কিন্তু সেই বিমানখনত ঘৰলৈ উভতি অহা মহিলাসকলে দাবী কৰিছিল যে তেওঁলোকৰ কঁকাল আৰু ভৰিত শিকলি, আৰু হাতত হেণ্ডকাফ আছিল। কিন্তু আমেৰিকাৰ পৰা অহা দ্বিতীয়খন বিমান অমৃতসৰত অৱতৰণ কৰাৰ পিছত দাবী কৰা হয় যে এই বিমানত মহিলা আৰু শিশুক শিকলিৰে বান্ধি ৰখা হোৱা নাছিল।
মন কৰিবলগীয়া যে ১৬ ফেব্ৰুৱাৰীৰ পুৱাৰ ভাগত আমেৰিকাৰ পৰা আৰু ১১৯ জন অবৈধভাৱে বাস কৰা ভাৰতীয়ক লৈ অমৃতসৰত দ্বিতীয়খন আমেৰিকান বিমান অৱতৰণ কৰে। আমেৰিকাৰ পৰা বিতাড়িত এই ১১৯ জন লোকৰ ভিতৰত ৬৭ জন পঞ্জাৱৰ আৰু ৩৩ জন হাৰিয়ানাৰ। ইয়াৰ উপৰিও ঘৰলৈ উভতি অহা অবৈধ অনুপ্ৰৱেশকাৰীৰ ভিতৰত ৮ জন গুজৰাটৰ বাসিন্দা, উত্তৰ প্ৰদেশৰ ৩ জন, গোৱাৰ ২ জন, মহাৰাষ্ট্ৰৰ ২ জন, ৰাজস্থানৰ ২ জন, হিমাচল প্ৰদেশ আৰু জম্মু-কাশ্মীৰৰ ১ জন।
ইয়াৰ পূৰ্বে ৫ ফেব্ৰুৱাৰীত অবৈধ ভাৰতীয়ক কঢ়িয়াই অনা আমেৰিকাৰ বায়ুসেনাৰ বিমান অমৃতসৰত উপস্থিত হৈছিল। অমৃতসৰত অৱতৰণ কৰা বিমানখনত মুঠ ১০৪ জন ভাৰতীয় নাগৰিক আছিল। সেই বিমানেৰে ঘৰলৈ উভতি অহা বহু ভাৰতীয়ই অভিযোগ কৰিছিল যে গোটেই যাত্ৰাত তেওঁলোকৰ হাত-ভৰি শিকলিৰে বান্ধি থোৱা আছিল। আনকি মহিলাসকলকো ভৰি আৰু কঁকালত শিকলিৰে বান্ধি ৰখাৰ অভিযোগ উত্থাপন হৈছিল। যাৰ ফলত সংসদত হুলস্থুলৰ সৃষ্টি হয়। ইয়াকে লৈ ভাৰতত বিৰাট প্ৰতিক্ৰিয়াৰ পাছত নতুন দিল্লীয়ে বিতাড়িতসকলৰ লগত কেনে ব্যৱহাৰ কৰিব লাগে সেই সন্দৰ্ভত ৱাশ্বিংটনক নিজৰ উদ্বেগ প্ৰকাশ কৰে।
আনহাতে, শেহতীয়াকৈ আমেৰিকা ভ্ৰমণৰ সময়ত মোদীয়ে ট্ৰাম্পৰ কাষত থিয় হৈ কয়, ‘যিসকলে আন দেশত অবৈধভাৱে বাস কৰি আছে, তেওঁলোকৰ তাত থকাৰ কোনো অধিকাৰ নাই।’ ভাৰত আৰু আমেৰিকাৰ ক্ষেত্ৰত আমি আগতেও কৈছো যে যিসকল সঁচাকৈয়ে ভাৰতীয় আৰু যিসকল অবৈধভাৱে আমেৰিকাত আছে তেওঁলোকক ঘূৰাই ল’বলৈ ভাৰত সাজু।’
